Króm

Af hverju eru Finnar svona góðir rallökumenn?

Kannski af því að þeir læra af mistökunum. Hér er tíu mínútna overdose af bílveltum og krössum úr finnskum rallýum. Og mig langar til að biðja ykkur um að taka eftir einu. Nánast allir bílarnir fara út af í utanverðri beygju og þar eru trén hættulegust. Þess vegna er mér með öllu óskiljanlegt þegar ljósastaurar eru staðsettir í utanverðri beygju þar sem þeir eru langlíklegastir til þess að skera bíla í tvennt sem koma á of miklum hraða í beygjuna. Þetta er eitthvað sem vegaverkfræðingar ættu að hafa í huga.

Það væri gaman að sjá svona syrpu af íslenskum krössum. Það er náttúrulega synd þegar ísenskir rallökumenn bjóða fjölmiðlum í ökuferð og velta svo einhvers staðar þar sem eru engar myndavélar ;)

Króm-Hjörturinn

ps. gerist fans á Facebook til að fylgjast með nýjum greinum og myndböndum ==>

Ljósastaurarnir urðu eftir út á miðri götu

Íbúar við götu eina í bænum Gyál í Ungverjalandi voru að vonum glaðir þegar átti að endurnýja götuna hjá þeim. Vinnuflokkar mættu á staðinn og breikkuðu veginn og malbikuðu hann upp á nýtt. Eitthvað virðist skipulagið samt hafa farið úr skorðum því gleymst hafði að gera ráðstafanir til að færa ljósastaurana.

Malbikunarflokkurinn var nú ekki að láta það trufla sig og malbikaði bara í kringum staurana sem nú standa eftir úti á miðri götu bílstjórum til mikils ama.

Króm-Hjörturinn

ps. munið að gerast fans á Facebook til að fylgjast með nýjum skemmtilegum fréttum af vefjakrotinu ==>

Pappabörn notuð til að hægja á umferð

Margvíslegar tilraunir hafa verið gerðar til þess að hægja á umferð, sérstaklega í íbúðabyggð og í grennd við skóla. Hinar ýmsu gerðir af hraðahindrunum, þrengingum og auglýsingum hafa verið reyndar með misjöfnum árangri.

Hugvitssamur borgari í West Saleem í Ohio, Bandaríkjunum, byrjaði að prenta veggspjöld af barnabörnum fyrir afa og ömmur. Veggspjöldin voru svo raunveruleg að þau reyndust mjög góð leið til þess að hægja á umferð ef eim var komið fyrir nærri umferðargötum. Það vill náttúrulega enginn aka á barn.

Mike Woods, sem framleiðir börnin, segist selja þau á 60 dollara stykkið og hann sé farinn að fá fyrirspurnir frá hverfasamtökum og lögreglustöðum mjög víða. Spurning hvort að skólar hér á landi ættu að taka þetta upp þegar 1. bekkur byrjar aftur í haust til að tryggja öryggi barna á leið í skólann í fyrsta sinn.

Króm-Hjörturinn
(via Trendhunter)

VGK starfsmenn ekki einir í bíl

VGK hönnun hefur kynnt starfsmönnum sínum nýja samgöngustefnu fyrirtækisins. Í henni felst meðal annars að starfsmenn eru hvattir til þess að koma ekki einir í bíl til vinnu, heldur sameinast í ferðir. Er þetta hugsað sem framtak til þess að draga úr bílaumferð og umhverfisáhrifum hennar. Hefur VGK ákveðið að taka upp samgöngustyrki til starfsmanna til að hvetja þá til að fylgja stefnunni.

Þetta fyrirkomulag að vera fleiri en einn í bíl kann að koma mörgum Íslendingum spánskt fyrir sjónir, en þetta er vel þekkt í bílalandinu mikla, Bandaríkjunum. Á umferðarþyngstu vegunum eru sérstakar akreinar sem eru merktar "Carpool" og þar mega aðeins þeir keyra sem eru með farþega í bílnum hjá sér. Umferðin þar hefur tilhneigingu til þess að ganga mun hraðar heldur en á hinum akreinunum þar sem einbílungarnir fara.

