Grænjaxlinn

Óhuggulegasta myndin á Sundance Film Festival

Heimildarmyndin FLOW var valin óhuggulegasta myndin á Sundance kvikmyndahátíðinni af Wired tímaritinu. Myndin er heimildarmynd eftir Irena Salina og fjallar um vatn. Vatn sem almannaeign og vatn sem einkaeign. Eru stórfyrirtæki að þurrka upp vatnsból frá íbúum til þess að geta selt það á flöskum? Skortur á vatni er af mörgum talið verða stærsta vandamál heimsins á 21. öldinni.

Getum við heimfært eitthvað af þessari umræðu yfir á vatnsumræðu og eignarétt á vatni á Íslandi? Eiga bændurnir vatnið í ánum sem eru að fá hundruðir milljóna fyrir afnotaréttinn af vatninu? Eiga orkuverin vatnið sem selja okkur afurð þess, orkuna? Ef þetta er okkar eign, er réttlátt að leggja aukna skatta á afnotin af afurðum þess? Hvað finnst þér? 

Hjörtur

Burma fyrir og eftir fellibylinn

Á myndunum hér fyrir neðan má sjá hvaða áhrif fellibylurinn hafði á Burma. Efri myndin er tekin 15. apríl og neðri myndin er tekin 5. maí, eftir fellibylinn. Eins og þið sjáið, eru gríðarleg landssvæði farin á kaf í sjó.

Myndirnar eru frá NASA og voru teknar með Moderate Resolution Imaging Spectroradiometer (MODIS), infrarauðri myndavél á Terra gervitunglinu. Mestu flóðin eru við ósa Irrawaddy árinnar og suður og austur af höfuðborginni Rangoon (Yangon á kortinu).

Sameinuðu þjóðirnar áætla að 1,5 milljónir manna séu í nauð vegna fellibylsins og allt að 100.000 manns hafi farist.

Hjörtur
(via Scientific American)

Borð sem fær hvali til að gráta

Þetta sérstaka borð er áminning um umhverfi hafsins. Á borðplötuna er búið að mála mynd af fiskum sem synda um í fljótandi ruslahaug. Borðinu er síðan haldið uppi af endurnýttum eldhússtólum sem mynda borðfæturnar. Undir annan borðstólinn - eða borðfótinn, er síðan búið að planta grátandi hval sem áminningu um þær þjáningar sem hvalirnir þurfa að líða vegna óábyrgrar hegðunar okkar og losunar úrgangs í hafið.

Hjörtur

Orkuturn sem gæti fullnægt orkuþörf Jarðar allt að 20 sinnum

Ísraelsk vísindastofnun, Technion, hefur sett fram kenningu um orkuturn sem gæti leyst orkuvanda Jarðarinnar. Turninn er kílómeters hár og 400 metra breiður og framleiðir orku með gegnustreymi af köldu lofti.

Við könnumst öll við bjargfuglinn sem flatmagar á uppstreyminu utan við fuglabjörgin hér á landi. Þessi turn virkar svipað, nema bara í hina áttina. Heitt loft sem er við toppinn á turninum er kælt með vatnsúða og streymir niður, þar sem kalt loft er þyngra en heitt. Við botn turnsins eru túrbínur sem kalda loftið knýr áfram þegar það þrýstist út og þær framleiða rafmagn. Hægt er að nota hvernig vatn sem er, ferskvatn eða sjó, til þess að kæla loftið við toppinn. Um leið er hægt að nýta ferlið til þess að hreinsa vatn eða framleiða ferskvatn úr sjó. Vatnið má síðan nota í áveitukerfi, fiskeldi eða aðra vatnsfreka starfsemi.

Að sögn prófessors Dan Zaslavsky hefur turninn verið í þróun síðan 1983 og hafa farið um 150 starfsár í hönnun, prófanir og tilraunir. Turninn virkar best í þurru og heitu loftslagi og hefur stofnunin listað upp um 40 lönd sem hafa hentugar aðstæður í Norður-Afríku, Mið-Austurlöndum, Suðvesturríkjum Bandaríkjanna, Mexíkó og Ástralíu.

Prófessor Zaslavsky telur turninn jafnvel geta unnið á móti hlýnun Jarðar með því að ýta undir náttúrulega kælingu andrúmsloftsins á Jörðinni, svokallaðrar Hadley hringrásar.

Vísindamennirnir eru nú að leyta að fjármagni til þess að smíða frumgerð turnsins en þeir eru bjartsýnir á að turninn geti verið lausnin við mörgum af helstu vandamálum Jarðarinnar í orku- og loftslagsmálum.

Hjörtur
(via InventorSpot.com)

Save Walter

Um daginn fjallaði ég um auglýsingar sem eiga að vekja fólk til umhugsunar um vatnssparnað og sýndi ykkur myndband af konu í sturtu. Hér er önnur um gullfiskinn Walter sem fær að kenna á harðri samkeppni við manninn um vatnsbirgðirnar.

Hjörtur

Farðu í styttri sturtu

Þó yfirleitt sé lítil þörf á að spara vatnið hér á landi, þá búa fæstir við þann munað. Vatnssparnaður er því mikil dyggð víða um heiminn og fólk hvatt til að bera virðingu fyrir þeim verðmætum sem verið er að nota.

Þetta YouTube myndband er skemmtileg áminning um vatnssparnað í sturtu ferðum:

Hjörtur

Vatnssmökkun - Thames áin var best

Í kjölfar mikillar umræðu um gæði kranavatns og óumhverfisvænt flöskuvatn vegna plastflaskna og flutninga (sjá t.d. hér) var efnt til vatnssmökkunar í London. 7 vatnstegundir voru á borðinu, allar ómerktar að sjálfsögðu. Það voru 6 gerðir af flöskuvatni sem voru Pret a manger, Evian, Volvic, Vittel, Spa og Fiji auk kranavatns úr Thames.

Vatnið sem vann var kranavatnið úr Thames með 4 stig af 5 mögulegum. Dómarnir sem vatnið fékk voru meðal annars: "Bragðast eins og hálendislækur ... Mér finnst það virkilega gott. Best." Flöskuvatnið fékk ekki eins góða dóma og enginn af þeim sem tóku þátt þekkti vatnstegundirnar af bragðinu. Pret a manger fékk til dæmis dóma eins og: "Bragðast eins og kranavatn. Eftirbragðið er hræðilegt. Tvímælalaust versta vatnið."

Ráðið til Lundúnabúa er því: Kranavatn er best - ískalt!

Hjörtur

(via Treehugger.com)