Síðastliðna þrjá sunnudaga hef ég sýnt ykkur myndbönd af bílum í árekstrarprófunum og hvernig þeim hefur reitt af. Eitt af því sem ég benti á í tengslum við fyrsta myndbandið var hversu miklu máli þyngdin skiptir í árekstri og hvernig hún veldur því að stærri bílar verða alltaf öruggari, sama hvað búnaði fer mikið fram.
Í myndbandinu hér að neðan má meðal annars sjá stóran bens og lítinn smart lenda beint framan á hvorum öðrum. Beint á eftir má sjá bíla sem lenda í útblæstrinum frá Júmbóþotu. Og ýmislegt fleira:
Jiangling Landwind jeppinn er einn af þessum kínversku bílum sem hafa verið að reyna að komast inn á Evrópumarkað. Hann var settur í gegnum árekstrarpróf NCAP og kolféll. Fylgist með því hvernig stýrið þrýstist upp og beint í höfuðið á árekstrardúkkunni. Og svo hélstu að þú værir í slæmu starfi ;)
Það er kannski ekki skrýtið að dánartíðnin í umferðinni í Kína sé með því hæsta sem gerist í heiminum.
Króm-Hjörturinn
Ef þú átt mörg börn, þá þarftu stóran bíl. Hér á landi velur fólk oftast jeppa á meðan MPV bílar njóta mikilla vinsælda í Evrópu og Ameríku. Það eru bílar eins og Dodge Grand Caravan, Toyota Previa o.fl.
Fifth Gear í Bretlandi gerði prófun á notuðum Land Rover Discovery jeppa og Renault Espace. Þið getið séð útkomuna hér að neðan:
Síðast sáum við Smart smábílinn í árekstrarprófi. Hann stóð sig frábærlega, þó að farþegarnir hefðu kannski ekki komið eins vel út.
Kínverjar hafa verið í mikilli uppsveiflu undanfarið og mun fleiri vilja eignast bíla þar. Innlend framleiðsla á bílum hefur þar af leiðandi vaxið mikið og nú eru kínverskir bílar farnir að berast inn á evrópskan markað. Bílarnir líta vel út og eru á mjög góðu verði. En eru þeir eins góðir? Ég legg til að þið horfið á þetta myndband af hinum kínverska Brilliance í árekstrarprófi:
Takið eftir því hvernig hurðin fer og ramminn fyrir ofan hana og framrúðan öll. Munið þið hvernig Smart bíllinn leit út í myndbandinu sem ég sýndi síðasta sunnudag? Og það var samt eftir árekstur á talsvert meiri hraða en þessi bíll var á.
Til samanburðar þá skulum við líta á hvernig aðrir bílar í sama stærðarflokki koma út í sama prófinu. Hér er myndband af Lexus 300 sem kom best út úr prófinu:
Takið eftir því hvernig hurðin virðist óskemmt og fjarlægðin frá stýri að bílstjóra virðist óbreytt. Farþegarýmið aflagast ekki heldur tekur krumpusvæðið fyrir framan við öllu högginu eins og það á vera.
Ég ætla að vona að það fái ekki einhver þá flugu í höfuðið að fara að flytja inn ódýra bíla frá Kína neitt á næstunni.
Króm-Hjörturinn
Umræðan um öryggi í umferðinni og litla bíla á móti stórum bílum, þá eru sumir sem halda því fram að það muni miklu um öryggið. Aðrir segja að öryggi smábílanna sé orðið það mikið að það breyti engu upp á öryggið. Ökumenn smábíla virðast margir eiga erfitt með að mæta hinum stóru bílum vegna óöryggis og sumir ganga jafnvel svo langt að krefjast þess að jeppar séu bannaðir í þéttbýli.
