Króm

Citroen kynnir nýjan rallýbíl, DS3

Citroen hefur átt nokkra gullmola í gegnum tíðina, og við fyrstu sýn virðist einn hafa bæst í konfektkassann þeirra: Citroen DS3 Racing. DS3 er lítill og nettur sportbíll hannaður fyrir WRC og er settur til höfuðs Clio 200 og Mini JCW - og hann hefur útlitið með sér.

DS3 er knúinn 1.6 lítra túrbóvél sem hefur áður sést í Mini Cooper bílnum en enn eru ekki búið að gefa upp nánari upplýsingar um hverju þessi litla vél getur áorkað en sagt er að hún eigi að koma bílnum upp í hundraðið á vel innan við 7 sekúndum.

Þar sem smábílar virðast vera málið á nýja Íslandi þá ætti þessi DS3 að geta heillað landann, lítill og nettur en með framúrskarandi aksturseiginleika fyrir íslenskar aðstæður. Og "lúkkar" líka vel :)

Króm-Hjörturinn

Af hverju eru Finnar svona góðir rallökumenn?

Kannski af því að þeir læra af mistökunum. Hér er tíu mínútna overdose af bílveltum og krössum úr finnskum rallýum. Og mig langar til að biðja ykkur um að taka eftir einu. Nánast allir bílarnir fara út af í utanverðri beygju og þar eru trén hættulegust. Þess vegna er mér með öllu óskiljanlegt þegar ljósastaurar eru staðsettir í utanverðri beygju þar sem þeir eru langlíklegastir til þess að skera bíla í tvennt sem koma á of miklum hraða í beygjuna. Þetta er eitthvað sem vegaverkfræðingar ættu að hafa í huga.

Það væri gaman að sjá svona syrpu af íslenskum krössum. Það er náttúrulega synd þegar ísenskir rallökumenn bjóða fjölmiðlum í ökuferð og velta svo einhvers staðar þar sem eru engar myndavélar ;)

Króm-Hjörturinn

ps. gerist fans á Facebook til að fylgjast með nýjum greinum og myndböndum ==>

Heljarstökk afturábak á Porsche

Ökumanninum á þessum Porsche GT1 tókst að fara í heljarstökk afturábak á bílnum í keppni. Lendingin heppnaðist ekki fullkomnlega, en nálægt því þó.

Króm-Hjörturinn

Fornbílarallý HERO á Íslandi

Fornbílarallý HERO (the Historic Endurance Rallying Organisation) á Íslandi, (The HERO Classis Reliability Trial of Iceland) hófst við Ráðhúsið klukkan 9 í morgun. Í rallýinu mega eingöngu fornbílar taka þátt en það gengur meira út á ferðamennsku en hraðakstur. Í dag var fyrsti dagur rallýsins og var ekinn hringur frá Reykjavík til Þingvalla og þaðan áfram á Gullfoss og Geysi og tilbaka í átt að Reykjavík og endað í Bláa Lóninu.

Á morgun verður svo ekið frá Reykjavík og austur á Kirkjubæjarklaustur og síðan haldið áfram næstu daga eftir hringveginum. Ekinn verður allur hringurinn og endað við Perluna í Reykjavík seinni partinn á föstudag, 12. september. Hægt er að sjá dagskránna og viðkomustaði hér!

Alls eru 65 lið sem taka þátt í rallýinu frá 10 þjóðlöndum og ýmis konar fornbílum. Elsti bíllinn í flotanum er Bentley Tourer af 1928 árgerð en yngsti bíllinn er frá 1982. Ýmsa klassíska bíla má finna í flotanum, eins og Citroen bíla, Volvo kryppu og Volvo sportbíl eins og dýrlingurinn ók á, bjöllu, Jagúar, Triumph, Morris, MG, Aston Martin, Austin Mini og fleiri. Flestir eru bílarnir frá Bretlandi.

Þið getið skoðað fleiri myndir í gallerýinu.

Gallerý

Króm-Hjörturinn

Krómið er hluti af Vefjakrot.is og er einn mest lesni bílavefur landsins. Þú getur fengið greinarnar í RSS áskrift eða í tölvupósti með því að skrá netfangið þitt hérna efst til hægri.

Íslendingur í öðru sæti í rallýi frá London til Ulan Bator

Íslendingurinn Arnar Freyr Vilmundarson varð í öðru sæti í Mongólíu rallýinu þegar hann náði til Ulan Bator ásamt félaga sínum Christopher Friel í gær. Þeir voru 18 daga á leiðinni en ekki er ekið eftir ákveðnum leiðum heldur verður hver að finna sína leið. Arnar og Christopher notuðust við kort og áttavita en voru ekki með neitt GPS tæki. Fyrstu dagana í Mongólíu tókst þeim að villast nokkrum sinnum enda eru þar engin skilti eða götunöfn. Mongólarnir voru hins vegar mjög hjálplegir og vinalegir og alltaf tilbúnir að segja þeim félögum til vegar, að sögn Arnars.

