Grænjaxlinn

Norræni tísku-tvíæringurinn - ráðstefna á morgun

Meðvituð um tískuna - Ráðstefna um tísku og sjálfbærni verður haldin á morgun í Norræna húsinu.

Tíska snýst ekki einungis um ytra útlit, gæði né verðmiða. Tískuiðnaðurinn er einn mengaðasti iðnaðurinn í heiminum í dag. Hönnuðir og framleiðendur þurfa því að horfast í augu við samfélagslega ábyrgð sína í framleiðsluferlinu. Svo tískuhönnun geti talist sjálfbær þarf að taka tillit til margra þátta s.s. sanngjarnra viðskiptahátta, lífræns fatnaðar, dýraverndar og þróun textíls.

Þeir fyrirlesarar sem taka þátt í ráðstefnunni eru sérfræðingar á sínu sviði og munu varpa ljósi á margvíslegar hliðar er snerta sjálfbæra fataframleiðslu og hönnun.

Ann Thorpe er höfundur bókarinnar The Designers-Atlast of Sustainability. Bókin gefur greinagóða yfirsýn yfir meginþræði sjálfbærrar hönnunar- samfélag, efnahag og menningar-og hvernig hönnuðir nálgast þau.
www.designers-atlas.net

Karin Stenmar er einn af stofnendum Dem Collective. Karin er með bakgrunn í upplýsingatækni og margvíslegri markaðsetningu: Allt frá tónlistarbransanum yfir í sjálfbær viðskipti:samfélagslega ábyrgð fyrirtækja og umhverfisstefnu þeirra.

Malin Eriksson er einn af tveim stofnendum samtakanna Hreinna klæða-Clean Clothes-í Svíþjóð. Þau einbeita sér að bættum starfsháttum í hinum alþjóðlega fataiðnaði.
www.renaklader.org

Kristín Vala Ragnarsdóttir er nýr forseti verk- og náttúrufræðisviðs Háskóla Íslands. Kristín Vala Ragnarsdóttir lauk námi í jarðfræði við Háskóla Íslands árið 1979 og doktorsprófi frá Northwestern University í Bandaríkjunum árið 1984. Eftir að hafa sinnt rannsóknastörfum í París og við Northwestern háskólann réði hún sig til starfa við Háskólann í Bristol í Englandi árið 1989. Kristín Vala varð prófessor við sama skóla árið 2001. Fyrsta námskeiðið sem hún kennir við HÍ nefnist Sustainable Future og munu nemendur hennar kynna afrakstur sinn af námskeiðinu þann 30. mars í Norræna húsinu.

Núll húsið

Núll húsið eða ZeroHouse er algjörlega sjálfbært hús sem sér sjálfu sér fyrir bæði vatni og orku. Húsið er hægt að setja upp á á ýmsu vegu til þess að nýtast eigendunum sem best og aðeins tekur einn dag að reisa húsið. Húsið er byggt á stálramma og sérstakar undirstöður hafa verið hannaðar fyrir það svo að ekki þurfi að grafa grunn.

Húsið, sem er hannað af arkitektinum Scott Specht í New York, framleiðir sitt eigið rafmagn með sólarrafhlöðum og er með rafgeyma sem geta safnað vikubirgðum af rafmagni ef sólin lætur lítið sjá sig (dugar samt kannski skammt hér á landi). Húsið safnar líka regnvatni og sem er hreinsað og dreift um húsið með hjálp af þyngdaraflinu án þess að nokkrar orkufrekar dælur komi þar nærri. Í húsinu er líka sjálfvirkur búnaður til þess vinna úr úrgangi sem fellur til frá húsinu. Húsið er lýst upp með LED ljósum sem eru innbyggð í veggi og loft og í húsinu eru skynjarar sem nema boð úr tölvu húseigandans þannig að í gegnum hana er hægt að stjórna öllu húsinu, lýsingu, hitastigi, rakastigi o.s.frv.

   

Hjörtur

Borð sem fær hvali til að gráta

Þetta sérstaka borð er áminning um umhverfi hafsins. Á borðplötuna er búið að mála mynd af fiskum sem synda um í fljótandi ruslahaug. Borðinu er síðan haldið uppi af endurnýttum eldhússtólum sem mynda borðfæturnar. Undir annan borðstólinn - eða borðfótinn, er síðan búið að planta grátandi hval sem áminningu um þær þjáningar sem hvalirnir þurfa að líða vegna óábyrgrar hegðunar okkar og losunar úrgangs í hafið.

