Úr smiðju skaparans

Einskis manns land: arkitekt hannar lausn á Palestínudeilunni

Vatn er undirstaða alls lífs og tilefni átaka víða um heim. Í deilu Palestínumanna og Ísraela skiptir vatn miklu máli því aðgangur að ferskvatni er mjög takmarkaður í þeim heimshluta.

Phu Hoang arkitektastofan í New York lagði fram nýstárlega tillögu sem leyst gæti hluta af þeim pólitíska, efnahagslega og vistfræðilega vanda sem blasir við íbúum svæðisins. Um er að ræða þrjár tilbúnar eyjar í Dauðahafinu sem bjóða upp á dægradvöl, ferðamannaiðnað, orkuframleiðslu og vatnsframleiðslu.

Eyjarnar þrjár myndu tilheyra hlutlausu svæði utan við lögsögu nágrannaríkjanna. Ein eyjan er hugsuð til vatnsframleiðslu með sólartjörnum, sérstökum búnaði sem vinnur vatn úr rakanum í loftinu, vatnshreinsitönkum og hreinsibúnaði. Hinar eyjarnar tvær eru annars vegar eyja til framleiðslu sólarorku, bæði til eigin nota og til útflutnings og svo fyrir ferðamenn.

Hugmyndin hefur fengið mikla athygli enda nýstárleg hugmynd hér á ferð. Það er hins vegar auðvelt að ímynda sér að erfitt sé að fá samstöðu ríkjanna um eitthvað eins og þetta, eins og með flest annað sem þjóðirnar reyna að mynda samstöðu um. En mjög áhugaverð hugmynd engu að síður.

Hjörtur
(via Inhabitat)

Allt-í-einu-míkró-bjór-bruggverksmiðja

Í myndbandinu hér að neðan fáum við að fylgjast með John Carnett, ljósmyndara hjá Popular Science, prófa heimasmíðuðu allt-í-einu-tæki bjórverksmiðjuna sína í bílskúrnum heima. Tækið, sem kallast "Tækið" (The Device), sýður, eimar, kælir og skenkir allt að tvær mismunandi gerðir af miði í einu. Þetta er náttúrulega nauðsynlegt í tæki í hverjum bílskúr.

Hjörtur
(via Core77.com)

Ætlar að byggja sér 13. aldar kastala í höndunum

Eða eins og tíðkaðist þá, í höndum verkamanna sinna, en ekki eigin handa. Í Guedelon í skógum Burgundy héraðs í Frakklandi hefur Michel Guyot ákveðið að reisa sér 13. aldar kastala og byggja hann með 13. aldar aðferðum. Allt hráefni í kastalann kemur úr nágrenninu, viðurinn úr skóginum og steinarnir úr gamalli sandsteinsnámu. Daglega vinna 50 handverksmenn og konur að byggingunni og eru t.d. allir steinar hoggnir til með hamri og meitli.

Núna er um þriðjungur af kastalanum kominn upp en Guyot reiknar með að það geti tekið allt að 20 ár að byggja kastalann. Þegar hann verður búinn getum við svo kannski fengið hann til þess að koma til Íslands og byggja loksins kastala hér á landi. T.d. í Reykholti í nafni Snorra Sturlusonar - "Sturlungaborg". Mér hefur alltaf þótt það vanta. Borgarvirki í Húnavatnssýslu er ekkert sérstaklega tignarlegt.

Hjörtur

(Guedelon via Trendhunter)

Mögnuð hönnun

Hefurðu séð myndir úr holræsakerfi Tokyo borgar? Maður gæti haldið að þetta væru teiknaðar myndir beint úr einhverri japanskri vísindaskáldsögu. En þetta eru raunverulegar ljósmyndir. Kannski er meiri raunveruleiki í þessum japönsku teiknimyndum en ég gerði mér grein fyrir.

Smellið hér til að sjá fleiri myndir.

Hjörtur
(via Core77)

Strandskrímsli

Í Hollandi er að finna undarleg farartæki sem eru hönnuð af listamanninum Theo Jansen. Þau eru smíðuð úr plasti og ganga (og þá meina ég bókstaflega ganga) sjálf fyrir vindorku. Mögnuð smíði.

Í huga Theo Jansen eru engin mörk á milli listar og verkfræði, það er bara ímyndun fólks. Hann, sem hefur stundum verið nefndur da Vinci okkar tíma, er ágætis sönnun þess. Þið getið séð hvernig þetta virkar á myndbandinu hér að neðan sem er af "Animaris Rhinoceros Transport".

Og hér er hægt að sjá fleiri farartæki sem Theo Jansen hefur hannað og smíðað í mynd sem BMW gerði um hann:

Hægt er að sjá meira á strandbeest.com

Hjörtur