Í myndbandinu hér að neðan var gerð tilraun á því hvernig tveir smábílar, annars vegar Smart smábíllinn og hins vegar Opel Corsa stóðu sig í árekstri við steypublokkir á 70 mílna hraða (um 115 km/klst). Bílarnir stóðu sig ótrúlega vel og framleiðendunum virðist hafa tekist að ná fram hámarksöryggi farþega í bílunum. Þið getið séð myndbandið hér fyrir neðan:
Farþegarýmið lifir af áreksturinn á svo miklum hraða. Hins vegar þolir líkaminn ekki að stöðva svona hratt. Heilinn og önnur líffæri þrýstast fram og springa (án þess að ég ætli að fara að lýsa því eitthvað nánar).
En hvað þýðir þetta fyrir stóra bíla? Þó að krumpusvæðið sé lengra og dempi höggið verulega, þá gildir nokkurn veginn það sama ef þú keyrir á vegg og staðnæmist á punktinum. Líkaminn þolir ekki höggið þó að bíllinn geri það.
En eru bílar þá jafn öruggir hvort sem þeir eru litlir eða stórir? Nei. Og það er einföld eðlisfræði sem veldur því. Ef stór bíll og lítill bíll lenta framan á hvorum öðrum, þá verður annar bíllinn að víkja. Sá bíll víkur sem kemur af minna afli inn í áreksturinn og í flestum tilfellum er það léttari bíllinn. Undantekning frá því er ef stóri bíllinn er kyrrstæður og litli bíllinn á mikilli ferð. En ef annar bíllinn er 2 tonn og hinn 700 kíló, þá er eins og þeim litla sé ekið á vegg, á meðan stóri bíllinn heldur áfram í sína átt og farþegarnir þar verða fyrir mun minna höggi.
Engu að síður, þá er frábært að sjá hversu vel smábílarnir standa sig. Ég ætla samt ekki að fá mér einn slíkan.
Hinn fjögurra dyra Porsche fólksbíll/sportbíll Panamera sem væntanlegur er á markað 2010 náðust í reynsluakstri við vetraraðstæður nú í upphafi árs. Þið getið séð hann á þessu myndbandi:
Við eigum eflaust eftir að sjá nokkra svona á götunum hér.
Toyota Hilux var tekinn í elgsprófið sem er framkvæmt af Teknikens Värld tímaritinu í Svíþjóð en það bílapróf komst í heimsfréttirnar fyrir tíu árum síðan þegar hinn nýi Mercedes Benz A-klassi valt í prófinu. Teknikens Värld var að bera saman pallbílana MMC L-200 og Hilux og settu þá báða í gegnum elgsprófið. Sá fyrr fór vel í gegnum það en sá seinni var nærri oltinn.
Nýi Hiluxinn hefur fengið mýkri fjöðrun til að verða "fjölskylduvænni" en í honum er ekki svo kallaður ESP stöðugleikabúnaður sem kominn er í flesta fjölskyldubíla í dag. Niðurstaðan er því sú að nýi Hiluxinn reynist vera hættulega valtur bíll og nokkuð ljóst að bílar af þessari gerð eiga eftir að velta í umferðinni þegar fólk þarf snögglega að víkja frá hindrunum. Hvort sem það eru elgir eða annað.
Daniel Frodin ritstjóri TV fer hörðum orðum um Hiluxinn og krefst þess að ESP búnaði verði komið fyrir í öllum slíkum bílum, seldum og óseldum. Þangað til það hefur orðið ráðleggja þeir fólki sterklega frá því að kaupa Hilux.
Ferrari kynnti um síðustu helgi nýjan Ferrari FXX sem þeir kalla Evoluzione. Þessi bíll er beint framhald af fyrri FXX bíl en það eru brautarbílar sem dyggir viðskiptavinir hafa fengið að reynsluaka á brautum Ferrari á meðan á hönnunarferli þeirra stendur til þess að gefa sitt mat á þeim breytingum sem verið er að gera. 20 viðskiptavinir voru valdir út til að taka þátt í prófununum en auk þeirra tók Michael Schumacher þátt. Það er nú óneitanlega meira spennandi að taka þátt í þannig könnun heldur en símakönnun Gallup á því hversu jákvætt viðhorf þú hefur í garð matvöruverslana.
