Úr smiðju skaparans

Uggi - þurrkaðir þorsklampar

Í Leifsstöð á Keflavíkurflugvelli stendur nú yfir sýning á nýstárlegum lömpum, Ugga lömpum. Þessir sérstöku lampar eru gerðir úr þurrkuðum þorski og eru því mjög þjóðlegir, á sinn nýstárlega hátt.

Lamparnir sem eru hugverk Fanneyjar Antonsdóttur og Daggar Guðmundsdóttur hafa vakið mikla athygli og verið sýndir á sýningum víða um heim, þar á meðal Guggenheim safninu í Berlín, FNAC í París, The National Museum for Women in Arts í Washington DC og the International Design Biennale í St. Etienne.

Þorsklamparnir eru allir handunnir. Fiskarnir eru teknir og roðflettir. Roðið er síðan fært í upprunalega mynd og þurrkaðir. Sjálfur fiskurinn heldur áfram í gegnum vinnsluferlið og endar sem fiskibolla á fjarlægum diski.

Á sýningunni í Leifsstöð er búið að koma fyrir 25 þorsklömpum og mun hún standa yfir þar til 8. september. Nánari upplýsingar um Ugga lampana er að finna á uggi-lights.com.

Hjörtur

Marglyttuljósakróna

Útlit og lögun marglyttna hefur heillað marga hönnuðina og við höfum áður séð húsbát sem sótti innblástur í þessa furðuveru hafsins.

Medusa ljósakrónan er annað dæmi um vel heppnaða hönnun sem sækir innblástur í þessa heillandi veru. Ljósakrónan sem er hönnuð af Géraldine Gonzales sem er samansett úr krystal-pappír (sérstökum plasthúðum pappír) og vírum, er upplýst með LED ljósum og kastar mjög sérstakri birtu á rýmið í kring, auk þess marglyttulögunin skapar sérstaka stemningu í herberginu.

Hjörtur
ps. ef þið viljið panta eitt stykki, þá getið sent Géraldine póst á gonzaldine (at) yahoo.fr. Verðið er $9.100

Pizzaskeri mótorhjólatöffarans

Breytt, handsmíðuð og stílfærð mótorhjól njóta mikilla vinsælda um þessar mundir. Listamaðurinn Frankie Flood tók þessa bylgju skrefinu lengra og sótti í hana innblástur við hönnun á pizzaskerum.

Frankie hefur hannað fimm mismunandi útgáfur af þessu einfalda tæki sem eru mjög listrænar og stílfærðar. Pizzaskerarnir bera nöfn eins og Easy Rider, Mantis, Psycho Pizza Cadillac, Pizza for life og Phatboy. Þetta eru ekki pizzaskerar. Þetta er lífsstíll :)

Hjörtur (via Trendhunter.com)

Einn fyrir teboðið

Sorapot teketillinn er enginn venjulegur teketill. Hann svo sem gerir ekkert sérstakt, hann bara lítur allt öðruvísi út. Hann er eitt af þessum meistarastykkjum þar sem einhver hversdagslegur hlutur er tekinn og hannaður upp á nýtt frá grunni. Joey Roth ákvað að endurhanna teketilinn og þetta er afraksturinn.

Hann er kannski ekkert mjög praktískur en hann virkar og hann lítur mjög vel út. Hann ætti að geta stolið athyglinni í hvaða teboði sem er. Eina vandamálið er að hann kemur ekki á markað fyrr en í febrúar á næsta ári. En ekki örvænta. Þangað til geturðu skellt þér í teboð Sorapot teketilsins með því að skrá þig sem vinur á persónulegri síðu Sorapot á Facebook.

Hjörtur
(via Core77)

Sveppir sem lýsa upp gráan hversdagsleikann

og þeir eru meira að segja löglegir. Þessir sveppir eru hannaðir af Simon Duff og eru þeirrar náttúru gæddir að lýsa. Undir hattinum eru LED-ljós sem geta skipt litum og gefa frá sér súrrealíska birtu. Hægt er að hafa hvern og einn stakan eða raða þeim saman í hnapp til þess að ná fram undarlegri áhrifum. Hinn ástralski hönnuður tók psýkadelíska sveiflu með Grateful Dead í stereóinu þegar hann barðist við að ná fram réttum áhrifum - og það tókst.

Ég vil svona sveppi á borðið mitt!

