Grænjaxlinn

Reduce – Reuse – Recycle

Þrjú skref í átt að umhverfisvænni lífsstíl.

Þessi orð eru slagorð umhverfisverndarsinna nútímans. En fyrir hvað standa þau?

Reduce (að draga úr):  

• Kauptu vörur í stórum pakkningum en aldrei það stórar að þú notir ekki allt úr þeim
• Veldu vörur með minna af umbúðum.
• Kauptu vörur í endurvinnanlegum pakkningum og/eða endurunnar vörur.
• Fáðu þér endurnotanlegar innkaupatöskur og notaðu þær!
• Veldu íslenskt. Með því dregur þú úr menguninni sem skapast við millilandaflutninga. 
• Kauptu gæðavörur sem endast lengur.
• Dragðu úr vatns- og orkunotkun. Okkur íslendingum hættir til að gleyma þessum þætti, því við eigum jú nóg af hreinu vatni og endurnýtanlegri orku. Munum að þó við eigum þetta er óþarfi að sóa því.

Reuse (að endurnota):  

• Kauptu vörur í pakkningum sem hægt er að nota aftur.
• Gefðu eða seldu fötin, bækurnar, húsgögnin og heimilistækin.
• Láttu gera við biluð heimilistæki eða láttu farga þeim á viðeigandi hátt.
• Notaðu hleðslurafhlöður og skilaðu einnota rafhlöðum til Sorpu eða á bensínstöðvar.
• Endurnýttu glerkrukkur, plastpoka, bréfpoka, álpappír og pappabox.
• Fáðu þér nestisbox í stað þess að hafa nestið í plastpoka.
• Notaðu báðar hliðarnar á pappírnum. Mundu að börn geta teiknað á hvað sem er!

 

Recycle (að endurvinna):

Kostir endurvinnslu eru svo margir að ekki nægir einn lítill pistill til að fjalla um hana. Þó skal nefna tvo þætti sem vega þungt.

• Endurvinnsla dregur úr mengun þar sem endurunnin efni enda ekki sem rusl í landfyllingum eða sorp á víðavangi.
• Með því að endurvinna drögum við úr ofnýtingu náttúruauðlinda og spörum orku.

Andrea Ævars

Endurvinnsla í litlu rými

Flestir endurvinna þær umbúðir sem við fáum greitt fyrir að skila en hvað stoppar fólk í að endurvinna fleira?
Oft heyri ég fólk segja að það endurvinni ekki því það hafi svo lítið pláss og hér koma því ráð til að yfirstíga það vandamál.
Flestir hafa skápapláss í eldhúsi, á gangi eða í þvottahúsum og geymslum sem nýta mætti betur, en í mjög litlum rýmum er oft erfitt að sjá hvar hægt er að hliðra til fyrir endurvinnslunni.
Á flestum heimilum ætti að vera hægt að endurvinna dagblaðapappír, sléttan pappa, glerkrukkur og málma (sjá Sorpa.is fyrir nánari upplýsingar).

Að nota plássið

1. Til eru margar gerðir af kössum sem hægt er að stafla á smekklegan hátt og þá tekur endurvinnslan lítið sem ekkert gólfpláss (Til dæmis til í Rekstrarvörum og IKEA).  Einnig eru til sérstakar hillur sem gegna þessu sama hlutverki (t.d. þessi ).

2. Margar innréttingar ná ekki upp í loft og þá er hægt að fá sér smekklega kassa (t.d. í IKEA), setja upp á innréttinguna og setja í þá málma sem á að endurvinna. Einnig er þessi lausn góð fyrir glerkrukkur.

3. Ísskápurinn er vannýttur staður á mörgum heimilum og hægt er að geyma létta hluti eins og endurvinnslukassa undir rafhlöður uppi á honum.

4. Fyrir pappír og sléttan pappa hefur Sorpa búið til gula og græna flokkunarpoka sem hægt er að skella inn í skáp eða geyma í forstofunni. Í fjölbýlishúsum mætti jafnvel koma upp kössum undir dagblöð og auglýsingapóst í sameigninni og þá myndi það verða hluti af þrifum sameignar að fara með dagblaðakassann í grenndargám eða Sorpu.

5. Mjólkurfernur er hægt að geyma í vaskaskápnum eftir að búið er að skola þær og þurrka.

Munum svo að það er gróði af allri endurvinnslu, jafnvel þótt við fáum aurinn ekki beint í vasann.

Andrea Ævars

 

Borð sem fær hvali til að gráta

Þetta sérstaka borð er áminning um umhverfi hafsins. Á borðplötuna er búið að mála mynd af fiskum sem synda um í fljótandi ruslahaug. Borðinu er síðan haldið uppi af endurnýttum eldhússtólum sem mynda borðfæturnar. Undir annan borðstólinn - eða borðfótinn, er síðan búið að planta grátandi hval sem áminningu um þær þjáningar sem hvalirnir þurfa að líða vegna óábyrgrar hegðunar okkar og losunar úrgangs í hafið.

Hjörtur

Mótvægisaðgerðir ríkisstjórnarinnar: ruslaveiðar?

Loðnan er að hverfa. Þorskurinn er löngu farinn. Ekki má veiða hvalina. Rækjan er verðlaus. Hvað er þá eftir fyrir sjómennina til að veiða?