Ökutæki þeirra félaga var 1988 árgerð af Suzuki Samurai jeppa með 980cc vél, en einungis farartækjum með minni vél en 1000cc er heimil þátttaka í keppninni. „Það fór ekkert stórvægilegt úrskeiðis með bílinn, hann náði alla leið með sóma, en ég held hann hefði ekki þolað mikið meira," segir Arnar í samtali við Morgunblaðið í dag.

Mongólíu rallýið er ekki eiginleg hraðaksturskeppni heldur er markmiðið að safna fé til góðgerðarmála og skemmta sér vel á leiðinni. Reglur eru líka sveigjanlegar og sem dæmi er eitt liðið á sjúkrabíl sem það hyggst skilja eftir í Mongólíu til nota þar. Hægt er að lesa meira um Mongólíurallýið hér.

Króm-Hjörturinn

Strumpastrætó á sterum

Dodge Caravan er hinn fullkomni fjölskyldubíll. Mest seldi minivan í heimi, með sæti fyrir sjö, rennihurðir á báðum hliðum, cheerios hringi undir sætunum og 150 hestafla V6 vél. Hljómar ekki eins og neinn sportbíll. En það þýðir ekki að það sé ekki hægt að gera hann svolítið skemmtilegan.

Þessi fyrrverandi fótboltamömmubíll (sjáið bara fótboltalímmiðan á afturhleranum) hefur fengið smá "orkubúst". Um það bil 1.000 hestafla þotumótor hefur verið komið fyrir aftur í honum.

Það væri nú ekki ónýtt fyrir fótboltamömmurnar úr Grafarvoginum að taka GT strákana frá Selfossi í spyrnu á þessum :)

Króm-Hjörturinn

Ferrari Formúlu 1 bíll úr súkkulaði

Einhverjir voru voða mikið að tala um formúlubíl úr eldspýtum um daginn. Ég gæfi nú ekki mikið fyrir slíkan bíl. Þá líst mér nú miklu betur á þennan Ferrari Formúlu 1 bíl sem er allur úr súkkulaði. Það er óneitanlega meira freistandi. Ef þú trúir því að stelpur falli fyrir strákum sem eiga sportbíla, þá hefurðu kannski rétt fyrir þér þegar hann er úr súkkulaði :)

En ég hef slæmar fréttir. Þessi girnilegi Ferrari súkkulaðiformúlukappakstursbíll var brotinn í spað og étinn af Ferrari formúlu liðinu núna um helgina. Og mér var ekki boðið :(

Hvað er að gerast?

Króm-Hjörturinn

Ók þvert yfir Bandaríkin á 31 klst.

Nýtt hraðamet var slegið nú um helgina í akstri þvert yfir Bandaríkin. Það var rallýökumaðurinn Alex Roy sem ók svokallaðan Cannonball Run kappakstur þvert yfir 13 fylki frá New York til Santa Monica í Californíu og bætti eldri met um meira en klukkustund sem var 32 klst. og 7 mínútur og er löngu orðið að goðsögn í Bandaríkjunum.

Alex ók BMW M5 "Team Polizei" bifreið sinni þessa 4960 kílómetra leið á 31 klukkustund og var meðalhraði hans 145 kílómetrar á klukkustund og botnaði hann bílinn nokkrum sinnum í 257 km/klst. Bíllinn er vel búinn með staðsetningartækjum, radarvörum, myndbandsupptökutækjum og fleiru.

Ferðin var vel skipulögð fyrirfram með því að velja réttan tíma og rétta leið til þess að umferð á leiðinni yrði með sem minnstu móti. Síðan var ekið eftir hraðbrautum alla leiðina og reynt að lágmarka hættuna sem þessu uppátæki fylgir. Alex Roy hvetur fólk til þess að "reyna þetta ekki heima hjá sér". Þetta sé hættulegt og hefði geta orðið einhverjum sakleysum vegfaranda að bana á leiðinni. Alex Roy er líka einstaklega varfærinn ökumaður og hefur aðeins einu sinni fengið hraðasekt á síðastliðnum 5 árum. Svo vill hann náttúrulega eiga metið sitt áfram.

Hér má sjá Alex Roy og félaga fá lögreglufylgt út úr Firenze í Gumball 3000 kappakstrinum árið 2005:

Króm-Hjörturinn