Hjörtur

Grænn sími frá Nokia

Nokia hefur kynnt nýjan hugmyndasíma sem kallast Nokia Eco Sensor Concept. Þessi sími er nýjasta hugarfóstur þróunardeildar Nokia og tilraun þeirra til þess að koma til móts við þá grænu bylgju sem nú ríður yfir heiminn. Síminn er í tveimur hlutum, annars vegar síminn og hins vegar nemi sem hægt er að vera með á úlnlið eins og úr. Neminn getur skynjað og greint ýmsa umhverfisþætti og áhrif þeirra á líkamann. Skilaboðin eru svo send í símtækið með NFC tækninni (near field communication).

Í raun má skipta sviðum símans í þrennt. Það er í fyrsta lagi umhverfistæki en meðal þess sem síminn getur mælt og greint er CO2 í andrúmsloftinu, svifryk, ózon og UV geislun. Í öðru lagi þá er það veðurstöð en síminn greinir hitastig, loftþrýsting og rakastig andrúmsloftsins. Í þriðja lagi þá er það þitt eigið heilbrigði en síminn er búinn púlsmæli, mælir gönguhraða og vegalengd og er hægt að nota sem æfingatæki fyrir skokk og göngur. Síminn byggir á "errunum þremur" sem eru Reduce, Reuse og Recycle eða minnka, endurnýta og endurvinna. Hann er mjög spar á orku og hleður sig sjálfur með hjálp sólarrafhlöðu.

Hjörtur (Lestu meira á vef Nokia)

Orkan nýtt úr heitu malbiki

Þótt heitt malbik sé kannski ekki efst í huga okkar hér á Norðurhjara þessa dagana, þá kemur það nú fyrir að malbik verði sjóðheitt og bráðni. Svart malbikið drekkur í sig orkuna úr sólinni en gerir lítið við hana annað en að valda okkur vandræðum. Það er náttúrulega sóun á dýrmætri orku.

Verkfræðifyrirtæki nokkuð í Hollandi sem kallast Ooms Averhorn Holdings BV hefur fundið leið til þess að nýta þessa orku. Með því að leggja heilt völundarhús af vatnsleiðslum undir malbikið. Leiðslurnar eru fylltar af vatni en ekki tengdar við heitavatnið eða affallið eins og við þekkjum hér. Í staðinn er malbikið notað til að hita vatnið en ekki öfugt og í sumum tilfellum hefur vatnskerfið verið tengt við hús í nágrenninu og notað til að hita upp gólfin þar inni.

Vatnið heldur hitanum í sér vel fram á haustið og er þannig nýtt til að afísa vegina. Þetta verður líklegast seint vinsælt hér á landi en er áhugaverð orkunýting engu að síður. Eins og er tvöfaldar þetta framkvæmdakostnaðinn við vegagerðina en á móti kemur nýting heitavatnsins til hitunar, minni ísing á vegum og þar af leiðandi slysahætta og betri ending á malbikinu.

Hjörtur (via TrendHunter.com)

Sólarljós í fötu

Það hefur lengi verið gert grín af þeim Bakkabræðrum. Einhverju sinni höfðu þeir áttað sig á því að þeim mun kaldara var inn í húsum eftir því sem gluggar voru fleiri og stærri. Þeir byggðu sér því hús með nýju lagi - án glugga. Sá galli var hins vegar á húsinu að þar inni var niða myrkur. Það var því einn sólríkan dag að þeir bræður tóku að bera myrkrið út í húfum sínum og trogum og báru sólarljósið til baka inn í húsið í sömu ílátum.

Kannski voru Bakkabræður ekki eins vitlausir og þeir hljóma. Þeir hafa berið verið svona langt á undan sinni samtíð í orkusparnaði og nýtingu sólarorkunnar. Nú er nefnilega búið að hanna fötu sem hægt er að fylla af sólarljósi og bera með sér hvert á land sem er. Fatan virkar þannig að hún er með loki og er lokið gert úr sólarrafhlöðum. Þær eru svo tengdar í LED ljós sem er í fötunni og þannig er hægt að safna sólarljósinu í fötuna og láta hana lýsa.

Það var bakkabróðirinn Stefano Merlo sem hannaði fötuna sem hann kallar "Energy Bucket" eða orkufötuna. Hann vildi taka eitthvað jafneinfalt og vatnsfötu og sýna hvað lausnir á stórum vandamálum geta oft verið einföld.

