Túkallinn

Hvenær er botninum náð?

Þú veist það þegar þú ert kominn þangað:

Hjörtur

ps. munið að gerast fans á facebook ==>

Hvað ertu tilbúinn að leggja á þig fyrir túkallinn?

Það er spurning hvort við förum að sjá glugaþvottamenn sem þennan á götunum hér í Reykjavík, svona eins og efnahagsástandið er þessa dagana. 

Skemmtilega útfærður :)

Túkallinn

hverrar krónu virði

Baunaréttir

Margir sem gjarnan myndu vilja hafa baunir oftar á borðum eru svolítið skelkaðir að elda þær sjálfir og kaupa þær frekar í dósum. Og ástæðan er hið ógurlega loft sem myndast í þörmum neytandans og veldur honum leiðindum og ama. Til er ráð sem má nota til að komast hjá þessu en það er að sjóða með baununum svolítinn legg af kombú sem er sólþurrkaður stórþari og er seldur hér ýmist frá Japan eða íslenskur. Kombúið er veitt uppúr í lokin en það má líka borða það sér eða með baununum.

Baunir eru frekar ódýr matur, fitulítill  en gefa vel af prótíni, vítamínum og steinefnum. Þær geymast vel í góðum pokum eða dósum og langur geymslutími virðist ekki hafa áhrif á mýkt eða bragðgæði þeirra. Gott er að fara í gegnum baunir sem á að sjóða og tína burtu ef skemmdar baunir eða steinar hafa slæðst með.

Það er hagstætt að sjóða t.d. hálft eða heilt kíló í einu, frysta það sem ekki á að snæða strax og síðan er hægt að nýta baunirnar á óteljandi máta. Munið bara að frysta þær í litlum skömmtum, svona rétt mátulegum fyrir hvert skipti.

Hér á landi eru nýrnabaunir, hvítar baunir, sojabaunir og kjúklingabaunir algengastar og aðferðin við að sjóða þær er ætíð sú sama.

Og svona gerum við:

Við leggjum baunirnar í bleyti yfir nótt eða ekki minna en 8–10 tíma. Þá er vatninu hellt af þeim, og baunirnar settar í góðan pott, vatni bætt við eða ca 3 bollum fyrir hvern bolla af baunum – þegar þær voru þurrar. Suðan er látin koma rólega upp, kombóið látið út í og allt soðið 30–60 mínútur. Saltið ef þið viljið. Það er gott að sjóða baunirnar ekki alveg í mauk, síst ef á að nota þær í heita rétti eða rétti sem þarf að sjóða smávegis.

Þegar baunirnar eru soðnar er aukavatni hellt af þeim og þær sem eiga að fara í frysti eru settar í litlar plastdósir og þegar innihaldið er orðið kalt er þeim komið fyrir í frystinum. Munið að merkja með dagsetningu.

Þá er að athuga hvað má gera við skammtinn sem við skildum eftir.  

T.d. má gera: 

HVÍTAR BAUNIR með skinku og epli 

Þá er smáttskorinn laukur 1–2 stykki léttsteikt í olíu, grænt epli í litlum teningum sett út í og strax þar á eftir er hrært saman við lítilli dós af tómatkrafti og kryddi einsog timian og 1–2 negulnöglum. Stjakið þessu svolítið um pönnuna og látið hitna vel í gegn en síðan er bætt við grænmetissoði, 3–4 dl, lokið sett á og soðið í ca hálftíma. Hrærið í öðru hvoru og bætið aðeins vatni ef þetta verður of þurrt. Baununum sem mega vera 3–400 gr. er bætt við þegar líður að lokum suðunnar.

Þegar þarna er komið má alveg nota þetta sem meðlæti með kjöti eða fiski eða ofan á brauð.

EEEN, það má líka setja þetta í eldfast fat, dreifa slatta af skinku í sneiðum eða bitum og einu rauðu epli í skífum yfir. Hitað vel í gegn við 200°. Og þessi réttur stendur fyrir sínu. 

 

Hér er gott meðlæti t.d. með kjúklingarétti: 

HVITAR BAUNIR í karrí 

Saxaður laukur er hitaður í olíu  á pönnu með karrí að vild. Jurtasalti er stráð yfir og slatta af rjóma hrært út í og síðan er soðnu baununum bætt út í. Soðið í nokkrar mínútur.