Þegar breytingarnar á bílnum eru skoðaðar er ljóst að lengi getur gott batnað. Og best jafnvel líka. Meðal þeirra breytinga sem gerðar hafa verið að loftmótstaðan hefur verið minnkuð um 25% með því að setja nýja flappsa bæði að framan og aftan. Vélin er 6262 cc V12 vél sem skilar 860 hestum við 9.500 snúninga á mínútu, heilum 1.000 snúningum meira en á síðustu týpu. Gírskiptingunni hefur líka verið breytt og tekur nú aðeins 60 millisekúndur að skipta sem er framför um 20 millisekúndur. Ég er samt ekki viss um að maður finni muninn á hraðanum, því hvoru tveggja er rétt tæplega ljóshraði. Hámarkshraði bílsins er ekki gefinn upp.
FXX Evoluzione verður notaður næstu tvö árin á tólf viðburðum á brautum í Asíu, Evrópu og Norður-Ameríku. Það væri nú ekki ónýtt að fá að fara nokkra hringi.
Þetta er myndbandið sem stjörnurnar sáu ekki. Alla veganna ekki Britney Spears. Hér er kennt í tíu einföldum skrefum hvernig eigi að stíga út úr bíl sé maður (eða kona) klæddur stuttum kjól eða pilsi. (og þá er ekki verið að meina aðferð ljósknanna í Hollywood sem skildu nærbuxurnar bara eftir heima til þess að enginn sæi þær þegar þær færu á djammið).
Jay Leno var fenginn til að hlaupa í skarðið um daginn í bílaprófunum. Bíllinn sem var prófaður var ekki af verri endanum, nýi Dodge Charger lögreglubíllinn. Lögreglan hefur lengi verið á Ford Crown Victoria sem við þekkjum vel úr sjónvarpi. Áður en lögreglan fór að aka um á Fordunum var hún á stórum Dodge bílum, eins og Polara, sem knúinn var mjög öflugri 440 kúbika vél sem gerði bílinn að einum hraðskreiðasta bílnum á götunum í Bandaríkjunum. Aðeins Corvettan komst hraðar.
Nú hefur lögreglan aftur leitað til Dodge eftir öflugum hraðskreiðum bíl fyrir lögreglueltingaleiki, sem O.J. Simpson hefur gert svo vinsæla. Þetta er bíllinn sem í Navy CIS ók um á ef þið munið eftir honum (nema hvað þeir voru ómerktir). Bíllinn er knúinn sömu vél og Durangoinn minn, 5,7 lítra V-8 HEMI vél sem skilar yfir 340 hestöflum. Chargerinn er hins vegar talsvert léttari og með HEMI vélinni kemurðu honum í hundraðið á aðeins sex sekúndum. Ekki nóg með að Chargerinn sé snöggur heldur er hann búinn fjöðrun frá Mercedes líkt og SRT-8 sportútgáfan og betrumbættum bremsum. En það sem væntanlega er stærsti sölupunkturinn í þessum bíl eru kleinuhringjahaldararnir. Mestur tími lögreglunnar fer jú í að borða kleinuhringi á meðan hún bíður eftir að eitthvað spennandi gerist, ekki satt?
Jay Leno þótti ekki leiðinlegt að prufukeyra Dodge-inn, ekki síst vegna þess hvernig umferðin brást við honum.
I’ve never had a cop car, so having Dodge’s new Charger police car for a few days has been a hoot. It’s quite fun driving this around because it’s fun to watch other people. On the freeway, if you’re going 70, suddenly everyone around you is doing 65, even though it says Dodge City Police on the side and has a big sign saying “Out of service”. Nobody actually reads the badge on the car. Then they spot me in it and they wave, or give me the finger.
Gaman hjá Leno í lögguleik. Hér að neðan má sjá úttekt á bílnum:
Þú getur fengið reglulegar uppfærslur í tölvupósti af þessari síðu með því að skrá netfangið þitt hér að neðan. Þá missirðu ekki af neinu.
Áskriftin er ókeypis og þú getur afskráð þig hvenær sem er.
