Úr smiðju skaparans

Isla Moda - eyja tískunnar í Dubai

Nýjasta fjárfestingin í "Heiminum" í Dubai, er Isla Moda. Isla Moda er manngerð eyja sem verður staðsett einhvers staðar við "Atlantshafið" í "Heiminum". Það er fjárfestingafélagið Dubai Infinity Holdings sem stendur á bak við kaupin á eyjunni, sem er enn ekki til.

Hugmyndin er að búa til að mistöð tísku í Miðausturlöndum í samstarfi við öll helstu tískuhús heims. Hafa verið gerðir samningar við þekkta tískuhönnuði, og aðra minna þekkta hönnuði, um samstarf við uppbygginguna á eyjunni. Þar munu verða haldnar sýningar og stórviðburðir í tískuheiminum auk þess sem þar verður að finna öll helstu tískumerki heims á einum stað. Hotel Moda er lúxushótel sem reist verður á eynni með um 250 herbergjum og íbúðum og mun þjóna gestum eyjunnar. Búist er við því að fyrstu eignirnar á Isla Moda komi í almenna sölu á fjórða ársfjórðungi 2008.

Isla Moda tískueyjan passar mjög vel inn í þann lúxus lífsstíl sem einkennir "Heiminn", að sögn Hamza Mustafa, sem ber þann skemmtilega titil framkvæmdastjóri Heimsins (Director of The World). "Heimurinn" er eyjaklasi sem er í þróun við skagann sem Dubai stendur á í Persaflóa og er í raun eftirlíking af heiminum. Þar er byggðar eyjur sem að mynda kort af löndum heimsins og þær síðan boðnar til sölu. Þú gætir því keypt þér land. Heilt land! En þú verður að hafa hraðar hendur því um 90% af eyjunum eru seldar. Þú getur skoðað þetta betur í myndbandinu hér að neðan:

Að vísu er ekki hægt að kaupa Ísland, því þar er búið að planta stórri samgöngumiðstöð, Norður höfninni. Þannig að þú getur parkerað bátnum þínum á Íslandi og bara gert eins og Eiríkur, búið á Grænlandi.

Hjörtur (via Emirates Business 24/7)

Marglyttan, hýbýli ofansjávar og neðan

Giancarlo Zema er hönnuðurinn að þessu mannvirki sem hann kallar Jelly-fish 45 eða Marglyttan. Marglyttan er fljótandi bústaður sem rúmar auðveldlega 6-8 manns. Bústaðurinn er á 4 hæðum og 15 metrar í þvermál.

Marglyttan hentar vel við strendur, vötn og flóa með litríku og fjölbreyttu lífríki. Íbúarnir geta valið hvort þeir dvelja ofansjávar eða neðan en allar hæðirnar eru tengdar með hringstiga.

Á efstu hæðinni er vinnuherbergi, þeirri næst efstu eru svefnherbergi og á "jarðhæðinni" er eldhús og baðherbergi. Á neðstu hæðinni sem er neðansjávar er stofa með útsýni yfir sjávarbotninn í kring.

Giancarlo sækir innblástur sinn í lögun, léttleika og gegnsæi marglyttunnar. Það eru til ýmsir möguleikar á því að búa nálægt vatninu, en það er vandfundinn bústaður þar sem þú færð jafn sterka upplifun af sjávarlífinu og þessi. Sjálf byggingin er úr trefjaplasti á meðan neðansjávarkúpullinn er úr sérstyrktri akrýlblöndu. Verð fyrir svona bústað mun vera um 150 milljónir króna.

Hjörtur
(sjá sub-find.com)

Hefur þig langað að prófa að búa á staur?

Pólska arkitektastofan front architects hefur gert þá hugmynd mun meira aðlaðandi með hönnun húsa sem hann kallar Single Hauz. Húsin eru þannig hönnuð að auðvelt að koma þeim fyrir á staur og því hægt að koma þeim fyrir hvar sem er, út á engi, út í vatni, inn í borg, í brattri fjallshlíð.

Ef erfitt er að koma húsi fyrir vegna landrýmis, þá geturðu bara sett það á staur. Segjum að það eigi að rífa gamla húsið þitt af því að það eigi að leggja hraðbraut, en þig langar samt að búa áfram á sama stað. Þá geturðu bara reist nýtt hús á staur á umferðareyjunni milli akreina. Þá er þetta svona svipað og að búa í auglýsingaskilti.

Það gæti verið gaman að prófa ...

Hjörtur
(via Trendhunter)

Vistvænt sumarhús

Sumarhúsafrumskógurinn á Íslandi vex hratt en lítið ber á frumlegri hönnun (allar ábendingar um frumlega hönnun í íslenskum sumarhúsum eru vel þegnar). Þó eru alltaf einhverjir sem eru tilbúnir að fara nýjar óhefðbundnar leiðir. Daninn Søren Korsgaard hefur hannað sumarhús sem smíðað er úr tilbúnum einingum.

Húsið samanstendur af einum ferningi sem er 5x5 metrar að flatarmáli. Hver hlið samanstendur af stórri hurð þannig að hægt er að hafa ferninginn alveg lokaðan eða alveg opinn. Hver hurð er í tveimur lögum, annars vegar gleri og hins vegar svörtum vegg, sem gerir það að verkum að veggurinn safnar miklum hita og orku á köldum dögum. Síðan er hægt að opna hvort sem er bara glerið eða bara vegginn, allt eftir vindum, sól og óskum. Í miðju rýminu er svo stigi upp á eftir hæð þar sem er að finna svefnpláss fyrir fjóra.

Hjörtur

(nánari upplýsingar er að finna á vef Søren Korsgaard)
(via Equity Green)