Borið fram. 

Einfalt –ekki satt? 

Refapottréttur - sönn íslensk kreppusteik

Á gamlársdag segir í Morgunblaðinu frá Jóni Vigfúsi Guðjónssyni, sjómanni frá Suðureyri sem eldaði sér refapottrétt. Jón Vigfús er veiðimaður og ákvað að prófa sig áfram með ref sem hráefni. Ég læt lýsingu Jóns Vigfúsar á refauppskriftinni fylgja hér, ef einhver vill prófa að matreiða ref:

„Síðan steikti ég kjötið á heitri pönnu, kryddaði með salti og pipar. Svissaði síðan lauk, sveppi og papriku saman við refinn og bjó til villibráðarsósu. Skellti þessu öllu út í sósuna og lét malla í 20 mínútur og úr varð þessi fíni refapottréttur sem smakkaðist vel.“ Sagði Jón  Vigfús matinn góðan og hafa helst minnt á kindagúllas.

Túkallinn
hverrar krónu virði

Í upphafi nýs árs

Gleðilegt nýtt ár!

Og ég meina það mjög innilega. GLEÐILEGT nýtt ár. Annus horribilis er líklega það fyrsta sem flestum dettur í hug þegar hugsað er um árið 2008. Árið sem allt fór til fjandans. En það gerðist líka margt gott á árinu. Við unnum silfur í handbolta á ólympíuleikunum. Við komumst án teljandi meiðsla úr Suðurlandsskjálftanum. Fyrir mig persónulega stendur fæðing fimmta barnsins míns upp úr en í maí fæddist mér hraustur og heilbrigður drengur. Og ég tók sjálfur á móti honum. Stórfengleg stund.

Það hvíla þungbúin drungaský yfir nýja árinu með horfur á allt að 10% atvinnuleysi og tilheyrandi erfiðleikum. Þjóðin stendur frammi fyrir stærstu áskorunum sínum frá því að hún fékk sjálfstæði. En þetta eru engin móðuharðindi. Vissulega eiga margir eftir að missa vinnuna, missa bílana sína og jafnvel missa húsin sín og enda í gjaldþroti. En það er mikilvægt að missa aldrei sjálfsvirðinguna né virðinguna fyrir öðrum. Missa aldrei trúna á að þetta sé bara dimmviðri sem gengur yfir og aftur komi bjartari tímar. Missa aldrei trúna á mátt vinskapar og fjölskyldu. Og gleymum ekki fyrirgefningunni. Örvæntingin er slæmur ráðgjafi og mörk mistök hafa verið gerð og fleiri eiga eftir að vera gerð.  Finnum reiðinni uppbyggilegan farveg.

Kornið
Hvað var það sem gerðist? Það má kannski líkja þessu við kornuppskeru. Kornið okkar hefur sprottið gríðarlega vel á undanförnum árum og orðið stærra og glæsilegra eftir því sem við höfum borið meiri áburð á það. En í stað þess að skera kornið þegar það var tilbúið bárum við meira á til að stækka það enn frekar. Og við héldum áfram þó komið væri fram á haust. Og við hættum ekki fyrr en kornið fraus og stönglarnir brustu undan þessum stóru glæsilegu kornum og öll uppskeran fór til spillis.

En það sem enn er eftir er frjór jarðvegurinn, nýplægður akur sem býður þess að í hann sé sáð. Nú er komið að grasrótinni. Það kemur enginn og bjargar okkur í þetta skiptið. Ekki ný álver. Ekki olíuhreinsistöð. Ekki þorskurinn. Við þurfum að rækta hið “nýja Ísland” sjálf.

2009 er ár nýsköpunar
Stórar björgunaraðgerðir krefjast stórra lána. Og þau liggja ekki á glámbekk þessa dagana. En aðrar aðgerðir krefjast fyrst og fremst vinnu, framtaksemi og þátttöku okkar. Þaðan mun uppbyggingin koma. Þaðan mun framtíðin koma. Því þar er okkar stærsta auðlind. Mannauðurinn og hugvitið.

