Burj Dubai, hæsti turn í heimi, var opnaður formlega á mánudaginn undir nýju nafni: Burj Khalifa. Turninn sem er 828 metra hár hýsir fjölda glæsiíbúða, skrifstofa og hótel sem hannað er af Giorgio Armani. Auk þess státar turninn af hæstu sundlaug í heimi (á 76 hæð) og hæstu mosku í heimi (á 128 hæð).
Turninn sem átti að vera eitt mesta stolt Dubai opnar þegar fasteignaverð hefur hrapað um 50% á innan við ári og undir nýju nafni, til heiðurs Khalifa, sjeikinum af Abu Dhabi sem bjargaði framkvæmdinni frá yfirvofandi gjaldþroti með því að dæla inn tugum milljarða dollara inn í ríkið.
Fyrr í dag settu tveir base jumparar nýtt heimsmet er þeir stukku úr toppi turnsins. Hægt er að upplifa með þeim stökkið í myndbandinu hér að neðan:
Hefur þig langað til þess að sjá öll undur veraldar? Hvernig væri nú að afreiða þetta allt í einni ferð? Eða bara flytja þangað?
Nú á að fara að byggja borg sem inniheldur Pýramídana í Gísa, Eiffelturninn, miðborg Feneyja, skakka turninn í Písa, Kínamúrinn og fleira í fullri stærð og rúmlega það. Þessi borg mun slá Las Vegas út. Og gettu hvar hún á að vera ... Dubai!
Borgin er í laginu eins og fálki og inniheldur helstu undur veraldar. Þaðan kemur nafnið. Þú getur séð meira á myndbandinu hér að neðan:
Nýjasta fjárfestingin í "Heiminum" í Dubai, er Isla Moda. Isla Moda er manngerð eyja sem verður staðsett einhvers staðar við "Atlantshafið" í "Heiminum". Það er fjárfestingafélagið Dubai Infinity Holdings sem stendur á bak við kaupin á eyjunni, sem er enn ekki til.
Hugmyndin er að búa til að mistöð tísku í Miðausturlöndum í samstarfi við öll helstu tískuhús heims. Hafa verið gerðir samningar við þekkta tískuhönnuði, og aðra minna þekkta hönnuði, um samstarf við uppbygginguna á eyjunni. Þar munu verða haldnar sýningar og stórviðburðir í tískuheiminum auk þess sem þar verður að finna öll helstu tískumerki heims á einum stað. Hotel Moda er lúxushótel sem reist verður á eynni með um 250 herbergjum og íbúðum og mun þjóna gestum eyjunnar. Búist er við því að fyrstu eignirnar á Isla Moda komi í almenna sölu á fjórða ársfjórðungi 2008.
Isla Moda tískueyjan passar mjög vel inn í þann lúxus lífsstíl sem einkennir "Heiminn", að sögn Hamza Mustafa, sem ber þann skemmtilega titil framkvæmdastjóri Heimsins (Director of The World). "Heimurinn" er eyjaklasi sem er í þróun við skagann sem Dubai stendur á í Persaflóa og er í raun eftirlíking af heiminum. Þar er byggðar eyjur sem að mynda kort af löndum heimsins og þær síðan boðnar til sölu. Þú gætir því keypt þér land. Heilt land! En þú verður að hafa hraðar hendur því um 90% af eyjunum eru seldar. Þú getur skoðað þetta betur í myndbandinu hér að neðan:
Að vísu er ekki hægt að kaupa Ísland, því þar er búið að planta stórri samgöngumiðstöð, Norður höfninni. Þannig að þú getur parkerað bátnum þínum á Íslandi og bara gert eins og Eiríkur, búið á Grænlandi.
Það geysar stríð við Persaflóa. Það er stríð á milli ofurhuga byggingamógúla í smáríkjunum við flóann um hver geti byggt stærstu, mestu og flottustu skýjakljúfana. Nýjasta ofurbyggingin á teikniborðinu er Burj Mubarak Al-Kabir turninn sem reisa á í Madinat Al-Hareer eða Silkiborginni í Kúveit. Þessi turn á að verða 1001 meter á hæð og skáka þar með Burj Dubai turninum sem verið er að reisa í Dubai og er orðin hæsta bygging í heimi. Ekki er búið að gefa út formlega yfirlýsingu um hve hár sá turn á að vera þegar byggingu hans líkur en búist er við að það verði um 800 metrar.