VGK hefur svo sem ekki enn (svo ég viti til) teiknað inn sér akreinar fyrir starfsmenn sína sem sameinast í bíla en það er aldrei að vita hvað framtíðin ber í skauti sér. Nú þegar er búið að bæta inn sér akreinum fyrir strætisvagna og leigubíla til að liðka fyrir þeim sem ferðast sem farþegar.

Þið sem sitjið föst í umferðinni á Miklubrautinni á morgnanna, haldið þið að þetta sé raunhæfur möguleiki? Að hvetja fólk til að sameinast í bíla og jafnvel að búa til sér akreinar fyrir þá sem eru með farþega?

Króm-Hjörturinn

Keyptu þig út úr umferðarteppunni

Stundum væri maður nú alveg tilbúinn að borga slatta til þess að vera ekki fastur í umferðarteppu og er að missa af einhverju mikilvægu.

Í Bretlandi er verið að ræða nýstárlega hugmynd til þess að létta á umferðarteppunni sem myndast á háannatímum í kringum stærstu borgirnar. Það sem er verið að ræða er að taka vegöxlina undir umferð á annatímum. En í stað þess að hún sé bara fyllt af kyrrstæðum eða hægfara bílum eins og hinar akreinarnar, er verið að ræða þann möguleika að krefjast gjalds fyrir að nota þá akrein. Slíkt fyrirkomulag þýðir þá að ef þér liggur virkilega mikið á, þá geturðu borgað fyrir að þurfa ekki að bíða í þvögunni og keyrt framúr öllum hægfara fátæklingunum sem sitja fastir.

Menn gætu þá verið með skynjara í framrúðunni líkt og maður fær þegar maður er með Hvalfjarðargöngin í áskrift. Síðan er bara tikkar hversu oft maður keyrir undir gjaldtökuteljara. Þessi hugmynd hefur fengið aukinn meðbyr eftir að önnur hugmynd um almenna gjaldtöku á öllum akreinum á umferðarþyngstu hraðbrautunum var drepin með 1,8 milljónum undirskrifta. Fólki fannst fáránlegt að vera að borga aftur fyrir ömurlega þjónustu sem það væri þegar búið að greiða fyrir með skattpíningu.

Gagnrýnendur hafa kallað þessa nýju hrað-akrein "the Lexus lane" þar sem þeir telja að aðeins hinir ríku muni hafa efni á að nýta sér þennan möguleika og þar af leiðandi verði aðeins dýrari bílar á þessum akreinum. Kannanir hafa hins vegar sýnt fram á að 80% bílstjóra með lága innkomu væru tilbúnir að nýta sér þennan möguleika þegar þeim liggur mikið á (ég meina, hvað er maður ekki tilbúin að borga til þess að eiginkonan verði ekki brjáluð á því að bíða ef maður er seinn fyrir).

Króm-Hjörturinn
(via Times Online)

Reykjanesbrautin og vegamerkingar

Í dag varð enn eitt slysið á Reykjanesbrautinni. Að þessu sinni varð slysið með þeim hætti að bíl var ekið fram úr öðrum sem dró hjólhýsi á eftir sér. Taldi ökumaðurinn sig vera á þeim kafla þar sem Reykjanesbrautin er tvöföld í báðar áttir og gætti því ekki sérstaklega að umferð á móti. Hann mætti hins vegar fjórum mótorhjólamönnum. Tveimur þeirra tókst að víkja sér undan en hinir tveir féllu í götuna og slösuðust.