Þetta er ekki einhver klisja til þess að peppa fólk upp og láta það halda að það sé einhvers virði. Þetta er einfaldlega staðreynd. Ef náttúruauðlindir væru svona góð fjárfesting væri Kongó í Afríku ríkasta land í heimi. Kongó á gull, olíu, demanta og 75% af öllum góðmálmum sem notaðir eru í tölvuiðnaðinum. Og er Kongó ríkasta land í heimi? Nei, hvergi nálægt því. Síðan höfum við lönd eins og Sviss, Danmörku og Lúxemborg sem eru meðal ríkustu landa í heimi. Og hvaða náttúruauðlindir hafa þessi lönd? Engar. Alls ekki neitt. Ekki málma, ekki olíu, ekki einu sinni fisk nema í mjög takmörkuðu magni. Það sem þessar þjóðir hafa nýtt sér er hugvit. Þar er framlegðin mest, en ekki í álvinnslu, olíuvinnslu eða annarri hráefnisframleiðslu. Álið verður ekki virkilega verðmætt fyrr en það er komið Audi merki á það og slatti af hugviti á bak við það.

Í Íslendingum býr geysimikill sköpunarmáttur. Við erum óhefluð og kreatív og í okkur býr mikill kraftur. Það er þessi kraftur sem nú mun koma okkur áfram, sem við þurfum að virkja. Hvort sem er í grasrótinni, fiskvinnslunni eða innan stærri fyrirtækja. Fólk er sneisafullt af hugmyndum. Nú er rétti tíminn til að koma þeim í framkvæmd.

2009 er ár draumanna
Við höfum tilhneigingu til þess að byggja okkur upp ákveðið öryggisnet. Starf sem við erum sæmilega örugg í. Hús sem við erum sæmilega ánægð með. Líf sem er í föstum skorðum og tiltölulega átakalítið. Þetta veitir okkur öryggi sem við viljum síður raska og heldur aftur af okkur þegar kemur að því að fylgja draumum okkar og láta þá rætast. Þorum við að leggja þetta öryggi undir?

Nú hefur þessu jafnvægi verið raskað, við höfum verið svipt örygginu. Það er óþægilegt en um leið er það hvatning til þess að grípa nú tækifærið og láta langþráða drauma rætast. Hvort sem það er að fara í langt ferðalag, stofna nýtt fyrirtæki, fara í nám, skipta um stafsvettvang, sinna listsköpun, flytja á nýjan stað ... Árið 2009 er einmitt rétta árið til þess að láta draumana rætast.

2009 er árið þitt
Breytingum fylgja tækifæri og nú er tækifæri fyrir þig til þess að láta til þín taka, til þess að láta draumana rætast, til þess að byrja á einhverju nýju. Endirinn á einu er óhjákvæmilega upphafið að einhverju öðru. Það er þitt að ákveða hverju.

Verum dugleg að rækta vini okkar og fjölskyldu og styðja við bakið hvort á öðru. Hittumst, tölum saman, deilum hugmyndum og góðum ráðum. Það kemur margfalt til baka, þótt síðar verði.

Með bestu óskum um farsælt og gæfuríkt nýtt ár
Hjörtur Smárason

Kæra kreppa!

Við höfum ákveðið að taka ekki þátt.

Eins og sjá má eru bílastæði Kringlu og Smáralindar full og sömu sögu má segja um skemmtistaði bæjarins.

Fyrirætlanir þínar um að knésetja okkur munu ekki bera árangur. Við munum styðja við bakið á hvort öðru og styrkja innlenda verslun.

Finndu þér annað svæði til að herja á. Við erum hætt að hlusta á þig og fjölmiðlana, vini þína.

 

Kær kveðja

Íslenska þjóðin - Stolt og sameinuð!

Sunnudagar eru spar-dagar

Þó margt hafi hækkað verulega, þá er fjöldi fyrirtækja með lagera sem þarf að losa. Lagera sem þegar er búið að borga upp og geta komið hreyfingu á hlutina þegar aðrir munir á nýja genginu hreyfast ekki. Þarna eru tækifæri til þess að spara háar fjárhæðir á ónotuðum vörum.

Í dag sunnudag milli kl. 12 og 18 býður Fjölvi til bókaveislu á lager sínum að Sundaborg 3 (langa gráa húsið fyrir ofan vöruhótel Eimskipa). Þar verður hægt að kaupa nýjar og eldri bækur á allt niður í 100 krónur, auk þess sem að frí bók fylgir öllum kaupum. Þannig að ef þú hefur áhuga á góðum bókum á gjafverði ...

