Úr smiðju skaparans

Uggi - þurrkaðir þorsklampar

Í Leifsstöð á Keflavíkurflugvelli stendur nú yfir sýning á nýstárlegum lömpum, Ugga lömpum. Þessir sérstöku lampar eru gerðir úr þurrkuðum þorski og eru því mjög þjóðlegir, á sinn nýstárlega hátt.

Lamparnir sem eru hugverk Fanneyjar Antonsdóttur og Daggar Guðmundsdóttur hafa vakið mikla athygli og verið sýndir á sýningum víða um heim, þar á meðal Guggenheim safninu í Berlín, FNAC í París, The National Museum for Women in Arts í Washington DC og the International Design Biennale í St. Etienne.

Þorsklamparnir eru allir handunnir. Fiskarnir eru teknir og roðflettir. Roðið er síðan fært í upprunalega mynd og þurrkaðir. Sjálfur fiskurinn heldur áfram í gegnum vinnsluferlið og endar sem fiskibolla á fjarlægum diski.

Á sýningunni í Leifsstöð er búið að koma fyrir 25 þorsklömpum og mun hún standa yfir þar til 8. september. Nánari upplýsingar um Ugga lampana er að finna á uggi-lights.com.

Hjörtur

Flögrað um rússaperur

Hung Ming Chen eða Hommin eins og hann kallar sig, hefur hannað skemmtilega og auðvelda lausn til að flikka upp á rússaperuna. Fuglinn er skorinn út með leiserskera. Með því að skella honum á rússaperuna má gjörbreyta áhrifunum sem hún hefur á herbergið og umhverfið. Í staðinn fyrir nakið notagildið er búið að hylja það með fagurfræðilega útskornum fugli.

Hjörtur
(via Core77.com)

Eldhús hannað af Porsche

Hönnuðir Poggenpohl og Porsche leiddu saman hesta sína til þess að hanna eldhús fyrir karlmenn. Nú hafa þeir birt myndir af eldhúsunum sem eru stílhrein, notendavæn og sportlega hönnuð svo að þau geti sómað sér vel í piparsveinaíbúðinni.

Eldhúsin eru þannig hönnuð að þau eru samsett úr mismunandi einingum sem festar eru á álgrindur og bjóða þar af leiðandi upp á mikla möguleika á mismunandi samsetningum. Hönnunin miðar að því að búa til eldhús sem er sérstaklega hannað fyrir karlmenn. Eldhús sem er jafnframt samkomustaður heimilisins með innbyggðum hljómflutningstækjum.

Sterkasta einkenni eldhússins eru álrammar af mismunandi breiddum og gleri sem er málað að aftan og kemur ýmist með satínáferð eða glans. Sem andstæður er hægt að fá framhliðar úr við og er boðið upp á rekavið eða dökka eik. Viðurinn myndar kósý stemningu innan um tæknilegan og nýstárlegan rammann. Lýsing er ekki síður áhrifamikil í þessari hönnun til að skapa réttu stemninguna.

Næsta vor munu sýningareintök hinnar nýju línu koma á markað í sýningarsölum Poggenpohl um allan heim. Eldhúsin verða svo afgreidd viðskiptavinum frá og með næsta sumri.

Hjörtur
(via Trendhunter.com)

Munu eldhús heyra sögunni til?

Hafið þið innréttað eldhús nýlega? Þau eru fljót að fara í milljónina. Og ekkert svo lengi að ná í tvær. Í miðborgum stórborganna eru eldhús hins vegar ekki mikið notuð. Þrátt fyrir hækkandi verð á veitingastöðum í stórborgum heimsins eru sífellt fleiri sem borða úti. Hinar hefðbundnu miðbæjarrottur borga eins og London og New York borða ekki lengur heima. Að meðaltali borðar hver Lundúnabúi úti tvisvar í viku. Um leið hækkar verðið á fermetranum í miðbænum og krafan um betri nýtingu eykst. Stór eldhús eiga því ekki heima í litlu miðbæjaríbúðunum, og nú virðist svo komið að fólk er farið að henda út eldhúsunum eins og þau leggja sig. Og það er ekki til þess að setja alveg ný eldhús, heldur einfaldlega til þess að losa sig við þau.

"Eldhús eru að deyja út í London. Sem annað en staður til að bera fram drykki áður en farið er út að borða, þá eru þau ekki notuð mikið." segir Richard Adams , innanhúsarkitekt í London (sem við sjáum hér í "eldhúsinu sínu" sem er skrifstofan hans) við "The Telegraph". "Ég hef falið litla hellu, ofn og örbylgjuofn í stórum, hvítum skápum í stofunni. Fullkomið fyrir kokteila, en ekki kvöldmat."

Spurning hvort við förum að sjá eldhús, gömul sem ný, í tunnunum í 101.

Hjörtur
(The Telegraph via Trendhunter)

Skugginn lýgur aldrei ...

... eða hvað? Stundum er hægt að lesa allt aðra hluti út úr skugganum heldur en fyrirmyndinni og mikil kúnst að ná stjórn á skuggamyndinni. Sumum hefur þó tekist það eins og Lukku Láka sem var svo snöggur að draga byssuna að hann náði að skjóta sinn eigin skugga áður en sá var kominn með hendina á byssuna.

Munchausen er hönnuður í París sem hannaðar límmiða. Þessir límmiðar eru skreytingar fyrir heimilið eins og er að verða vinsælt núna og hægt að fá t.d. í Ikea. Þessir límmiðar ganga þó skrefi lengra því að þeir eru skuggar án fyrirmyndar. Með þeim er hægt að draga fram það sem rýmið GÆTI haft upp á að bjóða, í stað þess að draga fram það sem það HEFUR upp á að bjóða.

Sem dæmi um frábæra notkun á þessum ódýru límmiðum sem fást í búðinni Ugly Home í París, er þessi ódýra kristalsljósakróna. Hún er kannski ekki nema skugginn af raunverulegri kristalsljósakrónu, en hún gefur rússaperunni óneitanlega mun tignarlegra yfirbragð.

Munchausen er líka mjög viðeigandi nafn fyrir slíkan hönnuð.

Hjörtur
(via Trendhunter.com)