Úr smiðju skaparans

Base jumparar stökkva af hæsta húsi í heimi

Burj Dubai, hæsti turn í heimi, var opnaður formlega á mánudaginn undir nýju nafni: Burj Khalifa. Turninn sem er 828 metra hár hýsir fjölda glæsiíbúða, skrifstofa og hótel sem hannað er af Giorgio Armani. Auk þess státar turninn af hæstu sundlaug í heimi (á 76 hæð) og hæstu mosku í heimi (á 128 hæð).

Turninn sem átti að vera eitt mesta stolt Dubai opnar þegar fasteignaverð hefur hrapað um 50% á innan við ári og undir nýju nafni, til heiðurs Khalifa, sjeikinum af Abu Dhabi sem bjargaði framkvæmdinni frá yfirvofandi gjaldþroti með því að dæla inn tugum milljarða dollara inn í ríkið.

Fyrr í dag settu tveir base jumparar nýtt heimsmet er þeir stukku úr toppi turnsins. Hægt er að upplifa með þeim stökkið í myndbandinu hér að neðan:

Visit msnbc.com for breaking news, world news, and news about the economy

Hægt er að lesa meira um opnun turnsins í msnbc.

Hjörtur

ps. Munið að gerast fans á Facebook!

Óhugnanlegt útsyni!

Þetta myndband er tekið í toppi hæstu byggingar í heimi - Burj Dubai í Dubai. Mér líður bókstaflega illa líkamlega að horfa á þetta.

Hjörtur
(via @lindapierre)

Finnurðu hjá þér hreiðurþörf á vorin?

Belgíski listamaðurinn Benjamin Verdonck gerir það alla veganna. Hann er mannlegur farfugl sem gerði sér hreiður utan á háhýsi í Brussels í Belgíu síðasta vor. Núna í vor endurtók hann leikinn og gerði sér hreiður utan á Weena Tower í Rotterdam í Hollandi sem hann bjó í, í fjóra daga.

Úr hreiðrinu sínu sem er hátt yfir hinu daglega götulífi getur hann stungið út gogginum og fylgst með vegfarendum þar sem þeir flýta sér til hinna daglega starfa mannfólksins. Ekki veit ég þó hvort hann veki nágrannana með fögrum söng á morgnana.

Hjörtur
(via Trendhunter)

Ólympíu-arkitektúrinn í Peking

Nú styttist óðum í Ólympíuleikana í Peking og hamast smiðir og iðnaðarmenn við að leggja loka hönd á margra, margra milljarða framkvæmdir við nýbyggingar í Ólympíuþorpinu og leikvanginum. Fyrir þá sem ekki náðu ólympíulágmarkinu þetta árið, þá birti ég hér nokkrar myndir af mannvirkjunum sem verið er að reisa:

og meira hér: Ég finn fleiri myndir þegar byggingarnar verða alveg tilbúnar. Hjörtur (via Christine Lu)

Eiffelturninn endurhannaður

Efnt var til hugmyndasamkeppni um hvernig væri hægt að bæta móttöku- og veisluaðstöðu í Eiffelturninum í tilefni af 120 ára afmæli turnsins. Sigurvegarinn var Serero arkitektastofan sem kom fram með nýstárlega hugmynd.

Svæðið efst í turninum, sem er um 280 fermetrar að stærð, verður stækkað um 300 fermetra með því að bolta kevlar vængi utan á núverandi svalir. Með því stækkar svæðið til muna og gestir geta betur notið útsýnisins allan hringinn í kringum turninn. Ég veit samt ekki hversu mikið ég gæti notið þessarar stækkunar. Mér finnst nógu erfitt að fara upp í turninn eins og hann er þó ég væri ekki að vaða út á einhverjar risastórar plastsvalir.

Stækkunin er aðeins tímabundin og engar varanlegar breytingar verða gerðar á þessu sköpunarverki Gustave Eiffel.

Hjörtur
(via Yankodesign)

500 hæða turn í byggingu í London

Á meðan hver fáránlega hái turninn á fætur öðrum sprettur upp af teikniborðinu við Persaflóa, hefur minna sést til slíkra ofurhýsa í gömlu Evrópu. Nú er hins vegar von á breytingu þar á.

