Króm

650 hestafla Ofur-Golf frá VW

VW kynnti þennan sportlega 650 hestafla VW Golf GTi W12 650 hugmyndabíl á dögunum. Þessi Golf á lítið sameiginlegt með þeim Golf bílum sem við sjáum hér á götunum. Hann er búinn 6 lítra W12 vél sem búið er að koma fyrir aftan við framsætin. Þessi vél skilar síðan 650 hestöflum niður í afturhjólin í gegnum 6 þrepa sjálfskiptingu.

Slík vél kemur bílnum í hundraðið á aðeins 3,7 sekúndum og hámrkshraði bílsins er 325 km/klst. Engar upplýsingar hafa verið gefnar upp um eyðsluna, enda er þetta ekkert nema sýningarbíll. Það er því engin ástæða til að hlaupa út í Heklu og panta einn 650 hestafla W12. Hann er ekki væntanlegur á markað.

 

Á myndbandinu hér að neðan má sjá afhjúpun bílsins:

Króm-Hjörturinn
(via AutoBlog.com)

Konungur sportbílana - Bugatti Veyron Pur Sang

Það sást glitta í þennan á bílasýningunni í Frankfurt. Ekki lengi, ekki heldur á aðalsýningasvæðinu heldur í stuttan tíma í boðspartýi Bugatti. Þetta er heldur ekki bíll fyrir fjöldann. Þetta er sérútgáfa af hinum einstaka og rándýra Bugatti Veyron sportbíl (sem óstaðfestar fréttir segja að bæði Hannes Smárason og Jón Ásgeir hafi tryggt sér eintak af). Einungis eru 300 eintök framleidd af þessum fágæta 1001 hestafla ofursportbíl.

Pur Sang útfærslan er úr trefjaplasti og áli og er hundrað kílóum léttari en "hefðbundna" útgáfan af bílnum. Þrátt fyrir að bíllinn kosti 1,4 milljónir evra, eða um 125 milljónir íslenskra króna, þá seldist öll framleiðslulínan upp á aðeins 24 tímum. Það eru að vísu ekki nema 5 bílar, en þetta eru samt 125 milljónir á eintak - fyrir utan skatta og gjöld! Það væri gaman að vita hvort einhver þeirra hafi ratað í hendur íslenskra auðmanna.

Króm-Hjörturinn

Nýr alþýðuvagn frá Volkswagen

Volkswagen kynnir hugmynd að nýjum alþýðuvagni á bílasýningunni í Frankfurt í þessari viku. Markmiðið er að endurvekja hugmyndafræði Hitlers á bak við Bjölluna. Þó hugmyndafræði Hitlers hafi nú sem betur fer liðið undir lok á allflestum sviðum þá lifir Volkswagen enn góðu lífi. Bjallan átti að verða bíll almúgans, farartæki á viðráðanlegu veðri fyrir íbúa þriðja ríkisins. Bjallan sló í gegn og er mest seldi bíll í heimi með yfir 20 milljónir eintaka seld og var framleidd í svo til óbreyttri mynd frá árunum 1938 til ársins 2003 er sú síðasta kom úr verksmiðjunni í Mexíkó.

Volkswagen hefur því ákveðið að framleiða lítinn bíl sem er með vélina aftur í. Bíl sem á að vera á viðráðanlegu verði fyrir hina venjulegu almúgafjölskyldu. En þar sem þriðja ríkið leið undir lok er það þriðji heimurinn sem er markaðssvæðið. Milljarðamarkaðirnir Indland og Kína. Áætlað er að árleg sala þar nemi um 10 milljón smábílum eftir tvö ár, eða um það leyti sem VW ætlar inn á markaðinn þar með sinn nýja bíl.

Bíllinn sem er kynntur á bílasýningunni í Frankfurt er sá fyrsti af þremur sem kynntir verða. Næstu tveir verða kynntir á bílasýningunum í Tokyo og Los Angeles seinna í haust. "Bjallan" sem kynnt er í Frankfurt er fjögurra manna smábíll með vélinni aftur í líkt og Bjallan forðum og kallast Up!. Up! mun þá væntanlega vera bæði til í hefðbundinni útgáfu fyrir Vesturlönd og strípaðri útgáfu fyrir þriðja heiminn. Bíllinn er einfaldur og stílhreinn í útliti og er talinn sækja útlit sitt í iPodana og reyna að ná að skapa tímalausa hönnun líkt og Bjallan var á sínum tíma.

Lítið er vitað um vélina í bílnum en þó er þess vænst að hann verði boðinn með 1,2 lítra þriggja strokka vél og jafnvel 2 strokka túrbóvél. Einnig eru uppi getgátur um 1,4 lítra díselvél. Bíllinn verður í ódýrari kantinum (enda á hann að vera á færi allra), eða um 500.000 kr. í ódýrari útgáfunni og 650.000 kr. í Vesturlandaútgáfunni.

Króm-Hjörturinn
(via Times Online og Autoweek)

Er þetta arftaki bjöllunar?
Hvað heldur þú? - Taktu þátt í könnunni á krom.is og láttu ljós þitt skína.

iBíll?

Hafið þið reynt að iMynda ykkur hvað verði næst í röðinni hjá Steve Jobs í iFjölskyldunni? Við erum búin að fá að sjá iMac, iBook, iPod og nú er að koma iPhone. Þannig að það er eðlilegt að spyrja hvað komi iNæst.

Sögusagnir herma að Steve Jobs hafi átt fund með Martin Winterkorn, forstjóra Volkswagen til að ræða hugsanlegt "iCar" verkefni, bíl þar sem tækninýjungar Apple væru í hávegum. Samkvæmt Hans-Gerd Bode, talsmanni VW eru ýmsar hugmyndir á kreiki en fáar áætlanir komnar í hús. Apple hefur nú þegar verið í samstarfi við VW um beinar tenginar á iPod í bíla VW.

Markaðsfræðingar ætla að smábíll pakkaður tækninýjungum Apple myndi falla vel í kramið hjá yngsta markhópnum. Svo er náttúrulega spurning hvort að VW ætti að leyfa hönnunarteymi Apple að hanna útlitið á bílinn líka. Það gæti verið mjög gaman að sjá hver útkoman úr því væri.

Króm-Hjörturinn
(via Trendhunter.com)

Njósnamyndir af 4d VW Passat Coupe

Þessar myndir náðust nú um daginn af 4d Passat Coupe sem orðrómur hefur verið um í áraraðir að væri væntanlegur á markað. Með þessum bíl slæst VW í hóp bíla eins og MB CSL, BMW Concept CS og Porshe Panamera með 4 dyra coupe bílum.

Sögur herma að bíllinn verði frumsýndur á bílasýningunni í Detroit í janúar og muni kosta frá 30.000 evrum. Væntanlegar vélar í bílnum verða 1,8 lítra TSI vél sem skilar 160 hestöflum, 2,0 lítra turbó dísel vél og allt upp í FSI V6 sem skilar 300 hestöflum, fjórhjóladrifi og fullt af aukabúnaði. Sá bíll verður á um 40.000 evrur.

Við mætum í Heklu þegar hann kemur þangað.

Króm-Hjörturinn

(via Leftlanenews)