Króm

Arctic Trucks komið á frímerki

Trukkurinn sem Arctic Trucks smíðaði fyrir ferð James May og Jeremy Clarkson til Norðurpólsins er nú búinn að vinna nýja sigra. Nýjasti áfangastaður þessa merkilega bíls, sem hafði meðal annars viðkomu á glóandi hrauni á Fimmvörðuhálsi er á frímerki!

Það er ekki íslenskt frímerki sem bíllinn prýðir heldur er hann í seríu frímerkja á eynni Mön ásamt fleiri óvenjulegum farartækjum sem gert hefur verið skil í Top Gear þáttunum. Í lýsingunni frá póstmálayfirvöldum á Mön segir þetta um útgáfu frímerkjanna:

"Þetta safn af öfgakenndum tólum á frímerkjum er til að heiðra einhverjar hugrökkustu og nýstárlegustu samgöngulausnir sem Clarkson, Hammond og May hafa skapað í gegnum stærstu áskoranir sínar í Top Gear þáttunum. OK, kannski virkuðu flestir þessara bíla ekkert sérlega vel. Sumir brunnu og aðrir sukku, stundum samtímis. En þau eru öll lýsandi fyrir akkúrat það sem gerir Bretland að fremstu þjóð Jarðar: nýsköpun, vinnugleði og heilbrigt virðingarleysi fyrir stærðfræði og nákvæmum mælingum. Smellið þeim á skattframtalið ykkar með stolti!"

Þess má geta að eyjan Mön er ein hinna bresku skattaparadísa og greinilegt að þeir taka sig ekkert allt of hátíðlega :)

Króm-Hjörturinn

Notað flugmóðurskip til sölu

Hefur þig alltaf dreymt um að eiga þitt eigið flugmóðurskip? Nú er tækifærið því að á edisposals.com, vefsíðu sem selur ýmislegt gamalt og notað, hefur breski herinn nú auglýst notað flugmóðurskip til sölu. 

Skipið sem um ræðir er HMS Ark Royal (Konunglega Örkin), 22.000 tonna flugmóðurskip sem hleypt var af stokkunum árið 1981 og hefur verið flaggskip breska flotans. Það hefur 1.000 manna áhöfn og hefur siglt 621.551 sjómílu. Skipið gengdi veigamiklu hlutverki í Bosníustríðinu og innrásinni í Írak. Þetta er fimmta skip breska flotans sem ber nafnið Ark Royal en það fyrsta var flaggskip breska flotans sem undir stjórn Sir Walter Raleigh sigraði flotann ósigrandi árið 1588. Frægt flugmóðurskip í seinni heimstyrjöldinni bar þetta sama nafn en því var sökkt skammt frá Gíbraltar 13. nóvember 1941. Alls hafa fjögur flugmóðurskip borið nafnið.

Hægt er að sækja um að fá að skoða gripinn sem liggur í Portsmouth fram til 27. apríl og tilboðum þarf að skila inn fyrir 13. júní næstkomandi. En það fær samt ekki hver sem er að kaupa skipið. "Við þurfum að fullvissa okkur um hæfi einstaklingsins eða samtakanna... þar með talið hvernig þeir hyggjast hýsa, viðhalda og losa sig við skipið áður en salan getur verið samþykkt," segir Tim Foreman talsmaður DE&S (Defense Equipment and Support).

Ýmsar hugmyndir eru uppi um hvernig megi nýta skipið, eins og t.d. sem þyrluflugvöll á Thames, fljótandi hótel og fleira.

 

Króm-Hjörturinn

ps. fylgist með nýjum greinum á Facebook með því að smella á "like".

Höfrungur engum öðrum líkur

Hefur þig langað til að geta synt eins og höfrungur, stokkið og snúið þér í sjónum á miklum hraða? Ekki málið:

Króm-Hjörturinn

Krómið er hluti af Vefjakrot.is og er einn mest lesni bílavefur landsins. Þú getur fengið greinarnar í RSS áskrift eða í tölvupósti með því að skrá netfangið þitt hérna efst til hægri.

Þotuknúinn slökkvibíll

Þessi slökkvibíll er líklegri til þess að kveikja elda en að slökkva þá. Hann er knúinn þotuhreyfli úr rússneskri MIG orrustuþotu. Og til að rýma fyrir mótornum er búið að fjarlægja vatnstankana.

Bíllinn er 2003 árgerð af Ferrera dælubíl og knúinn áfram með stærsta túrbínumótor sem er í nokkru farartæki á landi. Mótorinn er 9 metra langur og tæpir 2 metrar í þvermál. Ekki fylgdi sögunni hversu mörg hestöflin eru né hver hámarkshraðinn er, en hann ætti að vera snöggur á vettvang ef það kviknar í (ekki að það sé mikil hjálp í honum þar).

Aftan á slökkvilbílum af þessari gerð er vanalegast skilti sem á stendur "KEEP BACK 500 FEET". Það er víst fullátæða fyrir aftan þennan. Krafturinn er svo mikill að hann getur þeytt jeppa í fullri stærð um koll.

       

Króm-Hjörtur
(via Trend Hunter)

Fyrsti lúxusjeppinn?

Það er enginn maður með mönnum nema hann eigi lúxusjeppa í dag. Fleiri og fleiri bílaframleiðendur hafa stokkið á lestina eins og Porsche, Audi, BMW og fleiri. En þetta er samt kannski ekki alveg jafn ný hugmynd og maður skyldi ætla, því í Rússlandi var framleiddur þessi ljómandi laglegi "sportjeppi" undir nafninu Pobeda, eða sigur. Ekki voru mörg eintök af þessum bíl framleidd, en þetta er samt bíll sem var fjöldaframleiddur en ekki heimasmíðaður.

