Grænjaxlinn

Fyrirmyndarborgin Curitiba í Brasilíu

Sveitarstjórnarmenn og frambjóðendur ganga nú um bæi með fögur loforð, en einhvern veginn finnst mér ég ekki heyra neitt nýtt, ef frá er talinn Besti flokkurinn í Reykjavík. Við virðumst vera föst í sama farinu, jafnvel þó hluta af fólkinu sé skipt út. 

Víða hafa þrekvirki verið unnin í að gjörbreyta borgum og bæjum til hins betra. Ein slík borg er Curitiba í Brasilíu sem er fremst í heimi á fleiri en einu sviði. 

1.  Curitiba er með hæsta hlutfall endurvinnslu í heiminum – 70%.
2. Strætókerfi Curitiba er svo gott að bílaumferð hefur minnkað um 30% á sama tíma og fólksfjöldi hefur þrefaldast á 20 ára tímabili.
3. Curitiba er með stærstu verslunar-göngugötusvæði heims.
4. Curitiba hefur hannað fjölda fallegra garða til að stjórna flóðum frekar en að grafa síki, svo marga að þeir nota kindur til að slá grasið sem er ódýrara en garðyrkjumenn. 
5. Curitiba er borg þar sem 99% íbúanna vilja gjarnan búa. Á sama tíma vilja 70% íbúa höfuðborgarinnar Sao Paulo líka búa í Curitiba.
6. Meðaltekjur íbúa Curitiba hefur farið frá því að vera undir landsmeðaltali á áttunda áratugnum í að vera 66% yfir landsmeðaltali.

(mynd frá Aurea Julio)

Þetta gerir Curitiba að einni áhugaverðustu borg heims. 

Jaime Lerner hefur verið borgarstjóri þar þrisvar sinnum á síðustu 40 árum og segir hér frá borginni sinni. Það er eflaust margt sem Íslendingar gætu lært af honum.

Hjörtur
(via Cities for People)

Norræni tísku-tvíæringurinn - ráðstefna á morgun

Meðvituð um tískuna - Ráðstefna um tísku og sjálfbærni verður haldin á morgun í Norræna húsinu.

Tíska snýst ekki einungis um ytra útlit, gæði né verðmiða. Tískuiðnaðurinn er einn mengaðasti iðnaðurinn í heiminum í dag. Hönnuðir og framleiðendur þurfa því að horfast í augu við samfélagslega ábyrgð sína í framleiðsluferlinu. Svo tískuhönnun geti talist sjálfbær þarf að taka tillit til margra þátta s.s. sanngjarnra viðskiptahátta, lífræns fatnaðar, dýraverndar og þróun textíls.

Þeir fyrirlesarar sem taka þátt í ráðstefnunni eru sérfræðingar á sínu sviði og munu varpa ljósi á margvíslegar hliðar er snerta sjálfbæra fataframleiðslu og hönnun.

Ann Thorpe er höfundur bókarinnar The Designers-Atlast of Sustainability. Bókin gefur greinagóða yfirsýn yfir meginþræði sjálfbærrar hönnunar- samfélag, efnahag og menningar-og hvernig hönnuðir nálgast þau.
www.designers-atlas.net

Karin Stenmar er einn af stofnendum Dem Collective. Karin er með bakgrunn í upplýsingatækni og margvíslegri markaðsetningu: Allt frá tónlistarbransanum yfir í sjálfbær viðskipti:samfélagslega ábyrgð fyrirtækja og umhverfisstefnu þeirra.

Malin Eriksson er einn af tveim stofnendum samtakanna Hreinna klæða-Clean Clothes-í Svíþjóð. Þau einbeita sér að bættum starfsháttum í hinum alþjóðlega fataiðnaði.
www.renaklader.org

Kristín Vala Ragnarsdóttir er nýr forseti verk- og náttúrufræðisviðs Háskóla Íslands. Kristín Vala Ragnarsdóttir lauk námi í jarðfræði við Háskóla Íslands árið 1979 og doktorsprófi frá Northwestern University í Bandaríkjunum árið 1984. Eftir að hafa sinnt rannsóknastörfum í París og við Northwestern háskólann réði hún sig til starfa við Háskólann í Bristol í Englandi árið 1989. Kristín Vala varð prófessor við sama skóla árið 2001. Fyrsta námskeiðið sem hún kennir við HÍ nefnist Sustainable Future og munu nemendur hennar kynna afrakstur sinn af námskeiðinu þann 30. mars í Norræna húsinu.

