Úr smiðju skaparans

Með þakgarð á fjórum hæðum!

MEERA húsið ögrar hömlum umhverfisins með því að vera margþætt græn vin í þröngu stórborgarumhverfi. Staðsett á eyjunni Sentosa í Singapore þurftu hönnuðurnir að finna leiðir til að skapa grænt vistvænt umhverfi á örlitlum byggingarbletti með nágrannana þétt upp við húsið. Til að skapa næði voru reistir veggir meðfram lóðunum til hliðar við húsið en um leið reynt að skapa opið og bjart hús með aðlaðandi náttúrulegu umhverfi. 

Húsið er fjögurra hæð og ofan á hverri hæð er þakgarður, ekki bara með grasi eða lyngi heldur jafnvel heilu trjánum og runnunum.

Í miðju hússins er stigaop sem hefur það hlutverk að hleypa bæði birtu og sjávargolunni niður á allar hæðir hússins. 

Lýsing spilar líka stórt hlutverk í að skapa réttu stemninguna bæði inn í húsinu og utan þess þegar skyggja tekur. Takið eftir því hvernig undirlýstur gróðurinn býr til alveg ný munstur í loft og á veggi með skuggum sínum.

Sundlaugin verður á sama hátt sterkur hluti af heildinni með því að hafa heilan vegg á neðstu hæðinni sem hluta af sundlauginni sjálfri. Sundlaugin er ekki hefðbundin flísalögð laug heldur þaking fjörugrjóti sem gefur henni sterkan náttúrulegan blæ og skapar þannig einstakt útsýni og upplifun af umhverfinu innan úr húsinu.

Það voru GUZ Architects sem hönnuðu húsið. Ljósmyndirnar tók Patrick Bingham Hall.

Hjörtur
(via Freshome) 

Tæknivæddar lúxusskrifstofur

Cybertecture Egg er ný hönnun skrifstofubyggingar sem á að rísa á Indlandi. Bygging er mjög óhefðbundin í útliti en hún er í laginu eins og egg og grunnhugmyndin er að þetta sé hin gagnvirka hönnun bygginga í framtíðinni, arkitektúr sem fyrirtækið kallar Cybertektúr. Enda kallar fyrirtækið sig Cybertecture International.

Byggingin sem er að rísa í Mumbai á Indlandi verður ein tæknivæddasta bygging heims. Hún verður umhverfisvæn en ofan á byggingunni verður 32.000 fermetra garður. Byggingin framleiðir sína eigin orku með vindmyllum og sólarrafhlöðum sem eru efst á byggingunni. Byggingin er jafnframt knúin sérstökum vatnshreinsibúnaði sem endurnýtir vatn til að skola niður úr klósettum og vökvunar á gróðri.

   

Umhverfið er ekki það eina sem skiptir máli, heldur líka heilsa þeirra sem vinna þar. Auk þess að vera búin öllum mögulegum lúxus til að skapa best vinnuumhverfi, eru baðherbergin með útbúnaði til þess að fylgjast með  m.a. þyngd og blóðþrýstingi.

Reiknað er með að byggingin verði tilbúin árið 2010.

 

Hjörtur
(via Trend Hunter)

Hjólabarðar í nýju hlutverki

Þegar þú hefur ekið á dekkjunum þínum í nokkur ár, er kominn tími til að fá sér ný. Spurningin er þá hvað verði um gömlu dekkin. Víða er þeim safnað saman í gríðarstór dekkjafjöll og ef kviknar í slíkum fjöllum spúa þau eiturefnum út í andrúmsloftið án þess að við nokkuð verði ráðið.

Carl Menary hefur hannað athygliverð sæti eða bekki sem eru búin til úr endurunnum hjólbörðum. Í þessu tilfelli er afurðin trú uppruna sínum og augljóst að um hjólbarða sé að ræða. Bekkina má nota hvort sem er innan dyra eða utan enda hafa vatn og vosbúð engin áhrif á sætin.

Carl Menary kallar þessa hugvitsamlegu endurnýtingu á hjólbörðum "Re-tyre".

