Úr smiðju skaparans

Vindknúin sæþota sem getur kafað

Nereus er sæþota sem þú getur skemmt þér tímunum saman á án þess að eyða krónu í bensín. Nereus er nefnilega vindknúinn. Sæþotan er fest í stóran flugdreka sem dregur hana áfram og síðan stýrirðu þotunni eftir haffletinum með fótstigum. Þú getur jafnvel kafað á henni þar sem flugdrekinn dregur hana áfram á meðan þú ert ofan í vatninu. Þegar kafað er á sæþotunni eru notuð handföng til þess að stýra uggum neðan á þotunni.

       

Þessi sérstaka sæþota er hugverk Mathias Koehler.

Hjörtur
(via Trendhunter)

Reiðhjól sem eru listasmíði

Hönnun á heima alls staðar. Í listamannahverfinu Soho í New York er að finna listamann og reiðhjólasmið sem virkilega leggur metnað og hugsun í reiðhjólin sín út frá fagurfræðilegum sjónarmiðum. Reiðhjólin eru í raun skúlptúrar. Josh Hadar heitir nytjalistamaðurinn sem smíðar þessa nýstárlegu járnhesta.

Meðal þess sem Josh notar í reiðhjólasköðun sinni eru málmar eins og nikkel, gull og ál, gler og í hnakkana notar hann álroð (það er að segja af fiskinum). En hjólin eru ekki fyrir hvern sem er þar sem verðimiðinn á þeim er á bilinu frá 12.000 dollurum til 35.000. Ekki alveg reiðhjólið fyrir meðalnámsmanninn en þú færð það alveg sérsniðið fyrir þína stærð.

Hjörtur
(via Trendhunter)

Svífandi skemmtiferðaskip - Stratocruiser

Hefur þig dreymt um að fara í siglingu á lúxusskemmtiferðaskipi með sundlaug, spa, góðum veitingastöðum og vel búnum svítum? Hvernig væri að gera það á skemmtiferðaskipi sem flýtur um himininn, með útsýni yfir fjöll og firnindi?

Hönnuðirnir Tino Schaedler og Michael J. Brown hafa útfært þennan draum nánar og hannað Stratocruiser skemmtiloftskipið. Stratocruiser er nútímaútgáfa af loftskipum fyrri tíma. Það er knúið helíum sem geymt er í sérstökum tönkum í stað vetnis eins og Hindenburg, sem við vitum öll hvernig fór fyrir. Skrokkurinn er smíðaður úr kolefnistrefjum.

Stratocruiserinn gerir út á lúxus. Um borð eru svítur, gourmet veitingastaður, spa, sundlaug, nuddstofur og meira að segja klifurveggur og teygjustökkpallur. Í miðju skipsins er op með hringstiga til að komast á milli hæða og inn á svíturnar.

Í Stratocruisernum rennur skemmtiferðaskipið saman við hugmyndir Richard Branson um geimferðalög. Hugmyndin er að hinn veraldavani ferðalangur geti valið um rólega, afslappandi og endurnærandi ferðamáta í stað hefðbundinna stressflugleiða. Hér er hægt að njóta styttri ferðalaga á heilbrigðan hátt og njóta um leið frábærs útsýnis yfir borgir og skóga, vötn og fjöll.

Hjörtur
(via Trendhunter.com)