Núll húsið

Núll húsið eða ZeroHouse er algjörlega sjálfbært hús sem sér sjálfu sér fyrir bæði vatni og orku. Húsið er hægt að setja upp á á ýmsu vegu til þess að nýtast eigendunum sem best og aðeins tekur einn dag að reisa húsið. Húsið er byggt á stálramma og sérstakar undirstöður hafa verið hannaðar fyrir það svo að ekki þurfi að grafa grunn.

Húsið, sem er hannað af arkitektinum Scott Specht í New York, framleiðir sitt eigið rafmagn með sólarrafhlöðum og er með rafgeyma sem geta safnað vikubirgðum af rafmagni ef sólin lætur lítið sjá sig (dugar samt kannski skammt hér á landi). Húsið safnar líka regnvatni og sem er hreinsað og dreift um húsið með hjálp af þyngdaraflinu án þess að nokkrar orkufrekar dælur komi þar nærri. Í húsinu er líka sjálfvirkur búnaður til þess vinna úr úrgangi sem fellur til frá húsinu. Húsið er lýst upp með LED ljósum sem eru innbyggð í veggi og loft og í húsinu eru skynjarar sem nema boð úr tölvu húseigandans þannig að í gegnum hana er hægt að stjórna öllu húsinu, lýsingu, hitastigi, rakastigi o.s.frv.

   

Hjörtur

Borð sem fær hvali til að gráta

Þetta sérstaka borð er áminning um umhverfi hafsins. Á borðplötuna er búið að mála mynd af fiskum sem synda um í fljótandi ruslahaug. Borðinu er síðan haldið uppi af endurnýttum eldhússtólum sem mynda borðfæturnar. Undir annan borðstólinn - eða borðfótinn, er síðan búið að planta grátandi hval sem áminningu um þær þjáningar sem hvalirnir þurfa að líða vegna óábyrgrar hegðunar okkar og losunar úrgangs í hafið.

Hjörtur

Mótvægisaðgerðir ríkisstjórnarinnar: ruslaveiðar?

Loðnan er að hverfa. Þorskurinn er löngu farinn. Ekki má veiða hvalina. Rækjan er verðlaus. Hvað er þá eftir fyrir sjómennina til að veiða?

Jú, ekki örvænta. Það er nefnilega ekki bara á þessum gígantískt stóru ruslahaugum á Kyrrahafinu sem er að finna mikið af rusli. Það er líka í Norðursjó, Eystrasalti og alveg ábyggilega í kringum Ísland. Magnið er áætlað um 20.000 tonn sem hent er í sjóinn af bátum og skipum í Norðursjó á hverju ári. En vitið hvað er það besta?

Þú mátt veiða það allt. Hvert eitt og einasta kíló. Það er enginn kvóti kominn á ruslið í sjónum og í raun er það alveg tilvalið fyrir rányrkju og ofveiði. Slíkar veiðar eru stundaðar nú þegar í Danmörku, Hollandi og Bretlandi en þar eru að sjálfboðaliðar á vegum KIMO samtakanna. Og ruslið enn langt frá því að vera í "útrýmingarhættu". Núverandi veiðar eru ekki að skila miklu en í Hollandi komu 300 tonn af rusli á land. 20 tonn voru send til rannsóknar á samsetningunni til að áætla hvaða rusl væri í sjónum og fengu óhuggulegt magn af rusli: 20.000 olíutunnur, 69.000 baujur, 18.000 humar og krabba gildrur og hátt í 200.000 málningarfötur. Auk þess þúsundir sjónvarpa, tölva, skóa, fatnaðar, kaffivéla og annars rusls. Umhverfisfræðingur hjá hafrannsóknarstofnunni í Svíþjóð, Stefan Lemieszewsky, hefur lagt til að sænskir sjómenn fái það hlutverk að "fiska" rusl á Eystrasalti. Sjómaðurinn Lars Berglund í Bönan er hins vegar ekkert yfir sig hrifinn og segir lítið af rusli á miðunum sínum.

