Króm

Sportbíll sem skiptir litum

Nissan hefur þróað nýja gerð af bílalakki sem er þeirrar náttúru gætt að breyta litum eftir því hversu mikill rafstraumur er sendur í gegnum lakkið.

Bílstjórinn getur valið úr fjölda lita á bílinn með takka sem er inn í bílnum. Konur eiga eftir að elska þetta því nú geta þær alltaf ekið bíl í stíl við veskið og skóna. Eini gallinn er að til þess að halda litnum þarf að vera stöðugur straumur sem þýðir að þegar drepið er á bílnum fer hann í grunnlitinn sem er hvítur. Það þarf því að koma fyrir búnaði í bílnum sem virkar svipað og "örugg heim" ljósabúnaðurinn sem lýsir í tvær mínútur eftir að drepið á bílnum. Það væri hægt að kalla það "úr augsýn" stillingu sem virkar þannig að bíllinn heldur litnum í stíl við kjólinn þar til eigandinn er komin úr augsýn. Því annars er hann ekki í stíl og það gengur náttúrulega ekki.

Króm-Hjörturinn
(via Trendhunter.com)

Nissan Pivo 2 - róbóbíll sem þarf aldrei að bakka

Nissan ætlar að frumsýna þennan bíl á bílasýningunni í Tókýó 27. október næstkomandi. Bíllinn er rafknúinn hugmyndabíll frá Nissan sem getur keyrt á hlið og það er hægt að snúa farþegarýminu hvernig sem er. Það þarf því aldrei að bakka bílnum. Þú bara snýrð húsinu á bílnum í þá átt sem þú ætlar að fara og keyrir þangað. Einfalt. Þetta er því hinn fullkomni bíll fyrir fólk sem ekki getur lagt í samhliða bílastæði.

Þetta skrýtna farartæki er búið vélmenni sem fylgist grant með bílstjóranum. Upp úr mælaborðinu stingst höfuð á vélmenni sem er gætt þeirri náttúru að það fylgist með skapsveiflum þeirra sem í bílnum sitja til þess að geta brugðist við ef "vegareiði" (road-rage, ykkur er mjög velkomið að benda mér á betri þýðingu á þessu hugtaki :) lætur gera vart við sig og hann lætur fólk vita ef það er farið að dotta með tilkynningum eins og "Þú ert þreytuleg að sjá. Eftir 500 metra er kaffihús á vinstri hönd."

Bíllinn er ekki með neina öxla heldur er hvert hjól sjálfstætt og hægt að snúa því í hvaða átt sem er. Bremsum og stýri er stjórnað með rafmerkjum þannig að hægt er að snúa húsinu og hjólunum án vandræða. Í myndbandinu er hægt að sjá bílinn "störfum".

Þetta er svona eins og afkvæmi R2D2 og KITT bílsins hans Hasselhoffs í Knight Rider.

Króm-Hjörturinn
(via Trendhunter.com)