Króm

Trukkur ók á 100 km hraða með bíl fastan á stuðaranum

Ökumaður flutningabíls varð einskis var þegar hann ók inn í hliðina á Renault Clio smábíl á breskri hraðbraut á dögunum. Hann hélt ótrauður áfram á 60 mílna hraða, um 100 km hraða á klukkustund með bílinn fastan á framstuðaranum. Aðrir vegfarendur sáu bílinn og reyndu að gera ökumanninum viðvart án árangurs. Einn vegfarandi náði þessu myndbandi af bílnum:

Ekki er vitað hvernig smábíllinn festist framan á flutningabílnum né hversu lengi var ekið með hann svona. Ökumaður Renault bifreiðarinnar slapp án teljandi meiðsla frá árekstrinum.

Króm-Hjörturinn

(via dailymail)

Ungir athafnamenn breyta bensínbíl í rafmagnsbíl

Þrír ungir hugvitsmenn í Háskólanum í Reykjavík, Guðjón, Hjörtur og Hrafn, hafa ákveðið að breyta hefðbundnum bensínbíl í rafmagnsbíl. Til verksins hafa þeir keypt gulan Renault Kangoo árgerð 1999 sem mun hér eftir vera umhverfisvænn rafmagnsbíll. Bensínvélin er þegar horfin á braut og í staðinn kemur AC55 rafmagnsmótor sem gefur 70kw eða 93 hestöfl. Það ætti því að vera sæmilega sprækur bíllinn þó bensínið sé horfið.

Þeir félagar hafa heldur ekki litlar væntingar til bílsins. "Um leið og mótorinn var kominn til landsins var hafist handa við að setja mótorinn á gírkassann en fljótlega kom í ljós að mótorinn og gírkassinn vildu ekki vera vinir og pössuðu ekki saman. Nú voru góð ráð dýr og eftir töluverðar vangaveltur fram og til baka var ákveðið að smella hásingu undan Toyota Touring undir Kangooinn og gera hann afturhjóladrifinn og setja mótorinn í miðjan bílinn, svona eins og er í Ferrari." segir á heimasíðu verkefnisins.

 

Fyrir þá sem hafa áhuga á að kynna sér verkefnið nánar verða þeir með opið hús hjá sér dagana 19-20 nóvember næstkomandi frá kl. 13-19 í Lagnakerfamiðstöð Íslands í Keldnaholti. Einnig er hægt að fylgjast með framvindu mála á heimasíðu verkefnisins og í vefmyndavél sem þar er.

Króm-Hjörturinn

Farsími með innbyggðum smábíl - eða var það öfugt?

Renault og Nokia hafa farið í samstarf um hönnun á hátæknivæddum smábíl. Um er að ræða Renault Twingo bifreið sem er búin fullkomnum fjarskiptabúnaði frá Nokia og gengur undir nafninu Renault Twingo Nokia special edition.

Það sem gerir þennan bíl frábrugðin öðrum bílum eru tengimöguleikar við hljómflutningstækin en hægt er að tengjast í gegnum USB, 3,5mm kapal og DIN tengi fyrir iPoda. Lögin eru send í 140w mp3 hljómflutningstæki sem er stýrt úr stýri. Bíllinn er jafnframt með bluetooth móttakara sem er nauðsynlegur til að tengjast Nokia 6110 Navigator símanum sem fylgir með en hann er með GPS, 3G og microSD rauf svo eitthvað sé nefnt. Ekkert leiðsögutæki annað er í bílnum en Nokia síminn kemur með sogskál svo hægt sé að festa hann við framrúðuna og eru eiginleikar hans sambærilegir við hefðbundin leiðsögutæki. Það sem síminn hefur þó fram yfir þau hefðbundnu er að þú getur hæglega tekið hann með úr bílnum og þarft því ekki að villast um leið og þú ert búinn að finna bílastæði í einhverri dimmri bakgötu.

Bíllinn er sérmerktur Nokia á gluggapóstinum aftan við framdyrnar neðan við mikið rafmagnsvíravirki sem þar er. Það ætti því ekki að fara fram hjá neinum sem labbar fram hjá bílnum að hér er á ferðinni hátæknibíll frá Nokia.

Króm-Hjörturinn