Ef þú veist um fleiri lagersölur og tilboð sem eru í gangi einhvers staðar í bænum, segðu þá frá þeim í kommentunum hér fyrir neðan.

Túkallinn
hverrar krónu virði

Bjartsýnismarmelaði

Maður tekur 400 grömm af þurrkuðum abrikósum og sker þær í búta. Setur til hliðar. Tekur  2 appelsínur, eina sítrónu og eitt læm sem búið er að taka börkinn af og sem mest af hinni hvítu himnu sem stundum situr eftir á ávöxtunum, skera þetta allt í smærri bita. Það er líka gott að hafa þarna með 1-3 gulrætur, svolítið chili, kannski engiferrót og hvaðeina annað sem þið haldið að muni gera marmelaðið betra og meira bjartsýnishvetjandi.

Öllum þessum bitum er rennt gegnum hakkavél eða matvinnsluvél og gumsið er síðan sett í pott áamt ca hálfum lítra af appelsínusafa og 2 dl af vatni. Þetta er soðið rólega í 30 mínútur. Þá er potturinn dreginn til hliðar, 350 gr af (reyr)sykri blandað vel í og suðan látin koma upp aftur og soðið aftur í ca hálftíma.  Þá er potturinn enn dreginn til hliðar, smakkað á framleiðslunni og bætt svolitlu af sykri í viðbót (50-100 gr) og hrært vel í öllu saman.

Þegar maður er orðinn ánægður með bragðið er þetta sett í sultukrukkur – munið að þær þurfa að vera vel  hreinar – og lokið sett á. Hver krukka fær fallegan miða í skærum lit með innihaldslýsingu, broskalli og dagsetningu – nema hvað.

Geymt á köldum stað.

Frábært með ristuðu brauði, gott í bakstur og hvaðeina sem smekkurinn stendur til.

Túkallinn
hverrar krónu virði

PS. Það má líka setja chili og engifer í heilu lagi í suðuna og veiða það svo uppúr í lokin.

Hrekkjavökuföndur

Nú fer að styttast í hrekkjavöku og því ekki seinna vænna að fara að sníða búninginn. Búningurinn þarf ekkert að verða síðri þó enginn verði keyptur þetta árið. Núna næstu daga mun ég birta kennslumynbönd og hugmyndir að búningum sem þið getið búið til sjálf.

Við byrjum á vængjunum.



Túkallinn hverrar krónu virði

Sunnudagur með fjölskyldunni

Veðrið þessa helgina er alveg ágætt og því um að gera að njóta þess. Það er aldrei hægt að treysta á hvenær það verður næst nægilega gott veður til að vera utandyra. Ég hef því listað upp skemmtilega utandyraskemmtun sem hægt er að gera með börnunum eða vinunum þessa helgina:

1.    Gakktu út í Gróttu. Hefurðu einhvern tímann gert það? Er ekki kominn tími til? Í dag er fjaran opin milli kl. 8:47-12:47 og aftur á milli 20:34-00:34 (upplýsingar um flóðatíma).
2.    Farðu í Heiðmörkina eða Elliðárdalinn í skógarferð. Týndu haustlauf til þess að þurrka. Þú getur svo notað laufin til þess að búa til jólakort einhverja illviðris helgina.
3.    Finndu svifdiskinn og farðu út á tún. Það er alltaf gaman.
4.    Náðu í víkingaspilið Kubb og farðu út á tún í Kubb. Það er spil sem allir geta verið með í, óháð aldri.
5.    Farðu út á sparkvöll, sem eru komnir upp við nánast alla skóla núna, og farðu í fótbolta.
6.    Taktu börnin á leikvöll í öðru hverfi. Það er alltaf spennandi fyrir krakka að koma á nýjan leikvöll.
7.    Finndu veiðistöng og farðu niður á bryggju að veiða. Þú gætir jafnvel veitt í soðið ef vel gengur.

Ef þið hafið fleiri hugmyndir, bætið þeim þá endilega í hér í kommentin að neðan. Munið bara að þó veðrið sé ágætt þá er kaldur vindur. Klæðið ykkur vel.

Túkallinn
-hverrar krónu virði

ps. Þú getur að sjálfsögðu gerst áskrifandi að Túkallinum FRÍTT! Alveg eins og með öll önnur vefrit á vefjakrot.is. Þú getur valið um RSS áskrift eða áskrift í tölvupósti.