Kannski ríkisstjórnin geti varið eitthvað af peningunum sem ætlaðir eru í mótvægisaðgerðir til þess að borga sjómönnum fyrir að veiða rusl. Kvótalaust!

Hjörtur

Aquaduct - hjól sem er líka vatnshreinsistöð

Þríhjólið sem við sjáum á myndinni hérna er siguruppfinningin í keppninni Innovate or Die. Það sem gerir þetta þríhjól svona sérstakt er að það er með innbyggðri vatnshreinsistöð. Aftan á hjólinu er stór vatnstankur fyrir óhreint vatn. Þegar þú hjólar, þá dælist vatnið í gegnum síur og yfir í minni tank framan á hjólinu. Þar safnast saman hreint vatn. Þegar þú kemur heim frá brunninum ertu komin með tandurhreint drykkjarhæft vatn. Ef þú þarft meira vatn úr tankinum, þá þarftu samt ekkert að fara í langan hjólreiðatúr. Þú getur aftengt hjólin frá pedölunum og þannig hjólað á staðnum og hreinsað meira vatn. Og það besta er að þú þarft ekkert rafmagn, engin kol, enga olíu eða neina aðra utanaðkomandi orku. Bara eigin orku. Hrein snilld! Hjörtur (via Core77)

Háskólagráða í sjálfbærum lifnaðarháttum

Maharishi University of Management í Bandaríkjunum hefur fyrstur allra ákveðið að bjóða upp á BS nám í sjálfbærum lifnaðarháttum. Þannig að nú getur þú orðið "atvinnu-grænjaxl" með því að ljúka prófi frá Maharishi háskólanum.

Í náminu er lögð áhersla á sjálfbæra þróun, grænan arkitektúr, græna hönnun, græn viðskipti og fleira. Háskólinn er að bregðast við auknum áhuga fyrirtækja og einstaklinga á hinum græna lífsstíl og má búast við því að það myndist biðlistar umhverfismeðvitaðra einstaklinga sem vilja komast í námið. Maharishi háskólinn var stofnaður af jóga gúrúnum Maharishi Mahesh og er í Iowa í Bandaríkjunum.

Á myndbandinu hér fyrir neðan getið þið fylgst með því hvernig Maharashi nemar byggja vindmyllu frá grunni.

Hjörtur

(via Trendhunter.com)

Fátækrahverfi í Mexíkóborg verður leiðandi á sviði umhverfismála

Þrátt fyrir að vera með eina hæstu glæpatíðnina í Mexíkóborg, einni stærstu borg heims, er Ampliación Michoacana hverfið á góðri leið með að verða fyrirmynd annarra borgarhverfa í sjálfbærri þróun.

Í hverfinu sem hýsir um 5.900 manns munu íbúarnir fá um 2 milljónir dollara til að byggja upp garða og græn svæði í skólum og við íbúðir, setja upp sólarrafhlöður og endurvinna úrgang.

"Við völdum Ampliación Michoacana hverfið sem samfélag til að efla virðingu fyrir umhverfina þar sem íbúarnir þar brugðust betur við en annars staðar þegar fólk var hvatt til að flokka sorp og vegna þess að þar eru sjö grunnskólar." sagði Julio César Moreno. Moreno bætti við að hann reiknaði með því að verkefnið myndi spara íbúunum um 300.000 dollara árlega í rafmagnsreikninga með hjálp sólarrafhlaða.

Hjörtur

(Planeta Azul via Treehugger.com)

Túnfiskvinnsla í fyrsta sinn vottuð sem sjálfbær

American Albacore Fishing Association (AAFA) sem eru samtök túnfiskveiðimanna sem veiða með ákveðnum aðferðum á Kyrrahafsströnd Bandaríkjanna, hlaut á dögunum vottun sem sjálfbær fiskvinnsla. Það eru óháð samtök sem kallast Marine Stewardship Council (MSC) sem votta fiskvinnsluna en markmið samtakanna er að hvetja til ábyrgrar umhverfissstefnu í iðnaði sem er hrjáður af ofveiði og óheppilegum meðafla.

Það má velta fyrir sér þeirri hugmynd hvort koma megi upp vottun á íslenskum fiski sem veiddur er undir ábyrgri fiskveiðistjórn og fylgir umhverfisvænu framleiðsluferli.

Hjörtur
(via TreeHugger)
(mynd frá Parkerman)