BMW hefur enn og aftur brotið öll hefðbundin lögmál bílahönnunar í nýjasta hugmyndabílnum sínum, GINA. Bíllinn virðist í fljótu bragði vera ný týpa af Z4 bílnum en þegar betur er að gáð, þá kemur ýmislegt merkilegt í ljós.
Bíllinn er ekki klæddur áli eins og venja er. Utan um grind bílsins er strengdur dúkur sem gerir það að verkum að engin samskeyti eru á bílnum. Um leið er yfirborð hans breytilegt þannig að þegar ljósin eru slökkt sjást engin ljós. Þau birtast síðan eins og augu sem eru opnuð. Þegar hurðin er opnuð, sem opnast upp, þá eru engin hengsli eða samskeyti sem sjást, heldur krumpast efnið og sléttir úr sér aftur þegar hurðinni er lokað.
Ég mæli með því að þið skoðið myndbandið til þess að sjá hvernig þetta virkar í raun. Bíllinn er bara hugmyndabíll og hugsaður meira til þess að vera hönnuðum og verkfræðingum BMW innblástur heldur en að heilla almenning. Ég verð þó að játa að mér finnst þetta mjög heillandi hugmynd.
Króm-Hjörturinn
(via AutoBlog)
Rolls Royce mun væntanlega setja nýjan "lítinn" Rolls Royce á markað árið 2010. Enginn hefur enn séð hann en nokkrar njósnamyndir hafa þó náðst af gripnum í dulargervi. Hér má sjá mynd af honum á götum Munchen í Þýskalandi.
Bíllinn gengur undir nafninu RR4 og verður talsvert minni en Phantom bíllinn. Það þýðir samt alls ekki að hann verði lítill, bara að hann gæti hugsanlega rúmast í hefðbundinni innkeyrslu. Bíllinn mun væntanlega verða byggður á sömu grind og BMW 7-línan án þess þó að þeir verði líkir í útliti. RR4 rollsinn mun líkjast meira stóra bróður sínum þó að húddið verði aðeins styttra, grillið lægra og bíllinn augljóslega minni en um leið augljóslega Rolls Royce.
Hinir sameiginlegu eiginleikar RR4 með sjöunum frá BMW verða eingöngu þar sem ekki sést til. Vélin í bílnum verður sérútfærsla af annað hvort 407 hestafla 4,4 lítra twin-turbo V8 vélinni sem kemur í X6 bílnum frá BMW eða sérútfærsla af 441 hestafla 6,0 lítra V12 vélinni sem er fáanleg í 760 bílnum frá BMW. Það er samt enginn hætta á að hann verði búinn öflugri vél en 453 hestafla, 6,7 lítra V12 vélin sem Phantom bíllinn er með í dag.
Getgátur eru uppi að RR4 verði jafnvel boðinn með díselvél en Rolls Royce með díselvél er eitthvað sem hefur þótt óhugsandi hingað til. Það er þó talið raunhæfur möguleiki, ekki hvað síst þar sem Rolls Royce telur sig ekki þurfa að reiða sig eins mikið á eldri kúnna og áður vegna stórs hóps ungra auðjöfra.
RR4 mun kosta um 175.000 pund eða vel yfir 20 milljónir íslenskra króna. En það er ennþá nokkrum milljónum undir stóra bróður.
Króm-Hjörturinn (via autocar.co.uk)
Nýtt hraðamet var slegið nú um helgina í akstri þvert yfir Bandaríkin. Það var rallýökumaðurinn Alex Roy sem ók svokallaðan Cannonball Run kappakstur þvert yfir 13 fylki frá New York til Santa Monica í Californíu og bætti eldri met um meira en klukkustund sem var 32 klst. og 7 mínútur og er löngu orðið að goðsögn í Bandaríkjunum.
Alex ók BMW M5 "Team Polizei" bifreið sinni þessa 4960 kílómetra leið á 31 klukkustund og var meðalhraði hans 145 kílómetrar á klukkustund og botnaði hann bílinn nokkrum sinnum í 257 km/klst. Bíllinn er vel búinn með staðsetningartækjum, radarvörum, myndbandsupptökutækjum og fleiru.
Ferðin var vel skipulögð fyrirfram með því að velja réttan tíma og rétta leið til þess að umferð á leiðinni yrði með sem minnstu móti. Síðan var ekið eftir hraðbrautum alla leiðina og reynt að lágmarka hættuna sem þessu uppátæki fylgir. Alex Roy hvetur fólk til þess að "reyna þetta ekki heima hjá sér". Þetta sé hættulegt og hefði geta orðið einhverjum sakleysum vegfaranda að bana á leiðinni. Alex Roy er líka einstaklega varfærinn ökumaður og hefur aðeins einu sinni fengið hraðasekt á síðastliðnum 5 árum. Svo vill hann náttúrulega eiga metið sitt áfram.
Hér má sjá Alex Roy og félaga fá lögreglufylgt út úr Firenze í Gumball 3000 kappakstrinum árið 2005:
Króm-Hjörturinn
Nýlistasafnið í San Fransisco hefur sett upp stóran frystiklefa inn á safninu fyrir nýjasta listaverk Ólafs Elíassonar. Um er að ræða vetnisknúinn bíl sem er smíðaður úr ís. Bíllinn er hluti af sýningu listasafnsins á verkum Ólafs Elíassonar undir nafninu "Your Tempo: Olafur Eliasson".
Bíllinn er hluti af seríu listaverka sem BMW hefur fengið ýmsa listamenn til þess að hanna og er Ólafur Elíasson þar í hópi með mönnum eins og Andy Warhol. Þessi er sá framúrstefnulegasti og óvenjulegast sem ég hef séð. Hingað til hefur listamönnunum verið falið að skreyta hefðbundinn BMW með því að mála hann og skreyta en í þetta sinn hefur Ólafur Elíasson tekið H2R vetnis-kappakstursbílinn, rifið af honum alla klæðninguna og búið til nýja úr ís. Bíllinn er smíðaður úr áli, ryðfríu stáli og ís utan um grindina úr H2R vetnisbílnum. Um 2.000 lítrum af vatni var úðað yfir bílinn á nokkrum dögum til þess að búa til lag af ís utan um hann.
Að sögn BMW var markmiðið að breyta iðnhönnun í listaverk sem endurspeglar samband bílaiðnaðarins og hækkunar á hitastigi jarðar. Sýningin á bílnum stendur yfir frá 8. september til 13. janúar 2008.
Þú getur sagt álit þitt á bílnum inn á spjallþráðunum.
Króm-Hjörturinn
(via Autobloggreen.com)
Viltu fá greinar af Króminu í ókeypis áskrift í tölvupósti?
Skráð þá netfangið þitt í reitinn hérna til hægri.
Þá eru komnar myndir frá Frankfurt af BMW X6 hugmyndabílnum. Virkilega glæsilegur bíll!
Á myndunum má sjá annars vegar bensínútfærsluna af bílnum (svartur) og hins vegar tvinnbíl (silfraður).
Á síðustu tveimur myndunum má sjá muninn á afturendanum á tvinnbílnum eftir því á hverju hann keyrir. Á efri myndinni er opið fyrir pústið meðan hann keyrir á bensínvélinni en þegar skipt er yfir á rafmagnið lokast fyrir pústið.
Króm-Hjörturinn
