Króm

Sportbílar í samdrætti

Það er enginn sem segir að maður eigi ekki áfram að geta notið þess góða og skemmtilega í lífinu þó maður þurfi að draga saman seglin. Það er nefnilega ekki magnið sem skiptir mestu máli heldur gæðin ;)

Sparneytnir smábílar eru heitustu bílarnir á markaðnum í dag en gallinn við þá er að þeir eru svo fj... "döll". Einn af þeim minnstu og sparneytnustu er Smart, bíllinn sem er svo lítill að þú getur lagt honum þvert í stæði. En til þess að það falli nú ekki á ímyndina, hvernig vær þá að skipta bara um yfirbyggingu á smartbílnum þannig að hann líti nú út eins og "alvöru-bíll".

Smart Corvette

Smart Lamborghini

Smart Ferrari

Og að lokum einn smart fyrir Íslenskar aðstæður - Smart Q3

Þeir eru svona næstum eins og þú gætir hafa fengið þá með barnamáltíðinni á McDonalds.

Króm-Hjörturinn

Krómið er hluti af Vefjakrot.is og er einn mest lesni bílavefur landsins. Þú getur fengið greinarnar í RSS áskrift eða í tölvupósti með því að skrá netfangið þitt hérna efst til hægri.

Ferrari Formúlu 1 bíll úr súkkulaði

Einhverjir voru voða mikið að tala um formúlubíl úr eldspýtum um daginn. Ég gæfi nú ekki mikið fyrir slíkan bíl. Þá líst mér nú miklu betur á þennan Ferrari Formúlu 1 bíl sem er allur úr súkkulaði. Það er óneitanlega meira freistandi. Ef þú trúir því að stelpur falli fyrir strákum sem eiga sportbíla, þá hefurðu kannski rétt fyrir þér þegar hann er úr súkkulaði :)

En ég hef slæmar fréttir. Þessi girnilegi Ferrari súkkulaðiformúlukappakstursbíll var brotinn í spað og étinn af Ferrari formúlu liðinu núna um helgina. Og mér var ekki boðið :(

Hvað er að gerast?

Króm-Hjörturinn

50 cent gripinn fyrir að ýkja bílasafnið sitt

Rapparinn 50 cent sýndi stoltur bílasafnið sitt í sjónvarpsþætti á MTV ekki alls fyrir löngu. Meðal bíla sem hann sýndi voru þrjár Ferrari bifreiðar, ein Enso, F50 og 599. Safn af bílum sem marga dreymir um að eiga en fæstir ná nokkurn tímann að eignast svo mikið sem einn af þessum bílum. En er því kannski eins farið fyrir 50 cent?

Því er haldið fram á spjallvefnum ferrarichat.com að samkvæmt innanbúðarmanni hjá Ferrari þá séu þessir bílar ekki í eigu 50 cent. Þeir eru skráðir á óþekktan bílasafnar sem hefur upphafsstafina S.C. Eini bíllinn sem 50 cent eigi af þeim sem hann sýndi svo stoltur á MTV sé Pontiac sportbíll sem er ekki mikið meira en amerískur verkamannasportbíll og hann eigi ekki nema 5 bíla sjálfur, sem er bara eins og meðalfjölskylda í Garðabænum.

Er 50 cent ekki allur þar sem hann er séður? Heitir hann kannski ekki einu sinni 50 cent? Hverju á maður þá að trúa, ef þetta er allt tilbúningur ;)

Þið getið séð umfjöllun FastLaneDaily um 50 cent og bílana hans á myndbandinu hér fyrir neðan:

Ferrari opnar skemmtigarð í Abu Dhabi

Í tilefni af Abu Dhabi Grand Prix keppninni sem haldin verður í Abu Dhabi í sameinuðu arabísku furstadæmunum árið 2009 hefur Ferrari ákveðið að reisa risastóran Ferrari-skemmtigarð. Í skemmtigarðinum verður að sjálfsögðu mikið af mjög hröðum rússíbönum og leiktækjum. Meðal annars verður þar að finna 70 metra háan G-Force turn og rússíbana sem er sagður fyrsti F-1 rússíbaninn þar sem tveir samhliða vagnar keppa hvor við annan. Einnig verða körtubrautir og sandbrautir fyrir buggy-bíla. Það má líka búast við því að hægt verði að kaupa eitt og annað merkt Ferrari. Líklegast langa leiðina hvað sem er. Við garðinn verður Formula 1 braut í fullri stærð auk hótela, íbúða, golfklúbba, snekkjuhafnar og annarra "nauðsynja".

Ætli ferð í garðinn með pabba verði ekki vinsælasta fermingargjöfin hjá strákum árið 2009?

Króm-Hjörturinn

Ferrari FXX Evoluzione

Ferrari kynnti um síðustu helgi nýjan Ferrari FXX sem þeir kalla Evoluzione. Þessi bíll er beint framhald af fyrri FXX bíl en það eru brautarbílar sem dyggir viðskiptavinir hafa fengið að reynsluaka á brautum Ferrari á meðan á hönnunarferli þeirra stendur til þess að gefa sitt mat á þeim breytingum sem verið er að gera. 20 viðskiptavinir voru valdir út til að taka þátt í prófununum en auk þeirra tók Michael Schumacher þátt. Það er nú óneitanlega meira spennandi að taka þátt í þannig könnun heldur en símakönnun Gallup á því hversu jákvætt viðhorf þú hefur í garð matvöruverslana.

Þegar breytingarnar á bílnum eru skoðaðar er ljóst að lengi getur gott batnað. Og best jafnvel líka. Meðal þeirra breytinga sem gerðar hafa verið að loftmótstaðan hefur verið minnkuð um 25% með því að setja nýja flappsa bæði að framan og aftan. Vélin er 6262 cc V12 vél sem skilar 860 hestum við 9.500 snúninga á mínútu, heilum 1.000 snúningum meira en á síðustu týpu. Gírskiptingunni hefur líka verið breytt og tekur nú aðeins 60 millisekúndur að skipta sem er framför um 20 millisekúndur. Ég er samt ekki viss um að maður finni muninn á hraðanum, því hvoru tveggja er rétt tæplega ljóshraði. Hámarkshraði bílsins er ekki gefinn upp.

FXX Evoluzione verður notaður næstu tvö árin á tólf viðburðum á brautum í Asíu, Evrópu og Norður-Ameríku. Það væri nú ekki ónýtt að fá að fara nokkra hringi.

Króm-Hjörturinn
(via Autoblog)