Króm

Leyndadómsfulli Peugeot-inn afhjúpaður á bílasýningunni í París

Það fór ekki framhjá neinum bílaáhugamönnum að verið væri að taka upp auglýsingu hér í sumar af mjög leyndardómsfullum bíl. Ég sá bílinn myndaðan fyrir utan 1919 í Hafnarstrætinu og setti fram þá kenningu að hér væri um að ræða H1 concept bílinn sem orðrómur væri um að ætti að kynna í fyrsta sinn á bílasýningunni í París. 

Bílasýningin opnaði núna um helgina og þar var hann kominn, hugmyndabíllinn sem var myndaður hér í síðasta mánuði undir nafninu HR1. Auglýsingin sem var tekin hér er jafnframt tilbúin og er hún birt hér í fyrsta sinn:

 

Hér er stutt myndband af bílnum sem tekið var á föstudaginn á bílasýningunni í París.

Bíllinn er sagður vera samruni litla borgabílsins, fjölnota jeppans og coupé bíls. Markhópurinn er hinn tæknivæddi og tískumeðvitaði borgabúi eða eins og þeir orða það sjálfir "young active city dwellers who are style gurus and technology buffs". Þar höfum við það. 

Bíllinn er mjög nýstárlegur og mun státa af öllum helstu nýjungum í tengingum og aðlögunarhæfni. Bíllinn verður hybrid4 bíll með 1.2 lítra bensínvél og 36 hestafla rafmótor. Þetta er annar bíllinn sem kynntur er í hinu nýja útliti þessa 200 ára gamla fyrirtækis, en fyrsti bíllinn var SR1 sportbíllinn. 

Króm-Hjörturinn

Peugeot H1 concept bíll myndaður á Íslandi

 

Ljósmyndari pressunnar náði í gær myndum af hugmyndabíl sem verið var að mynda við Smáralindina. Mikil leynd hvíldi yfir myndatökunum og var bíllinn hulinn til að ekki væri hægt að sjá útlit hans. Hér var á ferðinni hugmyndabíll frá Peugeot og eftir að hafa legið yfir myndunum hef ég komist að þeirri niðurstöðu að hér sé á ferðinni Peugeot H1 hugmyndabíllinn en orðrómur hefur verið um að frumsýna eigi hann á bílasýningunni í París í næsta mánuði. Enn hafa engar myndir verið birtar af bílnum og munu þetta vera fyrstu myndirnar sem nást af bílnum.

Peugeot H1 hugmyndabíllinn kemur í framhaldinu af hinum vel heppnaða Peugeot SR1 hugmyndabíl sem frumsýndur var í Genf í mars. Sá bíll markar upphaf nýrrar hönnunarstefnu hjá Peugeot og var um leið kynnt ný útgáfa af ljóninu, einkennismerki Peugeot, og nýtt slagorð Peugeot sem er Motion and Emotion.

 

Peugeot H1 bíllinn er hærri og styttri en SR1 bíllinn og er talinn vera systurbíll Citroen DS4 hugmyndabílsins sem kynntur var í Genf fyrr á árinu. Bæði Peugeot H1 og Citroen DS4 tilheyra "high rider" flokki sem eru rúmgóðir en fyrirferðalitlir fjölnotabílar, nokkurs konar "cross-over" á milli jeppa og smábíla.

 

Ísland hefur verið vinsælt land til að taka myndir af nýjum evrópskum bílum á undanförnum árum og það verður spennandi að sjá myndirnar af Peugeot H1 bílnum þegar þær verða birtar. Hér að neðan má sjá myndband með auglýsingunni "Winds of Change" sem tekin var hér á landi fyrir Peugeot 308 bílinn. 

