Króm

Volvo XC60 smájeppi á leið á markað

Volvo hefur ákveðið að opinbera myndir af XC60 smájeppanum frá Volvo sem frumsýna átti á bílasýningunni í Genf. Myndum af bílnum lak út á netið fyrir nokkrum dögum og í kjölfarið hefur Volvo ákveðið að gera fleiri myndir opinberar.

Volvo XC60 jeppinn þykir best heppnaða hönnun Volvo til þessa. Útlitseinkennin sem Volvo hefur verið að þróa í undanförnum módelum þykja mjög sterk í þessum bíl og á að vera hægt að greina að hér sé Volvo á ferð úr tvöfalt meiri fjarlægð en fyrri módel. Ég verð að taka undir það að þetta er mjög laglegur bíll og mun laglegri en margir af þeim "hálfjeppum" sem eru á markaðnum í dag og líta út eins og þeir hafi ekki hugmynd um hvort þeir eigi að vera skutbílar, smábílar eða jeppar.

Bíllinn er væntanlegur á markað í Evrópu í lok ársins en kemur ekki fyrr en í byrjun árs 2009 á Bandaríkjamarkað. Hugmyndin með bílnum er að ná í þann kúnnahóp sem Volvo er búinn að vera að byggja upp með S40 og C30 bílunum og að XC60 verði þar eðlilegt framhald. Bíll sem heldur einkennum sínum en getur samt meira.

XC60 er öruggasti bíllinn sem Volvo hefur sett á markað og er auk alls hefðbundins öryggisbúnaðar frá Volvo búinn svokölluðum City Safety búnaði sem bremsar bílinn sjálfkrafa þegar hætta er á árekstri á lítilli ferð. Á Bandaríkjamarkaði mun bíllinn verða með aldrifi og búinn T6 vél sem skilar 281 hestafli en ekki er búið að gefa upp hvaða vélar verða í bílnum á Evrópumarkaði. Engar verðupplýsingar hafa heldur komið fram.

Króm-Hjörturinn

Knight Rider snýr aftur

Munið þið eftir honum, KITT 2000 úr Knight Rider sem gerði Hasselhoff frægan? Ég man ekki eftir honum enda orðin meira en 25 ár síðan. En KITT 3000 er að koma!

NBC sjónvarpsstöðin hefur gert sjónvarpsmynd í fullri lengd um hinn nýja KITT 3000. Myndin er sjálfstætt framhald af þáttunum og í staðinn fyrir að Pontiac TransAm leiki aðalhlutverkið þá er það Mustang Shelby GT 500 sem hefur tekið við því hlutverki. KITT er náttúrulega alveg ágætlega útbúinn með ríkulegum staðalbúnaði.

En ég efast um að hinn nýi Knight Rider geti slegið frummyndina út. Þið verðið að horfa á myndbandið hér að neðan, Jump in My Car með David Hasselhoff og KITT bílnum. Algjörlega óborganlegt myndband. Maðurinn er náttúrulega snillingur. Algjör f***ing snillingur!

Króm-Hjörturinn

(the Chrome-Stag and the Hoff)

Jeppi fyrir STÓR-fjölskylduna

Stórir jeppar hafa lengi einkennt götur Reykjavíkur. Stærstir þeirra eru líklegast Ford Excursion sem eru orðnir ansi vígalegir þegar þeir eru komnir á 46" dekk. En þeir eru samt bara písl miðað við Ford Alton mfg-650 XUV trukkinn. Byggður á F-650 pallbílnum/vörubílnum er búið að breyta þessum í bíl í risajeppa.

Bíllinn var sýndur á bílasýningunni í Chicago á dögunum og var þar með 7,2 lítra Caterpillar vél, 6 dyra, með veglegri innréttingu. Meðal þess sem er í innréttingunni eru 42 innbyggðir hátalarar, tvö 16" sjónvörp sem eru innbyggð í loftið auk eins 42" plasma sjónvarps. Nokkrir captain stólar eru um borð og gólfin eru harðviðargólf. Sem sagt, hinn fullkomni fjölskyldubíll :) Króm-Hjörturinn (via Autoblog)

Ford Mustang Bullitt 2008

Í kvikmyndin Bullitt sem gerð var árið 1968 með Steve McQueen í aðalhlutverki varð Mustanginn að goðsögn þar sem hann stökk upp og niður brekkurnar í San Francisco í grænum Ford Mustang. Í tilefni af því að 40 ár eru liðin frá því að myndin kom út hefur Ford ákveðið að setja á markað sérstyrkta keppnistýpu af Mustang sem þeir kalla Bullitt.

Bullitt Mustanginn er með sömu 4,6 lítra V8 vél og GT bíllinn en hins vegar er búið að tjúna hana upp svo hún skilar núna auka 15 hestöflum og er 315 hestöfl. Það hljómar kannski ekki mikil viðbót en það og hærri snúningur gerir gæfumuninn og skilar bílnum í hundraðið á aðeins 5.1 sekúndu. Grindin hefur verið styrkt, bíllinn lækkaður og sett ný stífari fjöðrun sem límir hann við götuna án þess að gera hann svo hastann að þú getir ekki notað hann þegar þú ferð á stefnumót. Innréttingin er stílhrein og sportleg með álplötum og sætin þau sömu og í Shelby GT500 bílnum. Bíllinn hefur verið strípaður af öllum vindkljúfum og hefðbundnum Mustang merkjum nema á felgunum og í staðinn er búið að koma fyrir Bullitt merkinu sem er nafnið í byssusigti. Afraksturinn er Ford Mustang Bullitt sem er klár fyrir keppnisbrautina en samt ennþá nægilega vel búinn til að hægt sé að nota hann á götum úti.

Króm-Hjörturinn

Ford Hydrogen Fusion 999 setur nýtt hraðamet

Ford tókst að brjóta blað í sögu bílsins þegar þeir settu hraðamet á saltsléttum Utah síðastliðinn miðvikudag. Liði Ford tókst að rjúfa 200 mílna múrinn og komu bílnum, sem knúinn er vetnisrafölum, á 207,297 mílna hraða eða 333,5 kílómetra hraða. Það er mesti hraði sem náðst hefur á hefðbundnum (svona nokkurn veginn) bíl knúnum vetnisrafölum.

Við óskum Ford til hamingju með þennan áfanga og hlökkum til að geta ekið á bílum knúnum efnarafölum á þessum hraða ;o) Í myndbandinu hér að neðan er hægt að sjá bílinn og fá útskýringu á hvernig hann virkar.

Króm-Hjörturinn

(Hægt er að lesa meira um bílinn á Autobloggreen.com)