Grænjaxlinn

Hollendingar leggja hjólreiðastíga úr sólarrafhlöðum

Reiðhjólamenning Hollendinga hefur löngum verið fræg en nú hafa þeir hrint af stað nýrri framúrstefnulegri áætlun um að skipta malbikinu á reiðhjólastígum landsins út með sólarrafhlöðum. Þetta er upphafið af nýju tilraunaverkefni sem miðar að því að breyta vegum í orkubú með því að leggja þá sólarrafhlöðum.

Tæknin er afrakstur hönnunarverkefnis hjá nýsköpunarhúsinu TNO í Hollandi og kallast SolaRoad. Neðsta lag stíganna er lagt steypu, þar ofan á kemur um sentímeter þykkar sólarsellur úr sílikoni og efsta lagið er styrkt öryggisgler sem hjólað er á. Alls eru vegir í Hollandi 137.000 km og því miklir möguleikar í orkuframleiðslu, með því að nýta það svæði sem nú þegar er nýtt undir vegina. Hver fermeter framleiðir um 50 kWh á ári af rafmagni en meðal heimili notar um 3.500 kWh af raforku. Það myndi því þurfa um 700 fermetra af sólarrafhlöðum til þess að anna einu heimili. 

Orkan er hugsuð til nota í ljósastaura, umferðarljós og að einhverju leyti fyrir heimili og fyrirtæki í nágrenninu. Fyrsti leggurinn verður tilbúinn í Noord-Holland sveitarfélaginu árið 2012 en yfirborð vegarins þarf að uppfylla allar kröfur um yfirborð vega varðandi styrk, grip og viðhald. 

Hjörtur

(via Inhabitat)

Earth Hour kl. 20:30 í kvöld - 60 mínútur í myrkri

Andri Snær Magnason stóð fyrir því að slökkt væri á Reykjavík í klukkustund í september 2006. 31. mars 2007 gerði Sidney hið sama og ári seinna voru 60 borgir um allan heim sem slökktu öll ljós í klukkustund. Í dag, 28. mars 2009, er aftur komið að þessum 60 mínútum þar sem fólk um allan heim slekkur ljósin í virðingarskyni við umhverfið. Tekur sér 60 mínútur frá hraða og munaði rafmagnsins og hugsar aðeins um önnur gæði lífsins.



Hjörtur

Umhverfissinnar ekki ánægðir með Palin

Umhverfisverndarsinnar eru ekki hrifnir af varaforsetaefni John McCain sem hann tilkynnti í dag, konu að nafni Sarah Palin. Sarah er 44 ára, 5 barna móðir og fyrrverandi fegurðardrottning. Hún er fylkisstjóri Alaska og hefur átt farsælt samstarf við olíufélögin.

Umhverfissinnar eru hins vegar ekki alveg jafn hrifnir af henni og olíufélögin. Það sem fer mest fyrir brjóstið á umhverfisverndarsinnum er einkum þetta þrennt:

1. Meiri olíuboranir eru lausnin
Palin hefur lýst því yfir að frekari olíuboranir í Alaska, meðal annars á friðlýstum verndarsvæðum, séu rétta lausnin á orkuvanda Bandaríkjanna.

2. Ísbirnir þurfa enga verndun
Hún hefur farið í mál við ríkisstjórnina til þess að reyna að snúa ákvörðun þeirra um friðun ísbjarnarins.

3. Hlýnun jarðar er ekki okkar vandamál
Hún hefur lýst því yfir að þó að Alaska finni mest fyrir hlýnun jarðar, þá sé hún sannfærð um að það hafi ekkert með mannfólkið að gera. Þrátt fyrir að sé þvert á það sem allir vísindamenn segja í dag.

Það verður fróðlegt að sjá hvaða áhrif Sarah Palin mun hafa í kosningabaráttunni. Það er ekki ólíklegt að hún muni geta náð í einhverja Hillary aðdáendur sem ekki þola Obama eftir kosningabaráttuna. En aðrar konur eru móðgaðar ef McCain heldur að gömul fegurðardrottning sé nóg til að fá atkvæði.