Hjörtur
(via Yankodesign)

Einskis manns land: arkitekt hannar lausn á Palestínudeilunni

Vatn er undirstaða alls lífs og tilefni átaka víða um heim. Í deilu Palestínumanna og Ísraela skiptir vatn miklu máli því aðgangur að ferskvatni er mjög takmarkaður í þeim heimshluta.

Phu Hoang arkitektastofan í New York lagði fram nýstárlega tillögu sem leyst gæti hluta af þeim pólitíska, efnahagslega og vistfræðilega vanda sem blasir við íbúum svæðisins. Um er að ræða þrjár tilbúnar eyjar í Dauðahafinu sem bjóða upp á dægradvöl, ferðamannaiðnað, orkuframleiðslu og vatnsframleiðslu.

Eyjarnar þrjár myndu tilheyra hlutlausu svæði utan við lögsögu nágrannaríkjanna. Ein eyjan er hugsuð til vatnsframleiðslu með sólartjörnum, sérstökum búnaði sem vinnur vatn úr rakanum í loftinu, vatnshreinsitönkum og hreinsibúnaði. Hinar eyjarnar tvær eru annars vegar eyja til framleiðslu sólarorku, bæði til eigin nota og til útflutnings og svo fyrir ferðamenn.

Hugmyndin hefur fengið mikla athygli enda nýstárleg hugmynd hér á ferð. Það er hins vegar auðvelt að ímynda sér að erfitt sé að fá samstöðu ríkjanna um eitthvað eins og þetta, eins og með flest annað sem þjóðirnar reyna að mynda samstöðu um. En mjög áhugaverð hugmynd engu að síður.

Hjörtur
(via Inhabitat)

Reiðhjól sem eru listasmíði

Hönnun á heima alls staðar. Í listamannahverfinu Soho í New York er að finna listamann og reiðhjólasmið sem virkilega leggur metnað og hugsun í reiðhjólin sín út frá fagurfræðilegum sjónarmiðum. Reiðhjólin eru í raun skúlptúrar. Josh Hadar heitir nytjalistamaðurinn sem smíðar þessa nýstárlegu járnhesta.

Meðal þess sem Josh notar í reiðhjólasköðun sinni eru málmar eins og nikkel, gull og ál, gler og í hnakkana notar hann álroð (það er að segja af fiskinum). En hjólin eru ekki fyrir hvern sem er þar sem verðimiðinn á þeim er á bilinu frá 12.000 dollurum til 35.000. Ekki alveg reiðhjólið fyrir meðalnámsmanninn en þú færð það alveg sérsniðið fyrir þína stærð.

Hjörtur
(via Trendhunter)

Mun Holland fljóta?

Eins og þið eflaust vitið eru 20% af hollensku landi fyrir neðan sjávarmál. Þetta er ákveðið áhyggjuefni þegar ljóst er að hitastig jarðar fer hækkandi, jöklar bráðna og yfirborð sjávar hækkar. Hvað verður þá um Holland? Fer allt Holland á kaf?

Hollendingar hafa ný sýnt það að þeir eru ekki hræddir við vatn. Í stað þess að líta á hækkandi vatnsyfirborð sem ógn, þá er það bara nýtt tækifæri til nýsköpunar og framþróunar. Hollendingar eru farnir að þróa hús sem fljóta og á teikniborðinu eru garðar, vegir og heilu þorpin sem geta flotið ef til flóða kemur.

Húsin eru byggð á sérstökum undirstöðum sem eru flekar á stultum. Stulturnar eru þannig gerðar að þær geta lengst ef vatnsyfirborðið hækkar og húsið fer að fljóta. Allar raflagnir og niðurföll eru hönnuð með þetta í huga. Ofan á flekanum er svo hægt að byggja hús, setja upp garða, sundlaugar eða annað.

Í Amsterdam er nú verið að hanna heilt hverfi með um 12.000 íbúðum sem er byggt á þessari hugmynd. Hluti af hverfinu er byggt út í vatn og allt hverfið er þannig að það getur flotið ofan á vatni.