Króm-Hjörturinn

Fallegustu bílar sögunnar keppa á Ítalíu

Fallegustu bílar sögunnar er árlega sýndir á sýningunni Concorso D'Eleganza á Ítalíu. Að þessu sinni stillti BMW, styrktaraðili sýningarinnar fram tveimur bílum sem vöktu sérstaka athygli. Annars vegar var það uppgerður BMW 328 sportbíll frá árinu 1940 en slíkur bíll hefur ekki sést á sýningu í áratugi. Ekki nóg með það, heldur frumsýndi BMW líka nýja endurgerð bílsins:

Ekki amalegir bílar þar á ferð :)

Króm-Hjörturinn

Viðtal við Henrik Fisker, hönnuð Fisker rafbílanna

Hinn danski bílahönnuður Henrik Fisker segir hér frá hugmyndafræðinni á bak við Fisker rafbílin sem hlotið hefur mikla athygli á undanförnum mánuðum. Fisker starfaði sem hönnuður hjá BMW og Aston Martin áður en hann ákvað að fara út í eigin bílaframleiðslu byggða á nýrri hugmyndafræði, sem virðist vera að falla í góðan jarðveg.

Króm-Hjörturinn

BMW Gina - taubíllinn!

BMW hefur enn og aftur brotið öll hefðbundin lögmál bílahönnunar í nýjasta hugmyndabílnum sínum, GINA. Bíllinn virðist í fljótu bragði vera ný týpa af Z4 bílnum en þegar betur er að gáð, þá kemur ýmislegt merkilegt í ljós.

Bíllinn er ekki klæddur áli eins og venja er. Utan um grind bílsins er strengdur dúkur sem gerir það að verkum að engin samskeyti eru á bílnum. Um leið er yfirborð hans breytilegt þannig að þegar ljósin eru slökkt sjást engin ljós. Þau birtast síðan eins og augu sem eru opnuð. Þegar hurðin er opnuð, sem opnast upp, þá eru engin hengsli eða samskeyti sem sjást, heldur krumpast efnið og sléttir úr sér aftur þegar hurðinni er lokað.

Ég mæli með því að þið skoðið myndbandið til þess að sjá hvernig þetta virkar í raun. Bíllinn er bara hugmyndabíll og hugsaður meira til þess að vera hönnuðum og verkfræðingum BMW innblástur heldur en að heilla almenning. Ég verð þó að játa að mér finnst þetta mjög heillandi hugmynd.

Króm-Hjörturinn
(via AutoBlog)

650 hestafla Ofur-Golf frá VW

VW kynnti þennan sportlega 650 hestafla VW Golf GTi W12 650 hugmyndabíl á dögunum. Þessi Golf á lítið sameiginlegt með þeim Golf bílum sem við sjáum hér á götunum. Hann er búinn 6 lítra W12 vél sem búið er að koma fyrir aftan við framsætin. Þessi vél skilar síðan 650 hestöflum niður í afturhjólin í gegnum 6 þrepa sjálfskiptingu.

Slík vél kemur bílnum í hundraðið á aðeins 3,7 sekúndum og hámrkshraði bílsins er 325 km/klst. Engar upplýsingar hafa verið gefnar upp um eyðsluna, enda er þetta ekkert nema sýningarbíll. Það er því engin ástæða til að hlaupa út í Heklu og panta einn 650 hestafla W12. Hann er ekki væntanlegur á markað.

 

Á myndbandinu hér að neðan má sjá afhjúpun bílsins:

Króm-Hjörturinn
(via AutoBlog.com)

6 hjóla ofursportbíll - Covini C6W

Hver segir að bílar þurfi að vera með fjögur dekk? Þessi ofursportbíll hefur sex dekk og það sem fæst út úr því eru öflugri bremsur, aukinn stöðugleiki og þægilegri stýring en bíllinn er búinn með fjórhjólastýri. Markmiðið er að auka öryggið án þess að það komi niður á afköstum eða getu bílsins. Covini C6W er yfir 400 hestöfl og nær yfir 300 km/klst.

   

Bíllinn er afkvæmi hönnunar og þróunar hjá Covini Engineering sem fæst aðallega við smíði hugmyndabíla. Meðal annarra verka Covini Engineering eru Corvette Callaway C7 sportbíllinn og Dragon Fly, tveggja sæta fisþyrla.

Króm-Hjörturinn   

Trabantinn væntanlegur aftur á markað

Hver man ekki eftir gamla góða trabbanum með smellnum sláttuvélahljóðunum og bláu eiturskýinu á eftir sér? Þessir bílar náðu heimsfrægð þegar þeir rúlluðu í þúsundatali yfir landamæri Austur- og Vestur Þýskalands eftir fall múrsins. Og nú geta meðlimir í klúbbnum "Skynsemin ræður" glaðst því að þessir 24 hestafla austur-þýsku bílar eru væntanlegir aftur á markað.

