Úr smiðju skaparans

Uggi - þurrkaðir þorsklampar

Í Leifsstöð á Keflavíkurflugvelli stendur nú yfir sýning á nýstárlegum lömpum, Ugga lömpum. Þessir sérstöku lampar eru gerðir úr þurrkuðum þorski og eru því mjög þjóðlegir, á sinn nýstárlega hátt.

Lamparnir sem eru hugverk Fanneyjar Antonsdóttur og Daggar Guðmundsdóttur hafa vakið mikla athygli og verið sýndir á sýningum víða um heim, þar á meðal Guggenheim safninu í Berlín, FNAC í París, The National Museum for Women in Arts í Washington DC og the International Design Biennale í St. Etienne.

Þorsklamparnir eru allir handunnir. Fiskarnir eru teknir og roðflettir. Roðið er síðan fært í upprunalega mynd og þurrkaðir. Sjálfur fiskurinn heldur áfram í gegnum vinnsluferlið og endar sem fiskibolla á fjarlægum diski.

Á sýningunni í Leifsstöð er búið að koma fyrir 25 þorsklömpum og mun hún standa yfir þar til 8. september. Nánari upplýsingar um Ugga lampana er að finna á uggi-lights.com.

Hjörtur

Ljósakróna í kolkrabbalíki

Ljósakrónur geta tekið á sig ýmsar myndir, ekki hvað síst þegar skuggar og ímyndunarafl leggja lóð sín á vogaskálarnar. Adam Wallcavage hefur hannað ljósakrónur þar sem  armar krónunnar hafa breyst í arma kolkrabba.

Krónurnar hanga yfir manni eins og risastórir kolkrabbar sem sveima um loftið og skuggarnar bæta enn á áhrifin. Krónurnar er hægt að nálgast í galleríi Jonathan LeVine og verðið er á bilinu 4-18.000 dollarar.

 

Hjörtur

Smart búr fyrir hipp hænur

Hefur þig alltaf dreymt um að geta haft hænur vappandi um í bakgarðinum og sótt þér ferskt egg á hverjum morgni? Bandaríska fyrirtækið Omlet hefur hannað ný, smart hænsnahús með öllu því sem hipp og kúl borgarhænur gætu óskað sér.

Húsin sem þeir kalla eglu eru braggalaga og með varpstöng úr tré og rúmgóðum eggjakassa. Auk þess er hænsnahúsið gert úr tvöföldum einangrunarveggjum og með góða loftræstingu til að koma í veg fyrir raka. Hænurnar ætti því að eiga auðvelt með að halda á sér hita á vetrum og svala á sumrum.

   

Húsið er auðvelt að þrífa og viðhalda og kemur í fimm tískulitum, mosagrænum, bleikum, bláum, rauðum og appelsínugulum. Á síðu Omlet (sem þýðir í raun eggjakaka) er að finna leiðbeiningar um hænsnahald fyrir þá sem vilja rækta sín eigin "hamingjuegg". Omlet býður einnig upp á húsin sem kanínuhús og fyrir fleiri gæludýr.

Hjörtur
(via Trendhunter)

Vindknúin sæþota sem getur kafað

Nereus er sæþota sem þú getur skemmt þér tímunum saman á án þess að eyða krónu í bensín. Nereus er nefnilega vindknúinn. Sæþotan er fest í stóran flugdreka sem dregur hana áfram og síðan stýrirðu þotunni eftir haffletinum með fótstigum. Þú getur jafnvel kafað á henni þar sem flugdrekinn dregur hana áfram á meðan þú ert ofan í vatninu. Þegar kafað er á sæþotunni eru notuð handföng til þess að stýra uggum neðan á þotunni.

       

Þessi sérstaka sæþota er hugverk Mathias Koehler.

Hjörtur
(via Trendhunter)

Hús sem storka þyngdarlögmálinu

Meðfygljandi hús eiga það öll sameiginlegt að storka náttúrulögmálunum, og þá fyrst og fremst þyngdarlögmálinu. Þau líta út fyrir að geta ekki verið rétt.

Háa húsið er 13 hæða timburhús og þó ekki fullklárað. Það var í eigu rússnesks gangsters sem var stungið inn áður en hann náði að ljúka húsinu. En það náði þó að verða hæsta timburhús í heimi.