Hjörtur

Heimildir:
The Daily Green
USMagazine.com

Grænjaxlinn er hluti af tímaritavefnum Vefjakrot.is og fjallar um umhverfismál og grænan lífsstíl. Þú getur fengið Grænjaxlinn í áskrift í RSS eða tölvupósti með því að skrá netfangið þitt í reitinn hér efst til hægri.

Þín eigin heima-ethanól stöð

Hver myndi ekki vilja eiga sína eigin olíulind í bakgarðinum eins og bensínverðið er núna? Það er kannski ekki eitthvað sem hægt er að græja auðveldlega, en hins vegar eru komnar á markaðinn í Bandaríkjunum ethanól stöðvar fyrir heimilið. Þetta eru stöðvar sem þú getur keypt og komið fyrir heima hjá þér og þar getur þú framleitt þitt eigið eldsneyti fyrir bílinn þinn. Það eina sem þú þarft er vatn, rafmagn og sykur.

Verðið er 10.000 dollarar fyrir eina svona Efuel 100 micro-fueler stöð og svo er spurning hvernig svona stöð væri tolluð hér á landi. Kannski ekki svo vitlaust. Nú er spurningin bara hvernig sykurverðið þróast (eða hversu miklir afgangar eru úr flöskunum).

Hjörtur

Olíuhreinsistöð á mánudegi

Hér eru myndir frá lítilli olíuhreinsistöð á mánudagsmorgni í Texas:

Þetta er lítil stöð í Big Spring í Texas sem framleiðir 70.000 tunnur á dag og er með um 170 starfsmenn. 4 slösuðust í sprengingunni sem var svo öflug að höggbylgjan fannst í allt að 80 kílómetra fjarlægð.

Orkan nýtt úr heitu malbiki

Þótt heitt malbik sé kannski ekki efst í huga okkar hér á Norðurhjara þessa dagana, þá kemur það nú fyrir að malbik verði sjóðheitt og bráðni. Svart malbikið drekkur í sig orkuna úr sólinni en gerir lítið við hana annað en að valda okkur vandræðum. Það er náttúrulega sóun á dýrmætri orku.

Verkfræðifyrirtæki nokkuð í Hollandi sem kallast Ooms Averhorn Holdings BV hefur fundið leið til þess að nýta þessa orku. Með því að leggja heilt völundarhús af vatnsleiðslum undir malbikið. Leiðslurnar eru fylltar af vatni en ekki tengdar við heitavatnið eða affallið eins og við þekkjum hér. Í staðinn er malbikið notað til að hita vatnið en ekki öfugt og í sumum tilfellum hefur vatnskerfið verið tengt við hús í nágrenninu og notað til að hita upp gólfin þar inni.

Vatnið heldur hitanum í sér vel fram á haustið og er þannig nýtt til að afísa vegina. Þetta verður líklegast seint vinsælt hér á landi en er áhugaverð orkunýting engu að síður. Eins og er tvöfaldar þetta framkvæmdakostnaðinn við vegagerðina en á móti kemur nýting heitavatnsins til hitunar, minni ísing á vegum og þar af leiðandi slysahætta og betri ending á malbikinu.

Hjörtur (via TrendHunter.com)

Orkuturn sem gæti fullnægt orkuþörf Jarðar allt að 20 sinnum

Ísraelsk vísindastofnun, Technion, hefur sett fram kenningu um orkuturn sem gæti leyst orkuvanda Jarðarinnar. Turninn er kílómeters hár og 400 metra breiður og framleiðir orku með gegnustreymi af köldu lofti.