Jú, ekki örvænta. Það er nefnilega ekki bara á þessum gígantískt stóru ruslahaugum á Kyrrahafinu sem er að finna mikið af rusli. Það er líka í Norðursjó, Eystrasalti og alveg ábyggilega í kringum Ísland. Magnið er áætlað um 20.000 tonn sem hent er í sjóinn af bátum og skipum í Norðursjó á hverju ári. En vitið hvað er það besta?

Þú mátt veiða það allt. Hvert eitt og einasta kíló. Það er enginn kvóti kominn á ruslið í sjónum og í raun er það alveg tilvalið fyrir rányrkju og ofveiði. Slíkar veiðar eru stundaðar nú þegar í Danmörku, Hollandi og Bretlandi en þar eru að sjálfboðaliðar á vegum KIMO samtakanna. Og ruslið enn langt frá því að vera í "útrýmingarhættu". Núverandi veiðar eru ekki að skila miklu en í Hollandi komu 300 tonn af rusli á land. 20 tonn voru send til rannsóknar á samsetningunni til að áætla hvaða rusl væri í sjónum og fengu óhuggulegt magn af rusli: 20.000 olíutunnur, 69.000 baujur, 18.000 humar og krabba gildrur og hátt í 200.000 málningarfötur. Auk þess þúsundir sjónvarpa, tölva, skóa, fatnaðar, kaffivéla og annars rusls. Umhverfisfræðingur hjá hafrannsóknarstofnunni í Svíþjóð, Stefan Lemieszewsky, hefur lagt til að sænskir sjómenn fái það hlutverk að "fiska" rusl á Eystrasalti. Sjómaðurinn Lars Berglund í Bönan er hins vegar ekkert yfir sig hrifinn og segir lítið af rusli á miðunum sínum.

Kannski ríkisstjórnin geti varið eitthvað af peningunum sem ætlaðir eru í mótvægisaðgerðir til þess að borga sjómönnum fyrir að veiða rusl. Kvótalaust!

Hjörtur

Jólatré úr "endurnýttum" bjórflöskum

Það getur verið vandasamt að velja jólatré, sérstaklega ef það á að vera umhverfisvænt. Hvort viltu höggva ungt, heilbrigt tré niður til þess að horfa á það smám saman drepast í stofunni hjá þér, eða viltu vera með jólatré sem er plast og gerviefni út í gegn?

Hér koma nokkrar tillögur að jólatrjám sem gætu verið áhugaverður kostur. Það eru jólatré sem eru sett saman úr öllum tómu bjór- eða vínflöskunum sem þú hefur sankað að þér. Á myndunum má sjá Grolsch tré heima í stofu, Grolsch tré í Montreal og upplýst bjórflöskutré sem iðinn háskólanema reisti (og maður getur rétt ímyndað sér við hvað hann hefur verið iðinn á skólagörðunum). Ef grænu bjórflöskurnar eru ekki nógu fínar eða jólalegar fyrir þig, þá er líka hérna tré úr rauðvínsflöskum.

Nú er bara um að gera að vera svolítið umhverfisvænn og byrja að drekka upp í jólatréð. Það væri til dæmis alveg gráupplagt að prenta út skýrslu Þróunarstofnunar Sameinuðu þjóðanna um loftslagsmál sem kom út um daginn og drekkja sorgum sínum yfir ástandinu í loftslagsmálum heimsins með nokkrum kössum af bjór.

Eftir jól er síðan hægt að fara með allar flöskurnar í endurvinnsluna.

Gleðileg jól
Hjörtur

Garðaúðari úr endurunnu plasti

Eins og þið vitið þá brotnar plast ekkert niður einn, tveir og þrír í náttúrunni. Þess vegna er mikils virði að geta fundið ný not fyrir gamalt plast.

Þessi hugmynd er bráðsnjöll. Þú tekur gamla drykkjarflösku og kippu af ónýtum kúlupennum og föndrar eitt stykki garðaúðara. Ef við gerum ráð fyrir að þú eigir bæði gamla flösku og gamla penna, þá ætti kostnaðurinn að vera einhverjum þúsundköllum undir hefðbundnum Byko-úðara.

Hjörtur
(via Core77.com)

Skilaðu gömlu bólfélögunum í Sorpu!

Nú eru komnar reglur í Evrópusambandinu um að ekki megi henda rafmagnstækjum, heldur þurfi að skila þeim á endurvinnslustöðvar. Þetta á ekki við um bara sum raftæki, heldur öll raftæki. Líka titrara og kynlífsleikföng. Þannig að lögum samkvæmt ber þér að fara með gamla útjaskaða titrarann þinn í Sorpu svo hægt sé að endurvinna hann. Þessi danska auglýsing sýnir hvernig þetta virkar (eða ekki):

Þar sem ekki eru miklar líkur á að húsmæður fari að streyma á endurvinnslustöðvarnar með gömlu bólfélagana hefur fyrirtæki í Bretlandi brugðið á það ráð að bjóða fólki að senda sér gömlu kynlífsleikföngin og komast þannig hjá vandræðalegum uppákomum, eins og þessari í dönsku auglýsingunni. Eina sem þeir biðja um er að fólk þrífi þá fyrst. Þeir fengu Al Gore kanínanna til að aðstoða sig í þessari auglýsingu:

Hjörtur