Króm

Evrópuráðið vill bensínlaust EU árið 2050

 
Mynd: John-Morgan / cc 

Evrópuráðið hefur lagt fram nýstárlega tillögu þar sem lagt er til að allar samgöngur á landi sem ganga fyrir jarðefnaeldsneyti verði bannaðar árið 2050. Mörgum þykir þetta róttæk tillaga sem muni senda EU aftur til hinna myrku miðalda, á meðan aðrir hafa bent á að ef ekkert verður að gert, muni fólk hvort eð er vera sent aftur til hinna myrku miðalda vegna þeirra einföldu staðreyndar að jarðefnaeldsneyti sé ekki endurnýjanleg orkuauðlind. 

Ekki er lagt til að ferðafrelsi fólks verði skert á nokkurn hátt, slíkt sé með öllu óraunhæft, en einnig er óraunhæft að halda áfram með það sem nú er notað. Því verði að bregðast við með þeim hætti að fólk geti aðlagast því. Árið 2050 hljómar kannski eins og það sé lengst inn í framtíðinni en þar sem verið er að ræða um stórfenglegar breytingar á daglegu lífsmynstri er líklegast ekki seinna vænna að grípa inn í. Fyrri tilraunir til þess að breyta lífsstíl fólks með því að láta það sjálft þurfa að hafa fyrir því hafa ekki gengið og ljóst að fólk hefur ekki sjálfsagann þegar aðrir auðveldari og þægilegri valkostir eru í boði. "Við getum losað samgöngur undan olíuþörfinni án þess að fórna skilvirkninni eða skerða ferðafrelsið. Þetta getur verið "win-win" segir Siim Kallas, samgönguráðherra EU. Þetta verður ekki ódýr aðgerð en áætlaður kostnaður er um 1,5 trilljón Evra en spurning er hvaða afleiðingar hinn valkosturinn hafi, að gera ekki neitt. 

Hægt er að lesa tillöguna í heild sinni í skjalinu "Roadmap to a Single European Transport Area"

Hjörtur
(via Treehugger.com)

 

 

Sporðdrekinn - Vetnisknúinn ofursportbíll

Vetnisbílar hafa ekið eftir götum Reykjavíkurborgar í nokkur ár núna, en þeir hafa fæstir verið sérlega spennandi fyrir augað. Við höfum haft strætisvagna, litla Benz bíla og Toyota Prius. En það eru til bílar sem ganga fyrir vetni og eru allt annað en ofurhagkvæmir í útliti.

Sporðdrekinn eða The Scorpion er vetnisknúinn ofursportbíll frá fyrirtækinu Ronn Motor Company í Texas í Bandaríkjunum. Fyrirtækið hefur unnið að þróun hagkvæmrar og skilvirkrar nýtingar á vetni en Sporðdrekinn er fyrsti bíllinn frá fyrirtækinu.

Sporðdrekinn er engin máttvana umhverfisdolla með sportröndum, hér er á ferðinni alvöru sportbíll sem fer í hundraðið á 3,5 sekúndum. Vélin er tvinnvél sem gengur bæði fyrir vetni og bensíni og eyðir bíllinn aðeins 5,8 lítrum á hundraði.

Bíllinn verður fáanlegur fyrir 150.000 dollara eða um 11 milljónir króna. Hingað kominn væri hann þá á um 20 milljónir króna. Ronn Motor Company eru byrjaðir að taka niður pantanir og reikna með að fyrstu bílarnir komi á götuna vorið 2009. Aðeins er áætlað að framleiða 200 eintök af þessum sérstaka sportbíl.

Hjörtur
Vefjakrot.is
(via Trendhunter)

Eldsneyti framtíðarinnar

Tvinnbílum fjölgar, búið er að opna etanóldælu hjá Olís í Álfheimum, hægt er að fá metangas upp á Höfða og opna á tvær metangasdælur í viðbót. Það eru augljóslega miklar þreyfingar á markaðnum í leit að eldsneyti framtíðarinnar. Eru olíufélögin að vaða villu eða er kominn tími til að þessir hlutir fari að breytast?

Hvað heldur þú að verði eldsneyti framtíðarinnar? Farðu inn á krom.is og taktu þátt í könnuninni og umræðunum um eldsneyti framtíðarinnar.

E85 eldsneytið komið til landsins

Útbreiðsla E85 eldsneytisins hefur gengið vel í Bandaríkjunum en þetta eldsneyti er 85% lífetanól og 15% bensín. Það þýðir að koltvísýringslosun er 80% minni en sem kemur frá venjulegum bensínbílum.

Mjög margir nýir bílar í Bandaríkjunum eru búnir svokölluðum E85 Flex fuel vélum sem ganga bæði fyrir þessu eldsneyti og venjulegu bensíni. Hér á landi hefur þetta hins vegar ekki verið í boði fyrr en í gær er forseti Íslands vígði fyrstu E85 dæluna við Olís í Álfheimum með því að dæla E85 eldsneyti á Ford C-Max bíl frá Brimborg.

Endanlegt lítraverð sem og verð á E85 bílum er enn ekki komið í ljós en stjórnvöld hafa þó sagt að E85 muni verða undanþegið gjöldum. Það ætti því að geta verið talsvert ódýrara en bensín hér á landi. Í Bandaríkjunum er verð á E85 svipað og á bensíni. Hægt er að fá flestar tegundir amerískra bíla með E85 Flex fuel vélum.

Króm-Hjörturinn
(via Brimborg)