Þetta er nú kannski engin bylting. Það er stöðugt verið að prófa sig áfram með farartæki sem geta bæði siglt á vatni og ekið á landi, eins og við munum eftir úr Vík í Mýrdal og Jökulsárlóni. En það voru meira bátar sem gátu ekið, en bílar sem gátu siglt.
Í Osaka í Japan er búið að setja upp leigubílaþjónustu, Osaka Mizukaido 808, sem býður upp á ferðir með leigubílum sem geta líka siglt eftir síkjum borgarinnar, en borgin er fræg fyrir síki sín og brýr. Talan 808 í nafni fyrirtækisins er tilvísun í brýrnar sem sagðar eru 808 talsins. Ferðirnar eru hugsaðar fyrst og fremst fyrir ferðamenn og kostar fyrsti klukkutíminn 180 USD og hver hálftími eftir það 80 USD.
Kannski við eigum eftir að sjá svona á Tjörninni í Reykjavík.
Leigubílastöðin Hreyfill hefur gert samstarfssamning við Krabbameinsfélagið og mun framvegis aka undir bleiku leigubílamerki í október mánuði. Þetta er gert til þess að vekja athygli á brjóstakrabbameini en október er mánuður brjóstakrabbans. Þetta er jafnframt gert til þess að hvetja konur að fara í skoðun og aðra til þess að styrkja krabbameinsfélagið.
Leigubílamerkið á þaki leigubílanna er nú bleikt í stað hins gula lits sem prýðir það dags daglega. Auk þess hefur x-inu verið skipt út fyrir bleika slaufu í orðinu TAXI.
Leigubílstjórarnir munu jafnframt bjóða farþegum sínum að kaupa bleikar slaufur til styrktar Krabbameinsfélaginu.
Króm-Hjörtur
