Króm

Arctic Trucks setur nýtt heimsmet!

Guinness World Records hefur staðfest nýtt heimsmet Arctic Trucks, fyrir hraðamet yfir Suðurskautslandið að Suðurpólnum.

Í leiðandri sem farinn var fyrir Landfræðifélag Kazakhstan í desember síðastliðnum var tveimur Toyota Hilux AT44 Expedition bílum ekið 2.308 km leið frá Novo stöðinni að Suðurpólnum á einungis 108 klst. Meðalhraðinn var 21,4 km á klst og er það heimsmet í ferðahraða á þessu gríðarlega erfiða svæði. Fyrra metið var reyndar í höndum annars Íslendings, Gunnars Egilssonar sem ók 6 hjóla Ford Econoline á Suðurpólinn frá Patriot Hills.

Aðstæðurnar sem bílunum var ekið eru þær erfiðustu sem hægt er að finna á Jörðinni, með gríðarlegum kulda, mikilli hæð yfir sjávarmáli en leiðin lá í um 3.500 metra hæð, auk þess sem ekið var yfir ókönnuð sprungusvæði. Leiðangurinn heppnaðist mjög vel og er önnur sönnun þeirra yfirburða sem bílar Arctic Trucks búa yfir. 

Hlynur Sigurðsson, ökumaður og bifvélavirki við annan bílinn á Suðurpólnum. (Photo: Business Wire)

Arctic Trucks hefur verið að geta sér góðs orðs á erlendum vettvangi fyrir bíla sína, en frægasti leiðangur þeirra hingað til er væntanlega ferð James May og Jeremy Clarkson á Norðurpólinn í breyttum bíl frá Arctic Trucks. Þeim sama bíl ók James May síðan á glóandi hrauni á Fimmvörðuhálsi þegar gaus þar apríl í fyrra. 

“Það er vaxandi áhugi frá viðskiptavinum sem vilji skipta út hægari, eyðslufrekum beltisfarartækjum með hraðskreiðari, léttari og umhverfisvænni farartækjum. Við berum mikla virðingu fyrir hinu viðkvæmri náttúru suðurskautsins og farartæki okkar hafa opnað fyrir nýja möguleika fyrir rannsóknarleiðangra á Suðurskautinu." segir Emil Grímsson hjá Arctic Trucks.  

 

Leiðangurinn var skipulagður af Kazakhstan National Geographic Society (KNGS) og The Antarctica Company (TAC). Fjórir aðrir leiðangrar eru í bígerð, þar á meðal einn fyrir KNGS í breyttum Toyota Landcruiser þar sem leiðangurinn mun fagna 20 afmæli sjálfstæðis Kazakhstan 16. desember á Suðurpólnum og um leið 100 ára afmæli komu Amundsen og Scott til Suðurpólsins. Einn hinna leiðangranna er síðan á breyttum Toyota Tacoma bíl sem er sérstaklega smíðaður til þess að bæta heimsmetið sem Guinness var að staðfesta. Í þeim leiðangri verður ekið frá Patriot Hills, um 1.100 km leið.

Frekari upplýsingar um leiðangrana er að finna hér: The Arctic Trucks Expeditions

Króm-Hjörturinn

Veiddi Hummer upp úr tjörninni

Nú þegar öll vötn og tjarnir eru ísilagðar finnst mörgum freistandi að aka út á þær. En það fer ekki alltaf eins og planað er, eins og afi leikarans Travis Kraft komst að þegar hann var á veiðum í gegnum vök í Norður Dakota í Bandaríkjunum.

Afi Travis komst ásamt fjölskyldu sinni naumlega út úr bílnum þegar ísinn brotnaði undan honum þar sem hann var á akstri á annars þykkum og traustum ísnum. Í ljós kom að heit uppspretta var undir ísnum og hafði veikt hann til muna. Bíllinn sökk en lög kveða á um að fjarlægja verði bílinn strax. Þetta er myndbandið sem travis tók í björgunarleiðangrinum.

Króm-Hjörturinn

Svona fara menn yfir árnar í Taiwan

Þetta er myndband af nokkrum jeppakörlum í Taiwan að fara yfir ár - með því að láta sig fljóta:

Króm-Hjörturinn

Hjalti og Gísli í Arctic Trucks lýsa leiðangrinum

Hjalti og Gísli hjá Arctic Trucks munu í kvöld halda opið hús þar sem þeir segja frá þriggja mánaða löngum leiðangri sínum á Suðurpólinn. Hjalti og Gísli fóru með fjóra breytta Toyota Hilux bíla á Suðurpólinn og óku þeim yfir 6.000 km og urðu fyrstir til þess að aka fjórhjóladrifnum bílum á sjálfan Suðurpólinn. Hjalti er jafnframt eini maðurinn sem hefur ekið bíl bæði á Suðurpólinn og Norðurpólinn en 2007 ók hann með Jeremy Clarkson, James May og Richard Hammond frá Top Gear á Norðurpólinn.