Í Austurborginni í London er nú verið að hefjast handa við bygginu 500 hæða turns sem mun verða míla á hæð, eða um 1.600 metrar. Turninn getur hýst allt að 100.000 manns og í honum verða skólar, sjúkrahús, verslunarkjarnar og fleira. En það sem gerir hann sérstakan eru risastór göt sem er að finna í turninum og verða opin græn svæði. Þar verður plantað trjám og gróðri og leitast við að skapa sömu tilfinningu og litlir almenningsgarðar. Bara 1.000 metrum ofar.

Hjörtur

Fjarstýrðar litasýningar á háhýsi

Ólíkt flestum öðrum skýjakljúfum sem við höfum tekið til umfjöllunar hér á síðunum, þá er þessi ekki í Sameinuðu arabísku furstadæmunum og ekki einu sinni í New York. Þessi skýjakljúfur er staðsettur í Brussel í Belgíu.

Turn Dexia bankans í Brussel er með 4.200 glugga sem hver og einn er útbúinn með LED- ljósum. Þessum ljósum er síðan hægt að stýra með fjarstýringu þannig að í raun er turninn eitt risastórt sýningaskilti.

Frá því að lokið var við húsið í lok síðasta árs, hafa verið stöðugar ljósasýningar síðan. Þið getið séð sýnishorn hér að neðan.

Hjörtur
(via Trendhunder)

Burj Mubarak Al-Kabir verður yfir kílómeters hár skýjakljúfur

Það geysar stríð við Persaflóa. Það er stríð á milli ofurhuga byggingamógúla í smáríkjunum við flóann um hver geti byggt stærstu, mestu og flottustu skýjakljúfana. Nýjasta ofurbyggingin á teikniborðinu er Burj Mubarak Al-Kabir turninn sem reisa á í Madinat Al-Hareer eða Silkiborginni í Kúveit. Þessi turn á að verða 1001 meter á hæð og skáka þar með Burj Dubai turninum sem verið er að reisa í Dubai og er orðin hæsta bygging í heimi. Ekki er búið að gefa út formlega yfirlýsingu um hve hár sá turn á að vera þegar byggingu hans líkur en búist er við að það verði um 800 metrar.

Madinat Al-Hareer á að taka 25 ár í byggingu ef af verkefninu verður. Meðal þess sem byggt verður er stór flugvöllur, brú yfir í Kúveit borg handan við flóann og fleira en hönnunin miðast öll við að skapa vistvæna borg.

Hjörtur
(via Trendhunter.com)

Blár himinn í New York

Þegar maður lítur upp í New York þá sér maður lítið af himni en þeim mun meira af steypu, stáli og gleri. Arkitektinn Bernard Tschumi ákvað að bæta úr þessu. Eftir tvö og hálft ár sem hafa farið í hönnun, áætlanagerð og byggingu er nýr íbúðaturn risinn á Lower East Side sem hann hannaði. Það sem gerir þennan turn frábrugðinn öllum hinum er meðal annars sú staðreynd að hann er blár. Með mósaíkmynstri úr mismunandi bláum og svörtum einingum verður turninn blárri eftir því sem ofar dregur, líkt og himininn.

Að innan ræður einfaldleikinn ríkjum í stílhreinni hönnun Tschumis. Á gólfum er bambus eða pálmatré, áhöld eru úr stáli og flísar úr náttúrusteini.

Hjörtur
(via Yankodesign.com)

Nýtt 7 stjörnu hótel í Dubai

Ímyndunaraflið fær enn að leika lausum hala í Dubai og nýjasta afurðin af teikniborðinu er þetta glæsilega 7 stjörnu hótel. Þetta 28 hæða lúxushótel verður staðsett 300 metra fyrir utan strönd Dubai og einungis hægt að komast þangað á þyrlu eða báti (takið eftir staðsetningunni á þyrlupallinum).

Hótelið mun innihalda 438 lúxussvítur, spa, listasafn og neðansjávar veitingarstað með útsýni. Til að toppa þetta eru efstu tvær hæðirnar fiðrildafrumskógur með litríkum hitabeltis fiðrildum.

Þessi einstaka hönnun hefur enn ekki fengið nafn en er stundum kölluð trektin. Mér finnst "fiðrildið" viðeigandi og sé það fyrir mér upplýst á kvöldin með LED ljósum í klæðningunni í ýmsum mismunandi fiðrildamynstrum.

Hjörtur
(via Building.co.uk)