"Núna er rétti tíminn. Út af loftslagsbreytingum, vegna sögu Al Gore, vegna New Orleans, vegna fjármagnsins sem er í boði, eru allir að bíða eftir nýjum uppfinningum" segir Olthuis, einn af arkitektunum á bak við verkefnið.

Hjörtur

(þú getur lesið meira á npr.org)

Ræsishlemmar þurfa ekki að vera ljótir

Fallegir hnappar? Þessir "hnappar" eru í raun ræsishlemmar frá japönsku borgum. Það er nefnilega þannig að ræsishlemmar njóta ekki sanngjarnar virðingar í veröldinni. Fólk traðkar á þeim, keyrir yfir á, hrækir á þá og sýnir þeim enga athygli á nokkurn hátt. En hlemmarnir eiga betra skilið. Þeir eiga skilið að fá að vera hluti af fallegri götumynd, sýna einkenni bæjarins sem þeir tilheyra, segja sögur.

Hér að ofan getur að líta 4 sýnishorn af glæsilega hönnuðum ræsishlemmum frá Japan. Þeir eru af Okachin ræsishlemmamyndasafninu sem þið getið skoðað nánar.

Hjörtur

Byrjum á því að drepa arkitektana ...

Ljósmyndarinn Danny Lyon var beðinn um aðstoð við að hanna borg. Hann var upp með sér. Í gamla daga var þetta hlutverk keisara og konunga. Þannig að hann kom með verkáætlun í tíu þrepum sem sést hér að neðan (smellið á myndina til að sjá hana stækkaða upp). Myndin er úr bókinni "Block by Block: Jane Jacobs and the Future of New York."

Já, hann er ekkert að skafa utan af því. Ég er ekki viss um að þessi aðferðafræði hans rati inn í almennar kennslubækur í skipulagsfræðum neitt á næstunni.

Hjörtur
(via New York Times)

Grænt einingahús hlýtur Spark verðlaunin

Marmol Radziner húsin hlutu Spark verðlaunin fyrir arkitektúr. Þetta eru einingahús sem koma í fullkláruðum einingum, þ.e. með innréttingum, klæðningum, gólfefnum og rafmagnstækjum sé þess óskað. Öll efni sem eru notuð eru endurunnin eða umhverfis vottuð. Grunnbyggingarefnið er endurunnið stál en einnig eru notaðir "Structural Insulated Panesl (SIPs), FSC-vottaður viður, "Low VOC Green Seal" málning, sólarrafhlöðður o.fl. Gluggarnir eru ná frá gólfi upp í loft sem gefur mikla og góða náttúrulega lýsingu og síðan eru yfirbyggðar svalir til að skapa skugga og góðar framlengingu af húsinu utandyra til að skapa bestu aðstæður fyrir blandaðan innandyra/utandyra lífsstíl.

Vistvænt sumarhús

Sumarhúsafrumskógurinn á Íslandi vex hratt en lítið ber á frumlegri hönnun (allar ábendingar um frumlega hönnun í íslenskum sumarhúsum eru vel þegnar). Þó eru alltaf einhverjir sem eru tilbúnir að fara nýjar óhefðbundnar leiðir. Daninn Søren Korsgaard hefur hannað sumarhús sem smíðað er úr tilbúnum einingum.

Húsið samanstendur af einum ferningi sem er 5x5 metrar að flatarmáli. Hver hlið samanstendur af stórri hurð þannig að hægt er að hafa ferninginn alveg lokaðan eða alveg opinn. Hver hurð er í tveimur lögum, annars vegar gleri og hins vegar svörtum vegg, sem gerir það að verkum að veggurinn safnar miklum hita og orku á köldum dögum. Síðan er hægt að opna hvort sem er bara glerið eða bara vegginn, allt eftir vindum, sól og óskum. Í miðju rýminu er svo stigi upp á eftir hæð þar sem er að finna svefnpláss fyrir fjóra.

Hjörtur

(nánari upplýsingar er að finna á vef Søren Korsgaard)
(via Equity Green)