Hér er nýtt myndband frá Suðurpólnum:

Þetta var alvöru svaðilför sem reyndi mikið á bæði menn og bíla og lentu þeir í ýmsum ævintýrum. Ferðin kostaði meðal annars 5 gírkassa, 6 öxla, 6 dempara, eina flugvél og þó nokkur kíló.

Ég hvet alla áhugamenn um fjallabíla og ferðalög að mæta upp í Arctic Trucks að Klettshálsi 3 kl. 20 í kvöld, miðvikudaginn 18. mars og sjá myndir úr ferðinni, heyra sögur og bera fram spurningar.

Hægt er að lesa ferðasöguna og skoða myndir og myndbönd á antarcticachallenge.com.

Króm-Hjörturinn

ps. Hægt er að skrá sig á viðburðinn á Facebook. Það er þó ekki nauðsynlegt.

Arctic Trucks komnir aftur í grunnbúðir eftir vel heppnaða pólferð

Undanfarna tvo mánuði hefur Arctic Trucks verið með bíla og starfsmenn á Suðurpólnum til þess að fylgja eftir Amundsen Omega3 gönguskíðakeppninni. Voru tveir breyttir Toyota Hilux bílar fluttir á Suðurskautslandið fyrir verkefnið sem hefur verið mjög krefjandi fyrir bæði áhöfn og bíla. Öxlar hafa brotnað og þola víst ekki að hlaðið sé 1,5 tonnum umfram leyfilega þyngd á pallinn, menn svitnað (þrátt fyrir allt að -45° frost), gírkassar gefið sig auk þess sem ein DC3 flugvél brotlenti á jöklinum þegar hún var að koma með varahluti. En bílarnir hafa sannað ágæti sitt og munu verða eftir á jöklinum í þjónustu rússnesku rannsóknarstöðvarinnar Novo.

Arctic Trucks áhöfnin er um þessar mundir að spila póker til að skera úr um það hver fær að fara í sturtu, nú þegar þeir eru loksins komnir á stað þar sem það er hægt. En vatnið dugar ekki fyrir alla. Og lyktin væntanlega eftir því ;)

Hægt er að lesa dagbók pólfaranna á antarcticachallenge.com.

Króm-Hjörturinn

Fyrsti lúxusjeppinn?

Það er enginn maður með mönnum nema hann eigi lúxusjeppa í dag. Fleiri og fleiri bílaframleiðendur hafa stokkið á lestina eins og Porsche, Audi, BMW og fleiri. En þetta er samt kannski ekki alveg jafn ný hugmynd og maður skyldi ætla, því í Rússlandi var framleiddur þessi ljómandi laglegi "sportjeppi" undir nafninu Pobeda, eða sigur. Ekki voru mörg eintök af þessum bíl framleidd, en þetta er samt bíll sem var fjöldaframleiddur en ekki heimasmíðaður.

Þannig að nú er enginn maður með mönnum nema hann komist yfir eintak að þessum sjaldgæfa Sovét-lúxus-sportjeppa (þið megið hringja í mig ef þið finnið einhvern, ég hefði gaman af því að prufukeyra hann ;)

Króm-Hjörturinn

(via englishrussia.com)

Volvo XC60 smájeppi á leið á markað

Volvo hefur ákveðið að opinbera myndir af XC60 smájeppanum frá Volvo sem frumsýna átti á bílasýningunni í Genf. Myndum af bílnum lak út á netið fyrir nokkrum dögum og í kjölfarið hefur Volvo ákveðið að gera fleiri myndir opinberar.

Volvo XC60 jeppinn þykir best heppnaða hönnun Volvo til þessa. Útlitseinkennin sem Volvo hefur verið að þróa í undanförnum módelum þykja mjög sterk í þessum bíl og á að vera hægt að greina að hér sé Volvo á ferð úr tvöfalt meiri fjarlægð en fyrri módel. Ég verð að taka undir það að þetta er mjög laglegur bíll og mun laglegri en margir af þeim "hálfjeppum" sem eru á markaðnum í dag og líta út eins og þeir hafi ekki hugmynd um hvort þeir eigi að vera skutbílar, smábílar eða jeppar.