Hér er enn eitt slysið á mótorhjólamönnum sem verður í raun vegna lélegra merkinga við vegavinnu, en á eflaust eftir að tilheyra flokkinum mótorhjólaslys í skýrslum. Ástæðan hér er sú að ökumaður bílsins taldi sig vera á þeim kafla þar sem Reykjanesbrautin er tvöföld. Og hann var það. Hins vegar var umferð í báðar áttir öðru megin vegna vegaframkvæmda og því mætti hann mótorhjólunum. Vegna vegavinnu þurfa ökumenn stöðugt að vera að svissa á milli vinstri og hægri vegarhelminga, ýmist með umferð á móti eða ekki. Því er mjög auðvelt að ruglast á þessu.

Nú bjó ég í nokkur ár erlendis og hef því mikið ekið á þjóðvegum í Evrópu, og oft þar sem verið hefur vegavinna. Þar sem þurfti að hleypa umferð á móti inn á tvöfaldan veg þar sem akstursstefnur voru vanalegast aðskildar voru alltaf merkingar á milli þannig að ekki færi á milli mála að umferð væri á móti. Oft var umferðin aðskilin með múrblokkum en alltaf í það minnsta keilum og skiltum. Ekkert slíkt er á Reykjanesbrautinni og því auðvelt að misskilja aðstæður.

Það hefur þegar orðið eitt banaslys á Reykjanesbrautinni sem má að hluta til rekja til lélegra merkinga. Hversu mörg þurfa þau eiginlega að verða til þess að reglur og efirlit með merkingum vegna vegavinnu verði teknar til rækilegrar endurskoðunar?

Króm-Hjörturinn
(meðfylgjandi mynd var tekin vestur á fjörðum þar sem vegagerðarmenn voru með fyrirtaksmerkingu. Stóra upplýsta ör sem aðvaraði og leiðbeindi ökumönnum. Verktakarnir hérna í bænum mættu taka þá sér til fyrirmyndar.)

Víravegrið og mótorhjólamenn

Ég var að aka á Reykjanesbrautinni í Garðabæ í gær á eftir mótorhjólamanni þegar hann skyndilega missir stjórn á hjólinu. Það byrjar að kasta til afturendanum og að lokum missir hann hjólið í götuna. Hjólamaðurinn rann eftir götunni og út af henni og lenti þar á steypuklumpum sem var búið að raða upp vegna gatnaframkvæmda. Hjólamaðurinn fékk mikið högg við að lenda á steypuklumpinum og slasaðist talsvert. Hann má samt vera þakklátur fyrir steypuklumpinn því að handan við hann var hefðbundið vegrið. Hefði hann lent á því hefði hann væntanlega farið á staurinn sem vegriðið stendur á sem er mjór stálstaur. Ef maður rennur á þannig staur á þó ekki sé nema á 50 kílómetra hraða, þá getur hann hæglega klippt mann í sundur. Mér varð hugsað til umræðunnar sem hefur verið um víravegriðin á suðurlandsveginum.

HÆGRI FÓTURINN AF
Í dag lenti svo mótorhjólamaður í Japan utan í vegriði þegar hann var að hjóla með tíu félögum sínum. Honum tókst að halda sér á götunni og það var ekki fyrr en tveimur kílómetrum síðar að hann uppgötvaði að hálfur hægri fóturinn hafði farið af honum. Félagar hans sneru við og fundu fótinn sem var fluttur ásamt hjólamanninum á spítala í grenndi.

Að kalla þessi víravegrið ostaskera er líklegast vægt til orða tekið. Mótorhjólamenning er ört vaxandi á Íslandi og því nauðsynlegt að umferðarmannvirki séu hönnuð með tilliti til mótorhjóla ekki síður en bifreiða. Við eigum ekki að þurfa að horfa upp á menn bútaða í sundur áður en það verður.

Króm-Hjörturinn

(fyrri myndin er af mbl.is og sýnir vettvang slyssins á Reykjanesbrautinni í gær, seinni myndin er af vef Sniglanna)

UPPFÆRSLA:
Ég frétti að mótorhjólamaðurinn væri á batavegi. Hann slasaðist talsvert, var með brotin rifbein og sprungið milta sem að þurfti að fjarlægja. En hann hélt öllum limum og mun ná sér aftur.