Það er Herpa bílaframleiðandinn sem á réttinn að framleiðslunni en bílaframleiðsla þeirra hingað til hefur samanstaðið aðallega af litlum módelbílum úr plasti sem notaðir eru til að búa til umhverfi um lestarþorp sem vinsæl eru í Evrópu.

Herpa stefnir á að kynna hinn nýja Trabant á bílasýningunni í Frankfurt á næsta ári en hefur nú þegar birt myndir af því hvernig þeir sjá bílinn fyrir sér. Þetta verður ekki sami bíllinn og síðast, en stenst hann engar öryggis- eða mengunarkröfur, heldur er hér um að ræða nýjan hagkvæman bíl sem ber sterk einkenni Trabantsins og sama nafn, en verður í samræmi við nútíma staðla. Hann verður fjögurra dyra og knúinn vél frá BMW. Og vafalítið eitthvað aðeins dýrari en forverinn en vonandi verður þó biðtíminn eftir honum einhverjum árum styttri. Fyrstu bílarnir eru væntanlegir á markað árið 2011.

   

Króm-Hjörturinn

(via Autounleashed.com)

Hljóðlausir rafbílar eru ekki sérlega töff

Það hefur verið vandamál með rafmagnsbíla og umhverfisvæna bila í gegnum tíðina að þeir hafa verið allt annað en töff. Þeir eru vanalegast ljótir, hljóma illa, svipta mann allri öryggistilfinningu og ganga almennt þvert á allt sem bílaáhugamenn leita eftir í góðum bíl.

Þetta virðist þó vera að breytast. Fisker Karma sportbíllinn er tvinnbíll sem er bæði með bensínvél og rafmótor. Útlitið ber með sér að þetta er sportbíll sem gefur öðrum bensíngleypandi sportbílum ekkert eftir. Hann hefur allt sem freistar bílaáhugamannsins alveg þangað til að hann er settur í gang. Þá bara heyrist ekki neitt. Það er ekki fyrr en þú hefur keyrt 50 mílur (um 80 km) að bensínvélin þarf að fara að hjálpa rafhleðslunni. Þannig að það er nú lítið fútt í að þenja hann á ljósum til að fá einhvern í spyrnu.

Hljóðið er mjög veigamikill þáttur í akstursupplifuninni. Flækjur gera sitt fyrir hljóðið á bílum og sem dæmi Harley Davidson hefur einkaleyfi á hljóðinu í mótorhjólunum sínum. Þannig að hvað gera bændur þá?

Jú, það sem er lógískast að gera. Henrik Fisker, hönnuður bílsins, hefur ákveðið að setja hátalarakerfi bæði inn í bílinn og allan hringinn utan á bílnum sem sendir út rétta hljóðið. Hljóðið er ekkert slor, heldur sambland af hljóði í formúlubíl og þotu. Hljómar eins og það geti verið töff hljóð, en ég hef samt mínar efasemdir um hvernig það virkar. Þetta hljómar svolítið "sílikon-legt". En staðreyndin er reyndar að flestir bílaframleiðendur í dag eiga við hljóðið í bílvélunum til að ná fram réttum áhrifum. Ef ég er á átta strokka bíl, þá á það að heyrast.

Ég hef því miður ekki hljóðdæmi, en þið getið í staðinn dáðst að útliti bílsins.

Króm-Hjörturinn

Chevy El Camaro pallbíll

Munið þið eftir gömlu Chevy El Camino pallbílunum frá áttunda áratugnum? Það voru aldrei margir á götunum hér á landi, en þó einhverjir. Og ég veit um alla veganna einn sem enn er til.

GM hefur ekki birt neinar áætlanir um að endurvekja slíkan bíl en það þýðir samt ekki að það sé ekki hægt að láta sig dreyma. Einn photoshop-fær bílaáhugamaður hefur teiknað hann upp eins og hann gæti litið út, byggður á hinum nýja Chevrolet Camaro. Sami framendi en pallur að aftan. Og það verður að segjast eins og er að útkomandi er bara ansi laglegur pallbíll.

Króm-Hjörtur

(via Autoblog)