Við könnumst öll við bjargfuglinn sem flatmagar á uppstreyminu utan við fuglabjörgin hér á landi. Þessi turn virkar svipað, nema bara í hina áttina. Heitt loft sem er við toppinn á turninum er kælt með vatnsúða og streymir niður, þar sem kalt loft er þyngra en heitt. Við botn turnsins eru túrbínur sem kalda loftið knýr áfram þegar það þrýstist út og þær framleiða rafmagn. Hægt er að nota hvernig vatn sem er, ferskvatn eða sjó, til þess að kæla loftið við toppinn. Um leið er hægt að nýta ferlið til þess að hreinsa vatn eða framleiða ferskvatn úr sjó. Vatnið má síðan nota í áveitukerfi, fiskeldi eða aðra vatnsfreka starfsemi.

Að sögn prófessors Dan Zaslavsky hefur turninn verið í þróun síðan 1983 og hafa farið um 150 starfsár í hönnun, prófanir og tilraunir. Turninn virkar best í þurru og heitu loftslagi og hefur stofnunin listað upp um 40 lönd sem hafa hentugar aðstæður í Norður-Afríku, Mið-Austurlöndum, Suðvesturríkjum Bandaríkjanna, Mexíkó og Ástralíu.

Prófessor Zaslavsky telur turninn jafnvel geta unnið á móti hlýnun Jarðar með því að ýta undir náttúrulega kælingu andrúmsloftsins á Jörðinni, svokallaðrar Hadley hringrásar.

Vísindamennirnir eru nú að leyta að fjármagni til þess að smíða frumgerð turnsins en þeir eru bjartsýnir á að turninn geti verið lausnin við mörgum af helstu vandamálum Jarðarinnar í orku- og loftslagsmálum.

Hjörtur
(via InventorSpot.com)

Jólatréssería knúin rafmagni úr áli

Í sædýrasafni í Japan er búið að koma fyrir jólatré. Það sem gerir þetta jólatré merkilegt er að ljósaserían á trénu er knúin rafmagni úr áli sem er geymdur í fiskabúri við hliðina á trénu. Állinn er rafmagnsáll og í hvert skipti sem hann hreyfir sig sendir hann frá sér rafmagn. Í búri er plata sem nemur rafhleðsluna og flytur hana yfir í ljósaseríuna. Ef állinn strýkst við plötuna getur hann náð allt að 800 watta hleðslu.

Állinn og jólatréð hafa laðað að mikinn fjölda áhugasamra áhorfenda til safnsins.

Hjörtur

Skýrsla Þróunarstofnunar S.þ. um loftlagsmál

Það vakti mikla athygli í fjölmiðlum á Íslandi þegar skýrsla Þróunarstofnunar Sameinuðu þjóðanna um þróun mannkyns (Human Development Report) fyrir 2007 kom út, þar sem í henni kom fram að "Ísland væri best í heimi".

Það sem hefur minna farið fyrir í umræðunni á Íslandi er hin dökka mynd sem er dregin upp af stöðu loftslagsmála í heiminum og þörfinni fyrir skjót úrræði. Stjórnvöld um allan heim eru að bregðast skyldu sinni og þróunin er allt of hæg. Ég veit ekki hvort allir treysti á að Google bjargi heiminum, en það þurfa allir að leggja sitt af mörkum.

Ef þú vilt kynna þér skýrsluna nánar, þá geturðu hlaðið henni niður hérna:
Smelltu hér til þess að hlaða niður skýrslu UNDP um loftslagsmál

Hjörtur

Vetnisstöðin opnuð almenningi

Vetnisstöðin við Suðurlandsveg var opnuð almenningi við hátíðlega athöfn á miðvikudaginn. Stöðin hefur verið starfrækt í fjögur ár fyrir vetnisknúna strætisvagna, en á miðvikudaginn bættist í flota landsmanna af vetnisknúnum farartækjum.

Orkuveita Reykjavíkur keypti fjóra nýja Toyota Prius vetnisbíla til að nota hjá fyrirtækinu og Landsvirkjun keypti þrjá. Auk þess keypti Hertz þrjá bíla sem almenningur getur leigt út. Þannig að nú getur þú farið og prófað að aka um á vetnisknúnum bíl með því að leigja hann hjá Hertz.

Atburðurinn hefur vakið talsverða athygli fjölmiðla og var Reuters með þessa umfjöllun um málið: