Króm

Evrópuráðið vill bensínlaust EU árið 2050

 
Mynd: John-Morgan / cc 

Evrópuráðið hefur lagt fram nýstárlega tillögu þar sem lagt er til að allar samgöngur á landi sem ganga fyrir jarðefnaeldsneyti verði bannaðar árið 2050. Mörgum þykir þetta róttæk tillaga sem muni senda EU aftur til hinna myrku miðalda, á meðan aðrir hafa bent á að ef ekkert verður að gert, muni fólk hvort eð er vera sent aftur til hinna myrku miðalda vegna þeirra einföldu staðreyndar að jarðefnaeldsneyti sé ekki endurnýjanleg orkuauðlind. 

Ekki er lagt til að ferðafrelsi fólks verði skert á nokkurn hátt, slíkt sé með öllu óraunhæft, en einnig er óraunhæft að halda áfram með það sem nú er notað. Því verði að bregðast við með þeim hætti að fólk geti aðlagast því. Árið 2050 hljómar kannski eins og það sé lengst inn í framtíðinni en þar sem verið er að ræða um stórfenglegar breytingar á daglegu lífsmynstri er líklegast ekki seinna vænna að grípa inn í. Fyrri tilraunir til þess að breyta lífsstíl fólks með því að láta það sjálft þurfa að hafa fyrir því hafa ekki gengið og ljóst að fólk hefur ekki sjálfsagann þegar aðrir auðveldari og þægilegri valkostir eru í boði. "Við getum losað samgöngur undan olíuþörfinni án þess að fórna skilvirkninni eða skerða ferðafrelsið. Þetta getur verið "win-win" segir Siim Kallas, samgönguráðherra EU. Þetta verður ekki ódýr aðgerð en áætlaður kostnaður er um 1,5 trilljón Evra en spurning er hvaða afleiðingar hinn valkosturinn hafi, að gera ekki neitt. 

Hægt er að lesa tillöguna í heild sinni í skjalinu "Roadmap to a Single European Transport Area"

Hjörtur
(via Treehugger.com)

 

 

Sportbílar í samdrætti

Það er enginn sem segir að maður eigi ekki áfram að geta notið þess góða og skemmtilega í lífinu þó maður þurfi að draga saman seglin. Það er nefnilega ekki magnið sem skiptir mestu máli heldur gæðin ;)

Sparneytnir smábílar eru heitustu bílarnir á markaðnum í dag en gallinn við þá er að þeir eru svo fj... "döll". Einn af þeim minnstu og sparneytnustu er Smart, bíllinn sem er svo lítill að þú getur lagt honum þvert í stæði. En til þess að það falli nú ekki á ímyndina, hvernig vær þá að skipta bara um yfirbyggingu á smartbílnum þannig að hann líti nú út eins og "alvöru-bíll".

Smart Corvette

Smart Lamborghini

Smart Ferrari

Og að lokum einn smart fyrir Íslenskar aðstæður - Smart Q3

Þeir eru svona næstum eins og þú gætir hafa fengið þá með barnamáltíðinni á McDonalds.

Króm-Hjörturinn

Krómið er hluti af Vefjakrot.is og er einn mest lesni bílavefur landsins. Þú getur fengið greinarnar í RSS áskrift eða í tölvupósti með því að skrá netfangið þitt hérna efst til hægri.

Sporðdrekinn - Vetnisknúinn ofursportbíll

Vetnisbílar hafa ekið eftir götum Reykjavíkurborgar í nokkur ár núna, en þeir hafa fæstir verið sérlega spennandi fyrir augað. Við höfum haft strætisvagna, litla Benz bíla og Toyota Prius. En það eru til bílar sem ganga fyrir vetni og eru allt annað en ofurhagkvæmir í útliti.

Sporðdrekinn eða The Scorpion er vetnisknúinn ofursportbíll frá fyrirtækinu Ronn Motor Company í Texas í Bandaríkjunum. Fyrirtækið hefur unnið að þróun hagkvæmrar og skilvirkrar nýtingar á vetni en Sporðdrekinn er fyrsti bíllinn frá fyrirtækinu.

Sporðdrekinn er engin máttvana umhverfisdolla með sportröndum, hér er á ferðinni alvöru sportbíll sem fer í hundraðið á 3,5 sekúndum. Vélin er tvinnvél sem gengur bæði fyrir vetni og bensíni og eyðir bíllinn aðeins 5,8 lítrum á hundraði.

Bíllinn verður fáanlegur fyrir 150.000 dollara eða um 11 milljónir króna. Hingað kominn væri hann þá á um 20 milljónir króna. Ronn Motor Company eru byrjaðir að taka niður pantanir og reikna með að fyrstu bílarnir komi á götuna vorið 2009. Aðeins er áætlað að framleiða 200 eintök af þessum sérstaka sportbíl.

Hjörtur
Vefjakrot.is
(via Trendhunter)

Á bak við tjöldin í Iron Man - Audi R8 og Q7

Eins og glöggir bílaáhugamenn hafa vafalítið tekið eftir leika Audi bílar stór hlutverk í Iron Man myndinni. R8 bíllinn er augljóslega uppáhalds farartæki söguhetjunnar þó í skúrnum hjá honum megi einnig sjá bíla eins og Shelby Cobra, Saleen S7 og Tesla rafmagnssportbílinn. Q7 bíllinn leikur svo stórt hlutverk í einu bardagaatriðanna.

John Favreau, leikstjóri Iron Man myndarinnar útskýrir hér áhættuatriðin með R8 og Q7 bílana frá Audi í aðalhlutverki.

Ekki slæm auglýsing.

Króm-Hjörturinn   

Hljóðlausir rafbílar eru ekki sérlega töff

Það hefur verið vandamál með rafmagnsbíla og umhverfisvæna bila í gegnum tíðina að þeir hafa verið allt annað en töff. Þeir eru vanalegast ljótir, hljóma illa, svipta mann allri öryggistilfinningu og ganga almennt þvert á allt sem bílaáhugamenn leita eftir í góðum bíl.

Þetta virðist þó vera að breytast. Fisker Karma sportbíllinn er tvinnbíll sem er bæði með bensínvél og rafmótor. Útlitið ber með sér að þetta er sportbíll sem gefur öðrum bensíngleypandi sportbílum ekkert eftir. Hann hefur allt sem freistar bílaáhugamannsins alveg þangað til að hann er settur í gang. Þá bara heyrist ekki neitt. Það er ekki fyrr en þú hefur keyrt 50 mílur (um 80 km) að bensínvélin þarf að fara að hjálpa rafhleðslunni. Þannig að það er nú lítið fútt í að þenja hann á ljósum til að fá einhvern í spyrnu.

Hljóðið er mjög veigamikill þáttur í akstursupplifuninni. Flækjur gera sitt fyrir hljóðið á bílum og sem dæmi Harley Davidson hefur einkaleyfi á hljóðinu í mótorhjólunum sínum. Þannig að hvað gera bændur þá?

Jú, það sem er lógískast að gera. Henrik Fisker, hönnuður bílsins, hefur ákveðið að setja hátalarakerfi bæði inn í bílinn og allan hringinn utan á bílnum sem sendir út rétta hljóðið. Hljóðið er ekkert slor, heldur sambland af hljóði í formúlubíl og þotu. Hljómar eins og það geti verið töff hljóð, en ég hef samt mínar efasemdir um hvernig það virkar. Þetta hljómar svolítið "sílikon-legt". En staðreyndin er reyndar að flestir bílaframleiðendur í dag eiga við hljóðið í bílvélunum til að ná fram réttum áhrifum. Ef ég er á átta strokka bíl, þá á það að heyrast.

Ég hef því miður ekki hljóðdæmi, en þið getið í staðinn dáðst að útliti bílsins.

Króm-Hjörturinn

"Grænn bíll ársins" í Bandaríkjunum

Á bílasýningunni í LA sem nú stendur yfir tilkynnti tímaritið Green Car Journal hver væri hinn græni bíll ársins. Öllum að óvörum var það ekki lítill, nettur örbíll sem gengur fyrir loftbólum heldur bíll sem er raunverulegur valmöguleiki fyrir fjölskyldur í fullri stærð. Vinningshafinn var 2008 árgerð af Chevrolet Tahoe Hybrid bílnum, 8 manna jeppa í fullri stærð.

Hönnuðurnir hjá GM hafa lagt mikið á sig til að ná fram aukinni hagkvæmni í bílnum. Auk þess að vera knúinn tvinnvél ekki ósvipaðri og Toyota hefur verið að nota í Prius og sumum af Lexus bílunum hafa þeir minnkað loftmótsstöðu og létt bílinn verulega. Grillið hefur verið minnkað, stuðarinn að framan lækkaður og vélarhlíf og skottlok eru úr áli. Bíllinn er ekki í boði með "þungum" aukabúnaði eins og rafmagnsopnurum á skottloki og rafmótorum á sætum til að leggja þau niður. Bíllinn skilar sömu aksturseiginleikum og bensínbíllinn og getur dregið allt að 3 tonn. Ástæðan fyrir því að hann getur ekki dregið meira er ekki skortur á afli heldur lítið grill að framan og þar af leiðandi minni vélarkæling. Eitthvað sem er kannski ólíklegt að vera til vandræða í köldu loftslaginu hér á Norðurhjara.

Kíkið á myndbandið og sjáið gripinn með eigin augum.

Króm-Hjörturinn
(via Trendhunter.com)

ps. heldurðu að þetta bjargi jeppanum frá útrýmingu? Þú getur sagt þitt álit inn á spjallinu á Króminu.

Ólafur Elíasson hannar vetnisbíl úr ís fyrir BMW

Nýlistasafnið í San Fransisco hefur sett upp stóran frystiklefa inn á safninu fyrir nýjasta listaverk Ólafs Elíassonar. Um er að ræða vetnisknúinn bíl sem er smíðaður úr ís. Bíllinn er hluti af sýningu listasafnsins á verkum Ólafs Elíassonar undir nafninu "Your Tempo: Olafur Eliasson".

Bíllinn er hluti af seríu listaverka sem BMW hefur fengið ýmsa listamenn til þess að hanna og er Ólafur Elíasson þar í hópi með mönnum eins og Andy Warhol. Þessi er sá framúrstefnulegasti og óvenjulegast sem ég hef séð. Hingað til hefur listamönnunum verið falið að skreyta hefðbundinn BMW með því að mála hann og skreyta en í þetta sinn hefur Ólafur Elíasson tekið H2R vetnis-kappakstursbílinn, rifið af honum alla klæðninguna og búið til nýja úr ís. Bíllinn er smíðaður úr áli, ryðfríu stáli og ís utan um grindina úr H2R vetnisbílnum. Um 2.000 lítrum af vatni var úðað yfir bílinn á nokkrum dögum til þess að búa til lag af ís utan um hann.

Að sögn BMW var markmiðið að breyta iðnhönnun í listaverk sem endurspeglar samband bílaiðnaðarins og hækkunar á hitastigi jarðar. Sýningin á bílnum stendur yfir frá 8. september til 13. janúar 2008.

Þú getur sagt álit þitt á bílnum inn á spjallþráðunum.

Króm-Hjörturinn
(via Autobloggreen.com)

Viltu fá greinar af Króminu í ókeypis áskrift í tölvupósti?
Skráð þá netfangið þitt í reitinn hérna til hægri.

Ford Hydrogen Fusion 999 setur nýtt hraðamet

Ford tókst að brjóta blað í sögu bílsins þegar þeir settu hraðamet á saltsléttum Utah síðastliðinn miðvikudag. Liði Ford tókst að rjúfa 200 mílna múrinn og komu bílnum, sem knúinn er vetnisrafölum, á 207,297 mílna hraða eða 333,5 kílómetra hraða. Það er mesti hraði sem náðst hefur á hefðbundnum (svona nokkurn veginn) bíl knúnum vetnisrafölum.

Við óskum Ford til hamingju með þennan áfanga og hlökkum til að geta ekið á bílum knúnum efnarafölum á þessum hraða ;o) Í myndbandinu hér að neðan er hægt að sjá bílinn og fá útskýringu á hvernig hann virkar.

Króm-Hjörturinn

(Hægt er að lesa meira um bílinn á Autobloggreen.com)

"Visthæfir bílar" fá að leggja ókeypis í 90 mín. í Rvk

Ég lærði nýtt hugtak á dögunum, "visthæfir bílar". Það munu vera bílar sem menga lítið en slíkir bílar munu frá og með 2. ágúst síðastliðnum fá að leggja frítt í 90 mínútur noti þeir þar til gerðar bílastæðaskífur. Það eru Græn skref Reykjavíkurborgar sem standa fyrir átakinu í samstarfi við Bílgreinasamband Íslands. 22 bifreiðategundir eru á listanum yfir "visthæfa bíla" og eru það bensínbílar sem eyða undir 5,0 l/100 km, tvinnbílar og metanbílar og díselbílar sem eyða undir 4,5 l/100 km. Ég spyr mig hvort að mótorhjól ættu ekki að fá að leggja frítt líka? Þau eyða minna en þetta og það eru almennt ekkert mikið fleiri farþegar í bílunum heldur en á hjólunum (einn í bíl).

Listinn yfir bílana er hér

Vef-Þjóðviljinn hefur líka bent á það að stærri fjölskyldum bíðst ekki að leggja frítt, þó bensíneyðslan sé jafnvel mun minni á mann þegar fleiri eru í bíl. Þetta vinnur því í raun gegn þeirri stefnu að samnýta bíla meira. Ég þarf 7 manna bíl undir mín börn og hundinn þannig að ég á ekki kost á bíl sem uppfyllir þessi skilyrði og því mun ég víst áfram þurfa að borga í stöðumælana í Reykjavík.

Við fögnum vissulega öllum ókeypis bílastæðum enþað er náttúrulega aldrei hægt að koma til móts við alla.

Nánari upplýsingar er að finna á vef Reykjavíkurborgar.

Króm-Hjörturinn

Íslensk ráðstefna um orkugjafa bifreiða framtíðarinnar

Þann 17. september næstkomandi verður haldin ráðstefna á Íslandi, Driving sustainability ´07, um endurnýjanlega orkugjafa fyrir farartæki. Á ráðstefnunni hittast sérfræðingar frá Evrópu og Bandaríkjunum og deila reynslu sinni og hugsjónum í leit sinni að orkugjafa framtíðarinnar. Það eru Reykjavik - Pure Energy, Landsbankinn og Icelandair sem halda ráðstefnuna og mun Ólafur Ragnar Grímsson, forseti Íslands setja hana. Stefnt er að því að halda hana árlega.

Hægt er að lesa meira um ráðstefnuna á driving.is.

Króm-Hjörturinn