Þannig að nú er enginn maður með mönnum nema hann komist yfir eintak að þessum sjaldgæfa Sovét-lúxus-sportjeppa (þið megið hringja í mig ef þið finnið einhvern, ég hefði gaman af því að prufukeyra hann ;)

Króm-Hjörturinn

(via englishrussia.com)

Stórmerkilegur viðarbíll smíðaður í Úkraínu

Handlaginn úkraínskur heimilisfaðir sagði upp vinnunni, seldi bílana sína tvo og eyddi einu og hálfu ári í smíða þetta farartæki:

Afraksturinn er þessi stórglæsilegi spýtubíll sem er allur úr eik. Önnur hliðin er nútímaleg lúxusbifreið á meðan hin hliðin er gamaldags blæjubíll. Samt sem áður passa þeir glettilega vel saman. Þannig séð.

Undir vélarhlífinni er vél úr Opel 1981 sem skilar 100 hestöflum. Smiðurinn segist vera tilbúinn til að selja gripinn ef hann fær nægilega mikið fyir hann til þess að fjármagna næsta leyniverkefni sem hann er að byrja á í skúrnum sínum.

Króm-Hjörturinn (via Trendhunter)

Chevrolet Camaro sportbíll úr Lego kubbum

Langar þig í nýjasta Chevrolet Camaro sportbílinn? Það gerði Crowkiller líka og hann tók málin bara í eigin hendur. Eftir að hafa gramsað dágóða stund í kubbafötunni sinni var afraksturinn þessi glæsilegi Camaro sportbíll.

Bíllinn er smíðaður úr techno legokubbum og sagt er að hann geti gengið fyrir eigin vélarafli. Og það er ekkert draslu undir kubbahúddinu, heldur V8 lego vél sem er tengd við 6 gíra gírkassa með bakkgír. Smiðurinn kallar sig Crowkiller og merkilegt nokk, þá er hann ekki starfsmaður hjá Lego.

           

Hver segir svo að það sé ekki gaman að kubba?

Króm-Hjörturinn

Ofursportbíll úr tré - The Splinter

Ofursportbílar njóta almennt mikillar athygli enda mikið lagt í hönnun og þróun þeirra. Við höfum upp á síðkastið séð mikið af bílum úr kolefnistrefjum og sáum einn úr súkkulaði hérna um daginn. En sá var reyndar bara til átu.

27 ára gamall bandarískur hönnuður, Joe Harmon, hefur hannað mjög laglegan ofursportbíl með félögum sínum North Carolina State University. Bíllinn, sem hann kallar "The Splinter" eða "Flísin", er mjög nýtískulegur í útliti og á að ná allt að 240 mílna hraða eða um 380 km/klst. Það sem gerir þennan sportbíl frábrugðinn öðrum ofursportbílum er að hann er úr tré.

"Viður er virkilega frábær efni að vinna með" sagði Joe Harmon. "Það hefur hærri styrk miðað við þyngd en ál eða stál og býr yfir eiginleikum sem gerir margar mismunandi samsetningaraðferðir mögulegar. Útlitið, áferðin og lyktin af náttúrulegu efni eins og tré finnast ekki annars staðar og er ekki hægt að herma eftir. Og tilfinningin við að búa til eitthvað úr tré er frábær. Fólk er svo upptekið af því að halda að viður brenni eða brotni eða að það flísist upp úr honum af því að það sér ekki tré sem bara enn eitt byggingarefnið sem hefur sýna kosti og galla." 

Króm-Hjörturinn
(via Trendhunter)

Ferrari Formúlu 1 bíll úr súkkulaði

Einhverjir voru voða mikið að tala um formúlubíl úr eldspýtum um daginn. Ég gæfi nú ekki mikið fyrir slíkan bíl. Þá líst mér nú miklu betur á þennan Ferrari Formúlu 1 bíl sem er allur úr súkkulaði. Það er óneitanlega meira freistandi. Ef þú trúir því að stelpur falli fyrir strákum sem eiga sportbíla, þá hefurðu kannski rétt fyrir þér þegar hann er úr súkkulaði :)

En ég hef slæmar fréttir. Þessi girnilegi Ferrari súkkulaðiformúlukappakstursbíll var brotinn í spað og étinn af Ferrari formúlu liðinu núna um helgina. Og mér var ekki boðið :(

Hvað er að gerast?

Króm-Hjörturinn

Jeppi fyrir STÓR-fjölskylduna

Stórir jeppar hafa lengi einkennt götur Reykjavíkur. Stærstir þeirra eru líklegast Ford Excursion sem eru orðnir ansi vígalegir þegar þeir eru komnir á 46" dekk. En þeir eru samt bara písl miðað við Ford Alton mfg-650 XUV trukkinn. Byggður á F-650 pallbílnum/vörubílnum er búið að breyta þessum í bíl í risajeppa.

Bíllinn var sýndur á bílasýningunni í Chicago á dögunum og var þar með 7,2 lítra Caterpillar vél, 6 dyra, með veglegri innréttingu. Meðal þess sem er í innréttingunni eru 42 innbyggðir hátalarar, tvö 16" sjónvörp sem eru innbyggð í loftið auk eins 42" plasma sjónvarps. Nokkrir captain stólar eru um borð og gólfin eru harðviðargólf. Sem sagt, hinn fullkomni fjölskyldubíll :) Króm-Hjörturinn (via Autoblog)