Öllu ótrúlegra er þetta hús frá Úkraínu sem stendur allt á einum stólpa sem er undir öðrum endanum á því. Og nei, það er ekki búið að eiga við myndina í Photoshop.

Hjörtur

Gamlar bjórdósir verða að fallegum fiðrildum

Það eru ekki bara ljótar lirfur sem geta breyst í falleg fiðrildi. Ljótar gamlar kramdar bjórdósir geta það líka. Paul Villinski hefur sýnt það og sannað með listilega vel útfærðum fiðrildum sem hann hefur skapað úr dósunum.

Þetta er ein leið til þess að endurnýja dósirnar og að öllum líkindum er hægt að fá meira en 10 kr. fyrir hverja dós ef þú býrð til listaverk úr henni sem þú getur selt. Þú getur því slegið þrjár flöskur í einu höggi. Endurvinnur ruslið, fegrar umhverfið og nærð þér í nokkrar vel þegnar aukakrónur í verðbólgunni.

      

Hjörtur

Eiffelturninn endurhannaður

Efnt var til hugmyndasamkeppni um hvernig væri hægt að bæta móttöku- og veisluaðstöðu í Eiffelturninum í tilefni af 120 ára afmæli turnsins. Sigurvegarinn var Serero arkitektastofan sem kom fram með nýstárlega hugmynd.

Svæðið efst í turninum, sem er um 280 fermetrar að stærð, verður stækkað um 300 fermetra með því að bolta kevlar vængi utan á núverandi svalir. Með því stækkar svæðið til muna og gestir geta betur notið útsýnisins allan hringinn í kringum turninn. Ég veit samt ekki hversu mikið ég gæti notið þessarar stækkunar. Mér finnst nógu erfitt að fara upp í turninn eins og hann er þó ég væri ekki að vaða út á einhverjar risastórar plastsvalir.

Stækkunin er aðeins tímabundin og engar varanlegar breytingar verða gerðar á þessu sköpunarverki Gustave Eiffel.

Hjörtur
(via Yankodesign)

Reiðhjól sem eru listasmíði

Hönnun á heima alls staðar. Í listamannahverfinu Soho í New York er að finna listamann og reiðhjólasmið sem virkilega leggur metnað og hugsun í reiðhjólin sín út frá fagurfræðilegum sjónarmiðum. Reiðhjólin eru í raun skúlptúrar. Josh Hadar heitir nytjalistamaðurinn sem smíðar þessa nýstárlegu járnhesta.

Meðal þess sem Josh notar í reiðhjólasköðun sinni eru málmar eins og nikkel, gull og ál, gler og í hnakkana notar hann álroð (það er að segja af fiskinum). En hjólin eru ekki fyrir hvern sem er þar sem verðimiðinn á þeim er á bilinu frá 12.000 dollurum til 35.000. Ekki alveg reiðhjólið fyrir meðalnámsmanninn en þú færð það alveg sérsniðið fyrir þína stærð.

Hjörtur
(via Trendhunter)

Byggðu sér kuðung til að búa í

Ungt par með tvö börn í Mexíkó borg, var orðið þreytt á hefðbundnum húsum. Þau vildu náttúrulegra umhverfi og fólu Senosiain Arquitectos verkefnið. Eftir óteljandi breytingar og prófanir varð niðurstaðan að byggja Nautilus húsið, kuðungslaga íbúðarhús.

Hugmyndin er að íbúarnir séu eins og sniglar í húsi sínu með náttúrulegt flæði úr einu rými yfir í annað. Þar sem þrjár hliðar hússins snúa að háum byggingum opnast húsið til vesturs með útsýni til fjallanna. Látum myndirnar tala:

Hjörtur
(worldarchitecturenews.com via Trendhunter.com)

Pizzaskeri mótorhjólatöffarans

Breytt, handsmíðuð og stílfærð mótorhjól njóta mikilla vinsælda um þessar mundir. Listamaðurinn Frankie Flood tók þessa bylgju skrefinu lengra og sótti í hana innblástur við hönnun á pizzaskerum.

Frankie hefur hannað fimm mismunandi útgáfur af þessu einfalda tæki sem eru mjög listrænar og stílfærðar. Pizzaskerarnir bera nöfn eins og Easy Rider, Mantis, Psycho Pizza Cadillac, Pizza for life og Phatboy. Þetta eru ekki pizzaskerar. Þetta er lífsstíll :)

Hjörtur (via Trendhunter.com)