Madinat Al-Hareer á að taka 25 ár í byggingu ef af verkefninu verður. Meðal þess sem byggt verður er stór flugvöllur, brú yfir í Kúveit borg handan við flóann og fleira en hönnunin miðast öll við að skapa vistvæna borg.
Ímyndunaraflið fær enn að leika lausum hala í Dubai og nýjasta afurðin af teikniborðinu er þetta glæsilega 7 stjörnu hótel. Þetta 28 hæða lúxushótel verður staðsett 300 metra fyrir utan strönd Dubai og einungis hægt að komast þangað á þyrlu eða báti (takið eftir staðsetningunni á þyrlupallinum).
Hótelið mun innihalda 438 lúxussvítur, spa, listasafn og neðansjávar veitingarstað með útsýni. Til að toppa þetta eru efstu tvær hæðirnar fiðrildafrumskógur með litríkum hitabeltis fiðrildum.
Þessi einstaka hönnun hefur enn ekki fengið nafn en er stundum kölluð trektin. Mér finnst "fiðrildið" viðeigandi og sé það fyrir mér upplýst á kvöldin með LED ljósum í klæðningunni í ýmsum mismunandi fiðrildamynstrum.
Miklar og merkilegar byggingar hafa lengi vakið athygli umheimsins líkt og Eiffel turninn, óperuhúsið í Sidney, Empire State Building, Petronas turnarnir í Malasýu og skakki turninn í Písa. Sögur af hæstu, nýjustu, tæknilegustu og nýstárlegustu skýjakljúfum heims í Dubai líkt og Burj Al-Arab, hæsta hótel í heimi sem er í laginu eins og risastórt segl og hefur orðið eitt aðalkennileiti þeirrar miklu uppbyggingar sem á sér stað í Dubai. Slíkur arkitektúr hefur stundum verið kallaður "Bling-bling arkitektúr". Bahrain hefur tekist að skapa sér nafn í viðskiptaheiminum, m.a. vegna Bahrain World Trade Center tvíburaturnanna en Kúveit hefur hins vegar ekki verið með hingað til. Það gæti hins vegar farið að breytast.
Nú liggja fyrir áætlanir um að reisa allt að fjóra skýjakljúfa sem gætu orðið einkennandi tákn fyrir Kúveit. Meðal þessara skýjakljúfa er byggingin sem sést á meðfylgjandi mynd en hún er í laginu eins og Cobra slanga. Arkitektinn Charles Jencks segir að einkennandi byggingar eigi að vera hannaðar með meira en notagildi í huga. Þær eigi líka að vera tákn fyrir viðkomandi borg og endurspegla þá hugmyndafræði og gildi sem borgin vill vera þekkt fyrir. Burj Al-Arab sem dæmi, standi fyrir nútímavæðingu ríkisins og getu þess til að ná fram því sem í fyrstu virðist ómögulegt - að snúa örsmáu fátæku furstadæmi í miðstöð fjármagns og viðskipta á svæðinu.
Hannaður hefur verið byltingakenndkur síbreytilegur 78 hæða skýjakljúfur. Þessi skýjakljúfur er þeirrar náttúru gæddur að hver hæð getur snúist sjálfstætt 360 gráður. Hæðirnar eru raddstýrðar þannig að ef þú segir vinstri, þá snýst hæðin til vinstri og öfugt (þannig að maður gæti orðið ringlaður ef maður fer að ræða pólitík í þessu húsi). Þannig öðlast hver hæð sjálfstætt líf og verður þess valdandi að skýjakljúfurinn lítur aldrei eins út.
Á milli hverrar hæðar er síðan vindtúrbína, alls 77 stykki sem framleiða 40 MW af rafmagni, meira en nóg fyrir alla bygginguna. Skýjakljúfurinn er því líka vistvæn bygging og skilar meiru tilbaka en hann tekur af náttúrunni.
Og hvar er svo þessi skýjakljúfur að rísa? Jú, í Dubai að sjálfsögðu.
Hjörtur
Smiðja skaparans í áskrift
Þú getur fengið reglulegar uppfærslur í tölvupósti af þessari síðu með því að skrá netfangið þitt hér að neðan. Áskriftin er ókeypis og þú getur afskráð þig hvenær sem er.
Recent Comments