Úr smiðju skaparans

Hjólabarðar í nýju hlutverki

Þegar þú hefur ekið á dekkjunum þínum í nokkur ár, er kominn tími til að fá sér ný. Spurningin er þá hvað verði um gömlu dekkin. Víða er þeim safnað saman í gríðarstór dekkjafjöll og ef kviknar í slíkum fjöllum spúa þau eiturefnum út í andrúmsloftið án þess að við nokkuð verði ráðið.

Carl Menary hefur hannað athygliverð sæti eða bekki sem eru búin til úr endurunnum hjólbörðum. Í þessu tilfelli er afurðin trú uppruna sínum og augljóst að um hjólbarða sé að ræða. Bekkina má nota hvort sem er innan dyra eða utan enda hafa vatn og vosbúð engin áhrif á sætin.

Carl Menary kallar þessa hugvitsamlegu endurnýtingu á hjólbörðum "Re-tyre".

Hjörtur
(via Yankodesign)

Byssur eiga líka framhaldslíf - Húsgögn og skúlptúrar úr byssum

Borgarastríð herjaði í Kambódíu lengi en þegar friður komst á var gríðarlegt magn af vopnum gerð upptæk. Flestum þessara vopna var eytt, en sum þeirra hafa öðlast nýtt hlutverk í höndum nema í listaháskóla í Phnom Phen, höfuðborg Kambódíu.

Verkefnið kallast PAPC eða Peace Art Project Cambodia. Verkefnið var sett af stað af listamönnunum Sasha Constable og Neil Wilford. Svipuð verkefni hafa verið gerð víðar, t.d. í Angóla í Afríku eftir stríðið þar.

Vopnin hafa verið tekin og beygð, máluð og raðað saman í hin ýmsu listaverk og húsgögn, stóla, dýr og jafnvel reiðhjól.

Hjörtur
(via Trend Hunter)

Gamlar bjórdósir verða að fallegum fiðrildum

Það eru ekki bara ljótar lirfur sem geta breyst í falleg fiðrildi. Ljótar gamlar kramdar bjórdósir geta það líka. Paul Villinski hefur sýnt það og sannað með listilega vel útfærðum fiðrildum sem hann hefur skapað úr dósunum.

Þetta er ein leið til þess að endurnýja dósirnar og að öllum líkindum er hægt að fá meira en 10 kr. fyrir hverja dós ef þú býrð til listaverk úr henni sem þú getur selt. Þú getur því slegið þrjár flöskur í einu höggi. Endurvinnur ruslið, fegrar umhverfið og nærð þér í nokkrar vel þegnar aukakrónur í verðbólgunni.

      

Hjörtur

Flugskeytastöð til sölu á eBay

Ef þig vantar sumarhús fjarri ys og þys stórborganna, flóttastað frá ljósmyndaglömpum heimspressunnar eða ef þú ert brjálaður vísindamaður í leit að stað til að hanna gereyðingarvopn sem þú ætlar að nota til að leggja undir þig heiminn, þá finnurðu það á eBay.

Þar er nú til sölu flugskeytastöð sem er staðsett á 57 ekrum af landi í miðju Washington fylki í Bandaríkjunum. Flugskeytastöðin, sem hét fullu nafni Larsen Air Force Base Complex 1A Titan ICBM, samanstendur af nokkrum byggingum ofanjarðar, m.a. 40x100 feta verkstæði, tveimur steyptum skotmarkabyggingum, tveimur íbúðarhúsum, tveimur 8x8x40 feta geymslugámum og topparnir á þremur flugskeytasílóum, fjarskiptasílóum, inngangsbygging og nokkrar aðrar byggingar og svæði. Allt svæðið er girt af með tveggja metra hárri gaddavírsgirðingu.

Neðanjarðar eru hins vegar 16 byggingar til viðbótar ásamt fleiri kílómetrum af tengigöngum á milli þeirra. Helstu mannvirkin neðanjarðar eru:

1. Þrjú 53 metra há flugskeytasíló
2. Þrár fjögurra hæða búnaðar byggingar
3. Þrjár eldsneytisbyggingar
4. Tvö sex hæða fjarskiptasíló
5. Ein loftræstibygging
6. Ein stjórnstöðvarbygging sem er 33 metrar í þvermál
7. Ein orkustöð sem er 41 meter í þvermál
8. Ein 6 hæða inngangsbygging
9. og nokkrar aðrar byggingar að auki.

Hvað varðar notkunarmöguleikana þá einskorðast þeir eingöngu af fjárstyrk og ímyndurafli kaupandans. Þannig að ef þú vilt slá til, þá geturðu boðið í svæðið á eBay. Byrjunarboð er 1,5 milljónir dollara, 300.000 út og restina á láni. Það hljómar svipað og góður sumarbústaður við Þingvallavatn.

Hér með er auglýst eftir góðum hugmyndum að notkun á mannvirkjunum. (Þú getur smellt á myndirnar til að sjá þær stærri).

Hjörtur

Vespan sem endurfæddist sem lampi

Þó þetta sé ekki alveg nýtt af nálinni, þá er þetta mjög skemmtileg nýting á "dánum" nytjahlutum. Lampar Lamponis eru vespur sem endurfæðast sem lampar. Vespur eru reyndar ekki eina hráefnið, heldur notar hann líka t.d. gamla bensíndælu frá Shell. Myndirnar tala sínu máli:

Þið getið séð fleiri lampa á vef Lamponis.

Hjörtur
(via Core77.com)

Skothylkið sem gerðist blómavasi

Hefurðu stundum velt því fyrir þér hvað hafi orðið um vopnabúr Saddams Hussein? Hér gæti verið komin skýringin.

Rem vasinn byggir á þeirri hugmynd að nota morðvopn sem almenna neysluvöru, eitthvað sem þú kaupir út í búð eins og hvaða annan húsbúnað eða hönnun. Vasinn er stækkuð mynd af 6,8 mm Remington skothylki, hannað af Breta búsettum í New York, Robert Langhorn. Vasinn virkar einföld nútímaleg hönnun í fyrstu en undirliggjandi er formið sem við öll þekkjum sem eitthvað spennandi og ógnandi sem skapar þannig ákveðna togstreitu.

Hjörtur

(via Yankodesign.com)