Kannski við ættum að fara að lesa sögurnar um Bakkabræður með öðru hugarfari :)

Hjörtur
(via inhabitat)

Garðaúðari úr endurunnu plasti

Eins og þið vitið þá brotnar plast ekkert niður einn, tveir og þrír í náttúrunni. Þess vegna er mikils virði að geta fundið ný not fyrir gamalt plast.

Þessi hugmynd er bráðsnjöll. Þú tekur gamla drykkjarflösku og kippu af ónýtum kúlupennum og föndrar eitt stykki garðaúðara. Ef við gerum ráð fyrir að þú eigir bæði gamla flösku og gamla penna, þá ætti kostnaðurinn að vera einhverjum þúsundköllum undir hefðbundnum Byko-úðara.

Hjörtur
(via Core77.com)

Grænn tími - hönnunarkeppni

Nú er rétti tíminn til að láta að sér kveða í grænni hönnun. Efnt hefur verið til hönnunarkeppni undir heitinu Make Time for a Green Cause þar sem þátttakendur eiga að hanna klukku úr "grænum" efnum. Keppnin er hluti af fjáröflun fyrir samtök sem heita Trees for the Future.

Þátttakendur eiga að hanna og smíða klukku sem byggir á grænni hugmyndafræði og vistvænum efnum. Allar klukkurnar sem sendar eru í keppnina verða til sýnis og sölu í Brooklyn í New York dagana 16.-18. nóvember og rennur helmingurinn af söluvirði hverrar klukku til samtakanna en hinn helmingurinn fellur í skaut hönnuðarins. Fyrir hvern dollar sem safnast verða tíu tré gróðursett og er markmiðið að ná að gróðursetja alla veganna 100.000 tré.

Ef þú vilt taka þátt í keppninni getur kíkt á Make Time heimasíðuna. Gangi þér vél. Klukkan tifar!

Hjörtur
(via Treehugger)

Umhverfisvænar kjarnorkusprengjur?

Nei, það verður líklegast aldrei til neitt slíkt. En Rússar hafa nú samt sem áður hannað nýja gerð af sprengju sem á að hafa sama eyðileggingamátt og kjarnorkusprengja án þess að skilja eftir sig sömu umhverfisspjöll. Þ.e.a.s. enga geislavirkni. Þeir kalla þessa sprengju föður allra sprengna. Bandaríkjamenn segjast hafa sambærilega sprengju sem þeir kalla móður alla sprengna.

Að sögn rússneskra yfirvalda hafa þeir gert árangursríkar tilraunir með það sem þeir kalla öflugustu sprengju veraldar sem send er með flugi og ekki er kjarnorkuknúin. Hin nýja sprengja gerir rússneska hernum kleift að "verja öryggi þjóðarinnar og mæta alþjóðlegri hryðjuverkaógn við hvaða aðstæður sem er og á hvaða svæði sem er."

Mér líður miklu betur að vita það. Þannig að ef ég er t.d. á lestarstöð í Moskvu þar sem kemur í ljós að hryðjuverkamenn eru staðsettir, þá verður rússneski herinn snöggur að eyða stöðinni og nágrenni. Þá þarf ég ekki að hafa meiri áhyggjur af því. Það er spurning hvort þeir kolefnisjafni þær ekki líka með því að gróðursetja tré?

Hjörtur

Vistvænt sumarhús

Sumarhúsafrumskógurinn á Íslandi vex hratt en lítið ber á frumlegri hönnun (allar ábendingar um frumlega hönnun í íslenskum sumarhúsum eru vel þegnar). Þó eru alltaf einhverjir sem eru tilbúnir að fara nýjar óhefðbundnar leiðir. Daninn Søren Korsgaard hefur hannað sumarhús sem smíðað er úr tilbúnum einingum.

Húsið samanstendur af einum ferningi sem er 5x5 metrar að flatarmáli. Hver hlið samanstendur af stórri hurð þannig að hægt er að hafa ferninginn alveg lokaðan eða alveg opinn. Hver hurð er í tveimur lögum, annars vegar gleri og hins vegar svörtum vegg, sem gerir það að verkum að veggurinn safnar miklum hita og orku á köldum dögum. Síðan er hægt að opna hvort sem er bara glerið eða bara vegginn, allt eftir vindum, sól og óskum. Í miðju rýminu er svo stigi upp á eftir hæð þar sem er að finna svefnpláss fyrir fjóra.

Hjörtur

(nánari upplýsingar er að finna á vef Søren Korsgaard)
(via Equity Green)