Hjörtur
(via Core77.com)

Skál hinna föllnu

Þessi frumlega skál var hönnuð til að heiðra söguna. Hún er búin til úr bræddum tindátum (eða plastdátum), annars vegar frönskum landgönguliðum og hins vegar bresku stórskotaliði. Skálin var gerð til minningar um hina föllnu hermenn í orrustunni við Waterloo.

Hjörtur

Eldhús hannað af Porsche

Hönnuðir Poggenpohl og Porsche leiddu saman hesta sína til þess að hanna eldhús fyrir karlmenn. Nú hafa þeir birt myndir af eldhúsunum sem eru stílhrein, notendavæn og sportlega hönnuð svo að þau geti sómað sér vel í piparsveinaíbúðinni.

Eldhúsin eru þannig hönnuð að þau eru samsett úr mismunandi einingum sem festar eru á álgrindur og bjóða þar af leiðandi upp á mikla möguleika á mismunandi samsetningum. Hönnunin miðar að því að búa til eldhús sem er sérstaklega hannað fyrir karlmenn. Eldhús sem er jafnframt samkomustaður heimilisins með innbyggðum hljómflutningstækjum.

Sterkasta einkenni eldhússins eru álrammar af mismunandi breiddum og gleri sem er málað að aftan og kemur ýmist með satínáferð eða glans. Sem andstæður er hægt að fá framhliðar úr við og er boðið upp á rekavið eða dökka eik. Viðurinn myndar kósý stemningu innan um tæknilegan og nýstárlegan rammann. Lýsing er ekki síður áhrifamikil í þessari hönnun til að skapa réttu stemninguna.

Næsta vor munu sýningareintök hinnar nýju línu koma á markað í sýningarsölum Poggenpohl um allan heim. Eldhúsin verða svo afgreidd viðskiptavinum frá og með næsta sumri.

Hjörtur
(via Trendhunter.com)

Vespan sem endurfæddist sem lampi

Þó þetta sé ekki alveg nýtt af nálinni, þá er þetta mjög skemmtileg nýting á "dánum" nytjahlutum. Lampar Lamponis eru vespur sem endurfæðast sem lampar. Vespur eru reyndar ekki eina hráefnið, heldur notar hann líka t.d. gamla bensíndælu frá Shell. Myndirnar tala sínu máli:

Þið getið séð fleiri lampa á vef Lamponis.

Hjörtur
(via Core77.com)

Lauf ljós!

Þessi lampi sem er hannaður af Yves Behar hlaut Spark verðlaunin. Lampinn er samsettur úr tveimur "laufum", öðru sem er fóturinn og hitt sem er lampinn. Kveikt er á ljósinu með því að strjúka fingri eftir rauf í standi ljósins og þar er hægt að blanda heitu og köldu ljósi til að skapa réttu stemninguna. Lýsinguna gefa 20 díóður sem nota einungis 8-9 wött, eða um 40% af því sem hefðbundin flúorpera gerir, og endist í 60.000 stundir eða 8 sinnum lengur en hefðbundnar perur.

Laufin tvö geta snúist. Það neðra í 180 gráður og það efra í 210 gráður þannig að hægt er nota lampann til að fá sterka beina lýsingu eða daufa óbeina stemningslýsingu. Lampinn kemur í átta mismunandi litum, svörtu, hvítu, rauðu, nikkel og burstuðu áli.

Í niðurstöðu dómnefndarinnar segir:

"The real magic behind LEAF extends beyond the novel use of materials and new technologies. By translating and responding to the human touch, LEAF creates a compelling and very personal way to interact with and experience the art of light."

Hjörtur

(via Spark awards)

Skothylkið sem gerðist blómavasi

Hefurðu stundum velt því fyrir þér hvað hafi orðið um vopnabúr Saddams Hussein? Hér gæti verið komin skýringin.

Rem vasinn byggir á þeirri hugmynd að nota morðvopn sem almenna neysluvöru, eitthvað sem þú kaupir út í búð eins og hvaða annan húsbúnað eða hönnun. Vasinn er stækkuð mynd af 6,8 mm Remington skothylki, hannað af Breta búsettum í New York, Robert Langhorn. Vasinn virkar einföld nútímaleg hönnun í fyrstu en undirliggjandi er formið sem við öll þekkjum sem eitthvað spennandi og ógnandi sem skapar þannig ákveðna togstreitu.

Hjörtur

(via Yankodesign.com)