Króm

Verður Range Rover undirmerki indverska bílaframleiðandans Tata?

Óstaðfestar fregnir herma að indverski bílaframleiðandinn eigi besta boðið í bresku lúxusbílamerkin Jagúar og Land Rover. Tata er stórt merki á heimamarkaði á Indlandi þar sem þeir framleiða bæði smábíla, jepplinga, vörubíla og rútur. En minna hefur farið fyrir Tata á Bretlandsmarkaði eða annars staðar í Evrópu.

Tata hefur hins vegar náð að vekja talsverða athygli á bílasýningum á þessu ári þar sem þeir hafa kynnt nýja framúrstefnulega bíla. Annars vegar var það ódýrasti bíll heims, smábíll sem er hugsaður fyrst og fremst fyrir Indlandsmarkað. Hins vegar var það smábíll sem gengur fyrir lofti.

Það er hins vegar spurning hvaða áhrif það muni hafa á ímyndina að Jagúar og Land Rover verði í eigu Tata. Sjarminn gæti aðeins dottið niður við það að næsti Range Rover heiti fullu nafni Tata Range Rover.

Króm-Hjörturinn

Tóbaksvarnarlögum beitt á bíla?

Umhverfisnefnd Evrópuþingsins hefur samþykkt að 20% af hverri auglýsingu bílaframleiðanda fari undir umfjallanir um koltvísýringsmengun og skaðsemi hennar. Tillaga umhverfisnefndarinnar fer síðan fyrir Evrópuþingið í næsta mánuði en hún þarf samþykki þingsins til að verða að veruleika samkvæmt fréttum Viðskiptablaðsins í dag.

Bílaframleiðendur eru ekki par hrifnir af þessari hugmynd og segja hana algjört bull. Chris Davis, Evrópuþingmaður fyrir frjálslynda demókrata í Bretlandi og flutningsmaður tillögunnar, segir bílaframleiðendur ekki hafa staðið við samkomulag um að minnka losun koltvísýrings heldur sóst eftir hagnaði.

"Að gefa í skyn að við séum að búa til vöru sem eyðileggur jörðina og þurfi því að lúta sömu höftum og jafn augljóslega mannskemmandi vara og tóbak, er bara fyrirsagnalátalæti. Þetta er of langt gengið" segir Nigel Wonacott talsmaður samtaka bílaframleiðenda og bílasala í Evrópu.

Kannski við megum því eiga von á myndum af hóstandi ungabörnum í púströrahæð og drukknandi ísbjörnum á Norðurpólnum sem hluta af bílaauglýsingum í framtíðinni.

Króm-Hjörturinn

ps. Þú getur sagt þitt álit á þessum lögum á spjallborðinu.