Króm

Sportbílar í samdrætti

Það er enginn sem segir að maður eigi ekki áfram að geta notið þess góða og skemmtilega í lífinu þó maður þurfi að draga saman seglin. Það er nefnilega ekki magnið sem skiptir mestu máli heldur gæðin ;)

Sparneytnir smábílar eru heitustu bílarnir á markaðnum í dag en gallinn við þá er að þeir eru svo fj... "döll". Einn af þeim minnstu og sparneytnustu er Smart, bíllinn sem er svo lítill að þú getur lagt honum þvert í stæði. En til þess að það falli nú ekki á ímyndina, hvernig vær þá að skipta bara um yfirbyggingu á smartbílnum þannig að hann líti nú út eins og "alvöru-bíll".

Smart Corvette

Smart Lamborghini

Smart Ferrari

Og að lokum einn smart fyrir Íslenskar aðstæður - Smart Q3

Þeir eru svona næstum eins og þú gætir hafa fengið þá með barnamáltíðinni á McDonalds.

Króm-Hjörturinn

Krómið er hluti af Vefjakrot.is og er einn mest lesni bílavefur landsins. Þú getur fengið greinarnar í RSS áskrift eða í tölvupósti með því að skrá netfangið þitt hérna efst til hægri.

Á bak við tjöldin í Iron Man - Audi R8 og Q7

Eins og glöggir bílaáhugamenn hafa vafalítið tekið eftir leika Audi bílar stór hlutverk í Iron Man myndinni. R8 bíllinn er augljóslega uppáhalds farartæki söguhetjunnar þó í skúrnum hjá honum megi einnig sjá bíla eins og Shelby Cobra, Saleen S7 og Tesla rafmagnssportbílinn. Q7 bíllinn leikur svo stórt hlutverk í einu bardagaatriðanna.

John Favreau, leikstjóri Iron Man myndarinnar útskýrir hér áhættuatriðin með R8 og Q7 bílana frá Audi í aðalhlutverki.

Ekki slæm auglýsing.

Króm-Hjörturinn   

Reynsluakstur á Audi R8 sportbílnum

Hvað segiði um að reynsluaka Audi R8 sportbílnum? Ég var að hugsa um að gera það en þar sem ég fann engan R8 til að taka í, þá ákvað ég að leyfa Joe Wiesenfeldt hjá cars.com að taka að sér. Þið getið kíkt á það hérna:

Með góðum vilja og ásetningi, þá er nú alveg hægt að sjá að þetta sé upplagður bíll fyrir íslenskar aðstæður. Ég meina, það eru nú ekki margir aðrir þar sem ís og snjór er bræddur af afturrúðunni með hitanum frá vélinni.

Króm-Hjörturinn
ps. hvernig ætli árekstrarvörnin hljómi þegar ekið er í djúpum snjó?

Myndum af Audi R8 V12 TDI lekið á netið

Audi mun frumsýna nýjan R8 sportbil á bílasýningunni í Detroit með V12 díselvél. Eitthvað gengur Audi illa að halda leynd yfir bílnum því í gær birtist myndband á rússneskri bilasíðu af bílnum, og í dag birtum við það.

Audi-inn er með 500 hestafla V12 díselvél sem skilar bílnum á um 300 km/h og er ekki nema 4,2 sekúndur í hundraðið. Samt sem áður eyðir þessi díselbíll ekki nema um 10 lítrum á hundraði. Ekki er vitað mikið um bílinn enn sem komið er en búist er við honum í framleiðslu um mitt árið 2009.

Króm-Hjörturinn (via Autoblog.com)

Loksins blæjubíll fyrir íslenskar aðstæður

Í staðinn fyrir Q5 hugmyndajeppann frá Audi sem er ætlað að keppa við X3 bílinn frá BMW frumsýndi Audi Cabriolet Quattro, fjórhjóladrifinn blæjubíl sem er einhvers konar samblanda af TT og Q7, á bílasýningunni sem nú stendur yfir í LA. Bíllinn er upphækkaður og með fjórhjóladrif, á grófum dekkjum og ansi verklegur af blæjubíl að vera.

Vélin í honum verður 240 hestafla díselvél sem kemur bílnum í hundraðið á 7,2 sekúndum. Þú getur líka smellt á spar-hnapp sem dregur úr eldsneytisnotkun um 10%. Ekki var samt gefið upp hver hún væri. Að innan er bíllinn búinn fullkomnum staðsetningarbúnaði sem notar Google Earth sem grunn. Vindhljóð er alltaf smá vandamál þegar blæjan er niðri, ekki síst í íslensku "hafgolunni", og til að bregðast við því hefur Audi útbúið bílinn með fullkomnum græjum frá Bang&Olufsen sem pikka upp raddir og magna þær upp í hátalarakerfinu svo þær heyrist betur.

Ég get alveg séð fyrir mér að þessi eigi eftir að verða vinsæll hjá íslenskum skólakrökkum. Ímyndið ykkur bara þægindin þegar verið er að fara í skólann á köldum vetrarmorgnum og í staðinn fyrir að vera með miðstöðina á fullu til að ná einhverju af framrúðunni þá skellirðu bara niður blæjunni og lætur gusta vel um hana.

Króm-Hjörturinn
(via AutoBlog.com)

Nýr Audi A4 - fyrstu myndir

Fyrstu myndir af væntanlegum Audi A4 láku út á netið í fyrradag, og í kjölfarið hefur Audi birt opinberar myndir af bílnum, sem við birtum hér.

Nýi bíllinn er stærri en fyrirrennarinn, eða um 4,7 metrar, með aukið fótarými, stærra skott og lengra á milli hjóla. Bíllinn er jafnframt búinn ýmsum aukabúnaði sem hingað til hefur aðeins verið fáanlegur með A6 og A8 bílunum. Loftmótsstaðan minnkar og þrátt fyrir aukna stærð er bíllinn léttari en fyrirrennari. Það þýðir betri bensínnýting og aukin hröðun enda er nýi A4 aðeins 6.1 sekúndu í hundraði með 240 hestafla, 3,0 lítra V6 TDI díselvél. Vel af sér vikið það.

Bíllinn verður formlega frumsýndur í Frankfurt í næsta mánuði og er væntanlegur á markað í Þýskalandi í nóvember.

Króm-Hjörturinn
(þið getið lesið meira og séð fleiri myndir á WorldCarFans.com)