Bíllinn er væntanlegur á markað í Evrópu í lok ársins en kemur ekki fyrr en í byrjun árs 2009 á Bandaríkjamarkað. Hugmyndin með bílnum er að ná í þann kúnnahóp sem Volvo er búinn að vera að byggja upp með S40 og C30 bílunum og að XC60 verði þar eðlilegt framhald. Bíll sem heldur einkennum sínum en getur samt meira.

XC60 er öruggasti bíllinn sem Volvo hefur sett á markað og er auk alls hefðbundins öryggisbúnaðar frá Volvo búinn svokölluðum City Safety búnaði sem bremsar bílinn sjálfkrafa þegar hætta er á árekstri á lítilli ferð. Á Bandaríkjamarkaði mun bíllinn verða með aldrifi og búinn T6 vél sem skilar 281 hestafli en ekki er búið að gefa upp hvaða vélar verða í bílnum á Evrópumarkaði. Engar verðupplýsingar hafa heldur komið fram.

Króm-Hjörturinn

Jeppi fyrir STÓR-fjölskylduna

Stórir jeppar hafa lengi einkennt götur Reykjavíkur. Stærstir þeirra eru líklegast Ford Excursion sem eru orðnir ansi vígalegir þegar þeir eru komnir á 46" dekk. En þeir eru samt bara písl miðað við Ford Alton mfg-650 XUV trukkinn. Byggður á F-650 pallbílnum/vörubílnum er búið að breyta þessum í bíl í risajeppa.

Bíllinn var sýndur á bílasýningunni í Chicago á dögunum og var þar með 7,2 lítra Caterpillar vél, 6 dyra, með veglegri innréttingu. Meðal þess sem er í innréttingunni eru 42 innbyggðir hátalarar, tvö 16" sjónvörp sem eru innbyggð í loftið auk eins 42" plasma sjónvarps. Nokkrir captain stólar eru um borð og gólfin eru harðviðargólf. Sem sagt, hinn fullkomni fjölskyldubíll :) Króm-Hjörturinn (via Autoblog)

Kloflangur teygjujeppi

Góð fjöðrun og mikil veghæð eru grundvallaratriði þegar klifra á yfir stokka og steina. Þessi kappi var ekkert að ráðast á garðinn þar sem hann er lægstur enda ekkert venjulegur bíll. Þetta er "Tuff Truck!"

Króm-Hjörtur
(Takk fyrir ábendinguna, Peve)

Jeep J8 - Willysinn aftur herjeppi

Jeep hefur ákveðið að leita uppruna síns og reima á sig herstígvélin. Á hergagnasýningu í London nú um helgina, sem lítið fór fyrir vegna bílasýningarinnar í Frankfurt, kynnti Jeep nýjan herjeppa, Jeep J8, sem byggir á Jeep Wrangler Unlimited jeppanum sem kynntur var á bílasýningunni í New York í fyrra og er að sögn Jeep besti "off-road" bíllinn á markaðnum.

Til þess að standast álag og kröfur sem gerðar eru til hernaðartækja hefur grindin verið styrkt í J8 jeppanum ásamt öxlum, bremsum og fjöðrun. Burðarþolið er þannig aukið í 1.339 kg. og jeppinn þolir meiri átök. Jeppinn mun verða búinn 2,8 lítra turbo-dísel vél sem skilar 158 hestöflum og dráttargetu upp á 3.500 kg. Jeppinn mun koma með 5 þrepa sjálfskiptingu. Loftinntakið á J8 jeppanum er búið sérstökum síum og snorkli á húddinu sem gerir jeppanum kleyft að aka í 76,2 cm djúpu vatni og standast akstur í sandstormum í allt að 5 klukkustundir.

Jeep J8 jeppinn verður boðinn bæði sem tveggja dyra pallbíll og fjögurra dyra fjölnotabíll og með stýrið hvort sem er hægra megin eða vinstra megin. Þó J8 jeppinn sé ekki hannaður fyrir fremstu víglínu er hann fyllilega fær um að vígbúast og má breyta honum í stjórnstöð, sjúkrabíl, fjarskiptabíl eða annað sem þörf er á, hvort sem er í hernaði eða við borgaralegar skyldur. Sérstyrktir stuðarar eru bílnum með krókum til þess að auðvelda flutning með þyrlum eða öðrum flutningatækjum.

Jeep J8 jeppinn verður framleiddur í verksmiðjum í Kaíró í Egyptalandi og er væntanlegur á markað vorið 2008. Á myndbandinu hér að neðan má sjá Wrangler Unlimited jeppann í torfærum.

Króm-Hjörturinn
(via WorldCarFans.com)